SWIVURISO 12

₁La rhandzaka ku layiwa u rhandza vutivi,

Kambe la vengaka ku tshinyiwa i xihunguki.

₂Munhu wa vunene u ta kuma tintswalo eka Yehovha,

Kambe lowa makungu layo biha u ta avanyisiwa.

₃Munhu a nga ka a nga tiyisiwi hi leswo biha;

Loko ri ri rimitsu ra lavo lulama, ri nga ka ri nga tsekatsekisiwi.

₄Wansati lonene i harhi ya vubombi eka nuna wa yena,

Kambe la khomisaka tingana u kotisa ku bola emarhambyini ya yena.

₅Meehleketo ya lavo lulama yi sasekile,

Kambe makungu ya lavo biha hi lama kanganyisaka.

₆Marito ya lavo biha i marindzi ya ku halata ngati,

Loko yi ri milomu ya lava lulameke ya va kutsula.

₇Lavo biha va wisiwa, va lova;

Kambe yindlu ya lavo lulama yi sala yi yimile.

₈Munhu u ta dzunisiwa hi ku ringanisa vutlhari bya yena,

Kambe mbilu ya lowo homboloka yi ta monyiwa.

₉La monyiwaka a ri ni nandza un'we,

U tlula kule la tidzunisaka a nga ri na swakudya.

₁₀Munhu wo lulama u tsetselela vutomi bya xifuwo xa yena,

Kambe ku tsetselela ka lavo biha ka vavisa.

₁₁La tirimelaka nsimu u ta xurha swakudya;

Loko a ri loyi a tinyiketaka mafenya, u pfumala vutlhari.

₁₂Lowo biha u navela leswi phangiweke hi lavo biha,

Kambe rimitsu ra lava lulameke ri veka mihandzu.

₁₃Lowo biha u phasiwa hi nandzu wa nomu wa yena,

Kambe lowo lulama u ta huma ekhombyeni.

₁₄Hi ta nomu wa yena, munhu u ta xurha vunene,

Leswi mavoko ya munhu ma swi tirhaka swi ta tlheriseriwa eka yena.

₁₅Ndlela ya xihunguki yi lulamile emahlweni ya xona,

Kambe la amukelaka ku layiwa u tlharihile.

₁₆Xihunguki xi humesa vukari bya xona,

Kambe lowo tlhariha u fihla ku dyoha ka la n'wi dyoheleke.

₁₇La vurisaka u humesa swo lulama,

Kambe mbhoni ya vunwa yi vulavula swa ku kanganyisa.

₁₈La vulaka swahava wa tlhava kukota tlhari;

Kambe nomu wa lowo tlhariha wa hanyisa.

₁₉Nomu lowu vulaka ntiyiso, wu tiya makumu,

Kambe ririmi ra vunwa i ra nkarhinyana ntsena.

₂₀Lava kanelaka swo biha, lunya ri le timbilwini ta vona,

Kambe lava kanelaka swo rhula va tsaka.

₂₁La lulameke a nga teli hi khombo;

Kambe lavo biha va talela hi nhlomulo.

₂₂Milomu ya mavunwa i manyala eka Yehovha,

Kambe lava endlaka swinene va n'wi tsakisa.

₂₃Muxiyaxiyi u fihla vutivi,

Kambe mbilu ya xihunguki yi dzunisa vuhunguki bya yona.

₂₄Voko ra munhu la tirhaka ri ta fuma,

Kambe voko ra lolo ri ta tirhela van'wana.

₂₅Ku kanakana, loko ku ri embilwini ya munhu, ka n'wi tova,

Kambe rito lerinene ra n'wi tsakisa.

₂₆La lulameke u fambisa mianakanyo ya nakulobye,

Kambe ndlela ya lavo biha ya va lovisa.

₂₇Lolo a ri oxi xiharhi xa rona,

Kambe ngingi i rifuwo ra munhu leri tiyeke.

₂₈Vutomi byi kona, endleleni ya ku lulama,

Emitileni ya kona a ku na ku fa.