TIPISALEMA 103

₁Moya wanga, khensa Yehovha!

Na swona hinkwaswo leswi nga eka mina

A swi khense vito ra ku kwetsima ka yena!

₂Moya wanga, khensa Yehovha!

U nga rivali mitirho ya yena hinkwayo lerinene!

₃Hi yena la ku rivalelaka milandzu ya wena hinkwayo,

La hanyisaka mavabyi ya wena hinkwawo;

₄La kutsulaka vutomi bya wena ekheleni ku tlhandleka harhi ya nsovo ni tintswalo;

₅Hi yena la ku xurhisaka hi leswo nandziha eku dyuhaleni ka wena,

Vuntshwa bya wena byi ko byi pfuxiwa kukotisa gama.

₆Yehovha u avanyisela lava xanisiwaka hinkwavo,

A va endlela hi ku lulama.

₇U tivisile Muxe tindlela ta yena,

Ni vana va Israele mitirho ya yena.

₈Yehovha u ni tintswalo ni ku tsetselela,

U hlwela ku kariha, u tele vunene.

₉A nga tengisi hi mikarhi hinkwayo,

A nga hlayisi vukari bya yena hi masiku.

₁₀A nga hi endlelanga hi mpimo wa ku dyoha ka hina,

A nga hi rihisanga hi mpimo wa milandzu ya hina.

₁₁Hikuva hi laha matilo ma tlakukeke ehenhla ka misava,

Hi sweswo nsovo wa yena wu kurile ehenhla ka lava n'wi chavaka;

₁₂Hi laha vuxa byi hambaneke ni vupeladyambu,

U hambanyisile sweswo ku dyoha ka hina kule na hina.

₁₃Hi laha tatana a nga ni tintswalo eka vana va yena,

Hi sweswo Yehovha u ni tintswalo eka lava n'wi chavaka.

₁₄Hikuva wa tiva lexi hi endliweke ha xona,

Wa tsundzuka leswaku hi ntshuri ntsena.

₁₅Loko a ri munhu, masiku ya yena ma kotisa byanyi,

Wa baleka tani hi xiluva xa nhova.

₁₆Hikuva moya wu hundza ehenhla ka xona,

Kutani a xa ha ri kona, ni ndhawu ya xona a ya ha xi tivi.

₁₇Kambe nsovo wa Yehovha i wa mikarhi hinkwayo eka lava n'wi chavaka,

Ni ku lulama ka yena ehenhla ka vana va vana va vona;

₁₈Eka lava hlayisaka ntwanano wa yena,

Va tsundzuka milawu ya yena ku yi yingisa.

₁₉Yehovha u vekile xiluvelo xa yena ematilweni,

Kutani vuhosi bya yena byi fuma swilo hinkwaswo.

₂₀Khensani Yehovha, n'wina tintsumi ta yena,

Leti tiyeke matimba, leti endlaka swileriso swa yena,

Hi ku yingisa mpfumawulo wa rito ra yena!

₂₁Khensani Yehovha, n'wina tinyimpi ta yena hinkwato,

Leti n'wi tirhelaka hi ku endla leswi a swi rhandzaka!

₂₂Khensani Yehovha, n'wina mitirho hinkwayo ya yena,

Ematlhelweni ya ku fuma ka yena hinkwawo!

Moya wanga, khensa Yehovha!