TIPISALEMA 41

₁Ku katekile loyi a anakanyaka xisiwana,

Hi siku ra khombo,

Yehovha u ta n'wi lwela.

₂Yehovha u ta n'wi hlayisa, a va a n'wi hanyisa;

U ta katekisiwa emisaveni,

Kutani u nga ka u nga n'wi nyiketi eku naveleni ka valala va yena.

₃Yehovha u ta n'wi tiyisa emasangwini loko a vabya;

Wa hundzuluxa swinene byetlelo bya yena loko a vabya.

₄Mina, a ndzi ku: “Yehovha! U ndzi twela vusiwana!

Horisa moya wanga, hikuva ndzi ku dyoherile.”

₅Valala va mina va ndzi vula hi mona, va ku: “U ta fa rini xana?

Vito ra yena ri ta lova rini?”

₆Ni loko un'wana a ta ku ndzi vona, a vulavula hi ku hemba,

Mbilu ya yena yi n'wi hlengeletela mianakanyo ya ku biha;

A huma, kutani a vulavula ehandle.

₇Lava ndzi vengaka hinkwavo va hlevetelana ha mina;

Va ndzi anakanyela swo biha, va ku:

₈“Vuvabyi lebyikulu byi le ka yena.

Leswi a etleleke, a nga ka a nga engeti ku pfuka.”

₉Na yena nakulorhi loyi ndzi n'wi tshembeke,

Loyi a nga dya vuswa bya mina, u ndzi tlakusele xirhendze.

₁₀Kambe wena Yehovha, ndzi twele vusiwana, u ndzi pfuxa,

Ndzi ta va tlherisela leswi va lulamelaka.

₁₁Hi laha ndzi nga ta tiva leswaku wa ndzi rhandza,

Loko nala wa mina a nga ti dzunisi ha mina.

₁₂Kambe wa ndzi tiyisa eku tengeni ka mina,

Kutani wa ndzi veka emahlweni ka wena hi masiku.

₁₃A ku vongiwe Yehovha, Xikwembu xa Israele,

Hi mikarhi leyi nga riki na ku sungula ni ku hela. Amen! Amen!