TIPISALEMA 137

₁Etimbuweni ta milambu ya Babilona,

A hi tshama hi rila loko hi tsundzuka Siyoni.

₂A hi hayekile tiharipa ta hina

Eminengenidzini ya kona.

₃Lava ngi va hi yisile evukhumbini a va kombela tinsimu eka hina,

Vaxanisi va hina va kombeka tinsimu to tsaka, va ku:

“Ma nga hi yimbelelela tinsimu ta Siyoni!”

₄Hi nga yimbelerisa ku yini tinsimu ta Yehovha

Etikweni ra vamatiko xana?

₅Loko ndzi ku rivala, Yerusalema,

Voko ra mina ra xinene a ri ndzi rivale!

₆Ririmi ra mina a ri namarhele emalakeni ya mina,

Loko ndzi nga ku anakanyi, Yerusalema,

Ndzi nga ku endli masungulo ya ku tsaka ka mina!

₇Yehovha, anakanya vana va Edomu,

Hi laha va nga te hi siku ra khombo ra Yerusalema:

“Hlanhlani, hlanhlani ku ya fika emasungulweni ya wona!”

₈Nhwanyana wa Babilona, la nga ta hundzuka rhumbi,

Ku katekile la nga ta tlherisela eka wena leswi u hi endleleke swona!

₉Ku katekile munhu la nga ta khoma swihlangi swa wena,

A swi pyanyela emaribyeni!