TIPISALEMA 141

₁Yehovha ndzi vitana ka wena, u hatlisa ku ta ndzi pfuna!

U yingisa rito ra mina loko ndzi vitana ka wena!

₂Xikhongelo xa mina a xi tlhandlukele eka wena tani hi mirhi ya risuna,

Ni ku tlakuka ka mavoko ya mina a ku fane ni gandzelo ra madyambu!

₃Yehovha, veka mulanguteri enon'wini wa nga,

U langutela nyangwa ya milomu ya mina!

₄U nga byiseri mbilu ya mina etimhakeni leto biha,

Ndzi nga tshuki ndzi endla leswo biha ni lava endlaka swo homboloka,

Ndzi nga tshuki ndzi hlangana na vona emikhubyeni ya vona!

₅La lulameke! Loko a ndzi ba, ti ta va tintswalo;

Loko a ndzi laya, ma ta va mafurha enhlokweni ya mina;

Nhloko ya mina a yi nga ma ali;

Hikuva ndzi ta va ndzi khongela emaxangwini ya vona.

₆Loko tihosi ta vona ti werile eswiweni,

Hi laha va nga ta yingisa timhaka ta mina, hikuva ti nene.

₇Marhambu ya hina ma hangalakile enyangweni ya xivandla xa vafi,

Kukota misava loko yi rimiwa yi beriwa.

₈Ina, Yehovha, Hosi!

Mahlo ya mina ma langutile ka wena,

Ndzi ku tshembile u nga tshiki vutomi bya mina byi lova!

₉U ndzi hlayisa ndzi nga weri emarindzini lawa va ndzi celelaka wona,

Ndzi nga phasiwi hi mitlhamu ya lavo biha!

₁₀A ku phasiwe vona lavo biha emintlhan'wini ya vona,

Mina ndzi pona!