Xikhongelo xa la nga ekhombyeni.
Pisalema ya Davhida.
1Yehovha, yingisa xikhongelo xa mina;
U rhiya ndleve,
u yingisa ku khongela ka mina!
Ndzi hlamule hikwalaho ka vutshembeki bya wena, ni ku lulama ka wena.
2U nga tengisani na nandza wa wena!
Hikuva a ku na munhu eka lava hanyaka,
La nga kumiwaka a lulamile emahlweni ka wena.
3Nala u xanisa moya wa mina,
U kandziyile vutomi bya mina ehansi;
U ndzi susumetele emunyameni kukotisa lava feke khale.
4Moya wa mina wu ni gome endzeni ka mina,
Kutani mbilu ya mina yi kanakaneka endzeni ka mina.
5Ndzi ehleketa mikarhi ya khale,
Ndzi anakanya hinkwaswo leswi u swi endleke,
Ndzi tsundzuka hinkwaswo leswi mavoko ya wena ma swi endleke.
6Ndzi tlakusa mavoko ya mina eka wena,
Moya wanga wu ni torha hikwalaho ka wena, kukota misava leyi omeke.
7Yehovha, hatlisa u ndzi hlamula!
Moya wa mina wa titivala.
U nga tshuki u ndzi fihlela mombo wa wena,
Leswaku ndzi nga fani ni vanhu lava xikelaka esirheni.
8Ndzi nantswise rito ra tintswalo ta wena wa ha ri mixo!
Hikuva ndzi tshembile wena.
Ndzi kombise ndlela leyi ndzi fanelaka ku famba ha yona!
Hikuva ndzi tlhandlukisela moya wa mina eka wena.
9Yehovha, ndzi kutsule ka valala va mina!
Ndzi chavela eka wena.
10Ndzi letele ku endla leswi rhandziwaka hi wena!
Hikuva u Xikwembu xa mina.
Moya wa wena lowa vunene a wu ndzi fambise endleleni ya ku lulama!
11Yehovha, ndzi hanyise, hikwalaho ka vito ra wena!
Hi ku lulama ka wena, humesa moya wa mina ekhombyeni.
12Hi tintswalo ta wena, lovisa valala va mina,
Herisa hinkwavo lava xanisaka moya wa mina!
Hikuva ndzi nandza wa wena.
