Ku khensa hikwalaho ka ku pfuniwa ka hosi.
Eka mufambisi wa vasimi. Pisalema ya Davhida.
1Yehovha, matimba ya wena ma tsakisa hosi.
Ku ponisa ka wena ka n'wi tsakisa swonghasi!
2U n'wi nyikile hilaha mbilu ya yena yi naveleke hakona,
Kambe a ku solanga ku kombela ka milomu ya yena,
3Hikuva u n'wi rhangele hi ku kateka lokunene;
U n'wi vekerile enhlokweni harhi ya nsuku lowu tengeke.
4U kombele vutomi, kutani u n'wi nyikile byona,
Byi ri vutomi lebyi tiyeke, lebyi nga heriki.
5Ku kwetsima ka yena kukulu hikwalaho ka ku pfuna ka wena.
U n'wi nyikile ku chaviwa ni vukulu;
6Hikuva u n'wi endlile wa ku kateka hi masiku,
U n'wi tsakisisa hi mombo wa wena.
7Hikuva hosi yi titshembele Yehovha,
Kutani hi ku tsetselela ka La nge henhlahenhla a nga ka a nga tsekatseki.
8Voko ra wena ri ta khoma valala va wena hinkwavo,
Voko ra wena ra xinene ri ta kuma lava ku vengaka.
9U va endla tani hi hondo leri pfurhaka,
Esikwini leri u humelelaka ha rona;
Yehovha u ta va herisa hi vukari bya yena,
Kutani va ta hisiwa hi ndzilo.
10U ta herisa rixaka ra vona emisaveni,
Ni vatukulu va vona exikarhi ka vana va vanhu,
11Hikuva va ku endlele makungu yo biha,
Va lukile mano, kambe va ta pfumala matimba.
12Hikuva u ta va tsutsumisa va ku fularhele,
Kutani u va copa hi vurha bya wena.
13Pfuka Yehovha, hi matimba ya wena,
Hi rhandza ku yimbelela ni ku twarisa matimba ya wena.
