TINHLAYO 34

₁Yehovha a byela Muxe, a ku: ₂“Lerisa vana va Israele, u ku eka vona: Kutakuloko mi nghenile etikweni ra Kanana, hi rona tiko leri nga ta va ndzhaka ya n'wina: i tiko ra Kanana, hi mindzilekana ya rona.

₃“Tlhelo ra le dzongeni, ri sungula emananga ya Sini, ku ya fika eEdomu, kutani ndzilakana wa n'wina wa le dzongeni wu ta sungula emakun'wini ya Lwandle-ra-ku-fa, evuxeni; ₄ndzilakana wu ta rhendzeleka edzongeni hi ndlela leyi tlhandlukaka ya Akrabimi, kutani wu ta hundzela Sini, wu ya fika edzongeni, eKadexe-Bariniya; kutani wu ta kongoma eHasari-Adara, wu tsemakanya Asimoni. ₅Ku suka eAsimoni, ndzilakana wu ta kongoma exinambyana xa Egipta, wu ya fika eLwandle.

₆“Ndzilakana wa n'wina wa vupeladyambu ri ta va Lwandle Lerikulu: hi wona ndzilakana wa n'wina wa vupeladyambu.

₇“Ndzilakana wa n'wina, wa le n'walungwini, hi lowu. Ku suka eLwandle Lerikulu, mi ta wu fikisa entshaveni ya Hori; ₈loko mi suka entshaveni ya Hori, mi ta wu fambisa hi ndlela ya Hamata, kutani ndzilakana wu ta ya fika eSedada; ₉wu ta hundza eZifironi, kutani wu ta fika eHasari-Enana: hi wona ndzilakana wa n'wina wa le n'walungwini.

₁₀“Mi ta pandza ndzilakana wa n'wina wa le vuxeni, ku suka eHasari-Enana ku ya fika eXefamu; ₁₁kutani ndzilakana wu ta suka eXefamu, wu rhelela eRibila, evuxeni bya Ayini; ndzilakana wu ta rhelela, wu lulama hi Lwandle ra Kinereta, evuxeni; ₁₂kutani ndzilakana wu ta rhelela eYordani, wu ya fika eLwandle-ra-ku-fa. Hi rona tiko ra n'wina ni mindzilekana ya rona ematlhelweni hinkwawo.”

₁₃Muxe a lerisa vana va Israele, a ku: “Hi rona tiko leri mi nga ta ri averiwa hi vuhlolotwana, leri Yehovha a leriseke ku ri nyika tinyimba ta ntlhanu na mune ni hafu. ₁₄Hikuva nyimba ya vana va Rhuveni, hi tindlu ta vatata wa vona, ni nyimba ya vana va Gadi, hi tindlu ta vatata wa vona, ni hafu ya nyimba ya vana va Manase va tekile ndzhaka ya vona.

₁₅“Tinyimba letimbirhi ni hafu ya nyimba, va tekile ndzhaka ya vona ehase ka Yordani, ni wa Yeriko, evuxeni.”

₁₆Kutani Yehovha a byela Muxe, a ku: ₁₇“Hi wona mavito ya vavanuna lava nga ta mi avanyisela tiko: Eliyazara, muprista, na Yoxuwa, n'wana Nuni; ₁₈mi ta teka ni hosi yin'we hi nyimba yin'wana ni yin'wana ku mi avanyisela tiko. ₁₉Hi wona mavito ya vanhu lava:

₂₀“wa nyimba ya Yuda: Kalebe n'wana Yefune;

wa nyimba ya vana va Simiyoni: Xemuwele, n'wana Amihudi:

₂₁wa nyimba ya Benjamini: Elidada n'wana Kisiloni;

₂₂wa nyimba ya vana va Dani: hosi Buki, n'wana Yogili;

₂₃wa vana va Yosefa, wa nyimba ya vana va Manase: hosi Haniele, n'wana Efodi;

₂₄wa nyimba ya vana va Efrayimi: Hosi Kemuwele, n'wana Xifitani;

₂₅wa nyimba ya vana va Zebuloni hosi Elisafani, n'wana Parinaka;

₂₆wa nyimba ya vana va Isakara: hosi Palatiele, n'wana Azana;

₂₇wa nyimba ya vana va Asere: hosi Ahihudu, n'wana Xelomi;

₂₈wa nyimba ya vana va Neftali: hosi Padahele, n'wana Amihudi.”

₂₉Hi vona lava Yehovha a va leriseke ku avanyisela vana va Israele tiko ra Kanana.