Ku hlula ka mudyohi.
1Oho Yehovha u yimela yini hitlhelo?
U tifihlela yini enkarhini wa nhlomulo xana?
2La nga ni khombo u xaniseka hi ku tikurisa ka lavo homboloka;
U phasiwa emahirini lama hiriweke hi vona.
3Hikuva lowo biha u tidzunisa hi ku navela ka mbilu ya yena;
Ni khamba ri rhukana, kambe ri sandza Yehovha.
4Lowo biha, eku tikuriseni ka yena, a ku: A nga ka a nga vutisisi;
“Xikwembu a xi kona”; hi kona ku anakanya ka yena hinkwako.
5Ku kateka ku le ndleleni ya yena hi masiku;
Ku avanyisa ka wena ku n'wi tsandza hi vukulu bya kona;
U huhutela eka hinkwavo lava nga valala va yena.
6A ku embilwini ya yena:
Ndzi nga ka ndzi nga tsekatsekisiwi,
Ndzi sirheriwe makhombo hi masiku.
7Nomu wa yena wu tele tinhlambha, ni ku xisa, ni mano;
Ririmi ra yena ri fihlile lunya ni ku homboloka.
8U etlele kusuhi ni swimitana,
U dlaya la nga riki na nandzu endhawini ya munyama;
Mahlo ya yena ma xiya la nga ni khombo.
9Wa rindza emunyameni kukotisa nghala leyi nga ebakweni ra yona;
Wa rindza ku khoma la nga enhlomulweni;
A n'wi khoma, a n'wi koka hi ntlhamu wa yena.
10Wa bvutama, wa wonga,
Kutani xisiwana xi wela emin'waleni ya yena.
11A ku embilwini ya yena: “Xikwembu xi rivele;
Xi fihlile mombo wa xona, a xi languti ni siku ni rin'we.”
12Pfuka, Yehovha! Oho Xikwembu, tlakusa voko ra wena!
U nga rivali lava nga ekhombyeni!
13Xana lowo homboloka a tsan'wela yini Xikwembu?
Leswi a nga embilwini ya yena: “U nga ka u nga lavisisi”?
14Kasi wa swi vona, hikuva u languta khombo ni ku xaniseka,
Kutani u swi tekela emavokweni ya wena.
La nga ekhombyeni u titshembela wena,
Hi wena muyimeri wa xisiwana.
15Tshova voko ra lowo homboloka,
U lavisisa ku homboloka ka yena, u ko u nga ha n'wi voni!
16Yehovha i hosi hi masiku, hilaha ku nga heriki;
Vamatiko va herisiwa emisaveni ya yena.
17Oho Yehovha! U yingisa mikhongelo ya lava xanisiwaka;
U tiyisa timbilu ta vona, u va yingisela hi tindleve ta wena,
18Ku lulamisa timhaka ta swisiwana ni ta la xanisiwaka,
Leswaku munhu wa ku fa a nga ha chavisi la emisaveni.
