SWIVURISO 18

₁Munhu la tihlawulaka eka van'wana u lava ku titsakisa ntsena,

U hlunamela hinkwaswo leswi nga ni mfanelo.

₂Lexi tsakisaka xihunguki a hi ku fuwa vutlhari,

Kambe i ku humesa leswi nga embilwini ya xona.

₃Loko ku humelela xidyohi, xi huma ni swisandzu;

Tingana, na tona, ti ta ni ku sola.

₄Ku vulavula ka munhu i xidziva xa mati;

Xihlovo xa vutlhari i nambu lowu pfelelaka.

₅A swi saseki ku ya hi nghohe ya mudyohi,

Ku kaneta la lulameke eku avanyiseni.

₆Nomu wa xihunguki wu n'wi nghenisa etimholoveni,

Kutani ririmi ra yena ri n'wi rhambela nhonga.

₇Nomu wa xihunguki i ku onhaka ka xona,

Kambe ririmi ra xona i ntlhamu eka moya wa xona.

₈Ku vulavula ka muhlevi ku kota swakudya leswi xawulaka,

Swi nghena ekhwirini, endzeni.

₉La khomaka ntirho wa yena hi ku loloha

I makwavo wa mulovisi.

₁₀Vito ra Yehovha i khokholo ro tiya,

La lulameke u chavela eka rona, u tshama eku tlakukeni.

₁₁Rifuwo ra mufuwi i khokholo ra yena,

Eku anakanyeni ka yena, i rirhangu ra xichavelo.

₁₂Ku onhaka loko ku nga si humelela, mbilu ya munhu ya tidzunisa,

Kambe ku titsongahata ku rhangela xidzumo emahlweni.

₁₃La hlamulaka a nga si twa,

U kombisa vuphukuphuku bya yena u tivangela tingana.

₁₄Mbilu ya munhu yi n'wi tiyisa evuvabyini bya yena,

Kambe mbilu leyi tsaneke, yi nga pfuxiwa hi mani?

₁₅Mbilu ya munhu wa ku anakanya yi fuwa vutivi,

Ni tindleve ta lavo tlhariha ti lava byona.

₁₆Nyiko ya munhu yi n'wi anamisela ndlela,

Yi n'wi tshinetela eka lavakulu.

₁₇La rhangaka a hlamula ehubyeni ingi u lulamile,

Kambe un'wana, loko a humelela, a n'wi ringa.

₁₈Vuhlolotwana byi herisa timholovo,

Byi avanyisa ni lavakulu.

₁₉Makwavo wa munhu u tlula hi ku nonon'hwa muti wa khokholo,

Ku hambana ka vamakwavo ku kotisa timbanti ta yindlu ya vuhosi.

₂₀Munhu u xurha hi mihandzu ya ririmi ra yena,

U tikhorisa hi leswi humaka enon'wini wa yena.

₂₁Ku fa ni ku hanya swi kota hi ririmi,

Lava ri rhandzaka va ta dya mihandzu ya rona.

₂₂La kumaka nsati wa xiviri u kumile ku kateka;

U nyikiwile tintswalo hi Yehovha.

₂₃Xisiwana xi vulavula hi ku khongela,

Kambe mufuwi u hlamula hi ku nonon'hwa.

₂₄La nga ni vanakulobye lavo tala u ta va ni khombo,

Kambe ku ni nakulobye la tlulaka makwavo.