Ku vongiwa Xikwembu lexikulu xa tintswalo.
Pisalema ya ku vonga. Ya Davhida.
1Ndzi ta ku kurisa,
Xikwembu xa mina, Hosi ya nga!
Ndzi ta vonga vito ra wena hi mikarhi leyi nga yiki helo.
2Ndzi ta ku vonga hi masiku hinkwawo,
Ndzi dzunisa vito ra wena hi mikarhi leyi nga heriki.
3Yehovha u nkulukumba, u faneriwa hi ku vongiwa hinkwako;
Vukulukumba bya yena a byi na ku pimiwa:
4Rixaka rin'wana a ri byele rixaka leri tlhandlamaka mitirho ya wena,
Ri twarisa mitirho ya wena leyi tlakukeke.
5Ndzi ta tsundzuka vunene ni ku twala ka vukulu bya wena,
Ni mitirho leyi hlamarisaka ya wena.
6Vanhu va ta vula mitirho leyi chavisaka ya wena,
Mina ndzi vula vukulu bya wena.
7A ku dzunisiwe ku anakanya ka tintswalo ta wena letikulu,
A ku huveriwe ni ku lulama ka wena!
8Yehovha u ni tintswalo u ni nsovo,
U hlwela ku kariha u tsetselela ngopfu.
9Yehovha u ni vunene ka hinkwavo,
Tintswalo ta yena ti eneta mitirho hinkwayo ya yena.
10Yehovha, mitirho ya wena hinkwayo ya ku dzunisa,
Ni lava ku rhandzaka va ku vonga!
11Va ta vula ku kwetsima ka ku fuma ka wena,
Va twarisa matimba ya wena.
12Va ta tivisa vana va vanhu mitirho ya wena,
Ni vukulu bya ku kwetsima ka vuhosi bya wena.
13Ina, ku fuma ka wena i ku fuma ka mikarhi hinkwayo,
Ni vuhosi bya wena byi kona ku yisa etinxakeni leti nga heriki.
14Yehovha u seketela hinkwavo lava khunguvanyekaka,
Kutani u olola lava korhamisiweke.
15Mahlo ya swivumbiwa hinkwaswo ma langutile ka wena,
Kutani u swi nyika swakudya hi nkarhi wa swona.
16U funungula xandla xa wena,
U xurhisa hinkwaswo leswi hanyaka.
17Yehovha u lulamile etindleleni ta yena hinkwato,
U ni tintswalo emitirhweni ya yena hinkwayo.
18Yehovha u le kusuhi ni hinkwavo lava n'wi khongelaka,
Ni ka hinkwavo lava n'wi khongelaka hi timbilu.
19U nyika lava n'wi chavaka leswi va swi rhandzaka,
U yingisa swirilo swa vona, kutani wa va kutsula.
20Yehovha u londzovota hinkwavo lava n'wi rhandzaka,
Kambe wa lovisa lavo biha hinkwavo.
21Nomu wa mina a wu bumabumele Yehovha,
Kutani swivumbiwa hinkwaswo a swi vonge vito ra yena leri hlawuriweke,
Hi masiku ni masiku lama nga heriki!
