TIPISALEMA 45

₁Mbilu ya nga yi hisekela marito lamanene.

Ndzi ku: “Ntirho wa mina i wa Hosi!”

Ririmi ra nga i peni ya mutsari la tlhariheke.

₂U tlula hi ku saseka vana va vanhu,

Tintswalo ti halakile emilon'wini ya wena;

Hikwalaho Xikwembu xi ku katekiseke hi laha ku nga heriki.

₃We nhenha! Tibohe banga ra wena etsheveni ra wena!

I ku dzuneka ka wena ni ku kwetsima ka wena;

₄Khandziya golonyi ya wena u ya hlula,

U ya lwela ntiyiso, ni ku lulama, ni musa.

Voko ra wena ra xinene ri ta ku dyondzisa mitirho leyi chavisaka.

₅Miseve ya wena yi kariha,

Matiko ma ta wela ehansi ka wena,

Miseve ya wena yi ta nghena etimbilwini ta valala va hosi!

₆Oho Xikwembu! Xiluvelo xa wena xi tiyile hi mikarhi ni mikarhi;

Nhonga ya vuhosi bya wena i nhonga ya ku lulama.

₇U rhandza ku lulama, u venga swo biha;

Hikwalaho, Xikwembu, Xikwembu xa wena

Xi ku chelele hi mafurha ya ku tsaka exikarhi ka vanakuloni.

₈Mirha, ni mhangani, ni kasiya swi le tingubyini ta wena hinkwato;

Etindlwini ta ndlopfu,

ku yimba ka magubu ku ku tsakisa.

₉Vanhwanyana va tihosi va le xikarhi ka malandza ya wena.

Nsati wa wena u tshamile evokweni ra wena ra xinene,

U sasekisiwe hi nsuku wa Ofiri.

₁₀Yingisa, wanhwana, languta u rhiya tindleve;

Rivala tiko ra wena, ni yindlu ya tata wa wena,

₁₁Hosi yi ta navela ku saseka ka wena,

Hikuva hi yena n'wini wa wena; u n'wi khinsamela.

₁₂Wanhwana wa Tiri, ni vafumi va matiko,

Va ta ku tsakisa hi mihlengo.

₁₃Wanhwana wa hosi wa kwetsima swonghasi endlwini!

Tinguvu ta yena ti lukiwe hi nsuku.

₁₄U tisiwe ka hosi a ambale rhoko ya mavalavala.

Endzhaku ka yena ku ta vanhwanakulobye va tisiwe ka wena;

₁₅Va tisiwe hi ku tsaka ni ku yimbelela,

Va nghena endlwini ya hosi.

₁₆Vana va wena va ta tshama ematshan'weni ya vatata wa wena;

U ta va veka tihosana emisaveni hinkwayo.

₁₇Ndzi ta tsundzuxa vito ra wena etinxakeni hinkwato,

Hikwalaho matiko ma ta ku dzunisa hi mikarhi leyi nga heriki.