TIPISALEMA 14

₁Xihunguki xi te embilwini ya xona: “A ku na Xikwembu!”

Va borile; mitirho ya vona yi ni manyala;

A ku na la endlaka swinene.

₂Yehovha u langutile vana va vanhu a ri etilweni,

A ta vona xana u kona la nga ni ku twisisa,

La lavaka Xikwembu.

₃Hinkwavo va hambukile, va tionhile swin'we;

A ku na la endlaka swinene, hambi a ri un'we.

₄Xana hinkwavo lava endlaka swo biha va pfumala ku tiva xana?

Va dya tiko ra mina kukotisa loko ku dyiwa vuswa;

A va khongeri Yehovha.

₅Va ta rhurhumela hi ku chava,

Hikuva Yehovha u le xikarhi ka rixaka leri lulameke.

₆Khomisani la nga ekhombyeni hi tingana eku tshembeni ka yena!

Kasi Yehovha i xichavelo xa yena.

₇Loko ingi ku hlayiseka ku nga tela Israele hi le Siyoni!

Siku Yehovha a tlherisaka tiko ra yena eku bohiweni,

Yakobo u ta tsaka, Israele u ta tsakisisa.