TIPISALEMA 50

₁Xikwembu xa matimba, yena Yehovha, wa vulavula, u vitana misava,

Ku suka evuxeni ku yisa evupeladyambu.

₂ESiyoni laha ku sasekeke ngopfu, Xikwembu xi ni ku kwetsima.

₃Xikwembu xa hina xa ta, xi nga ka xi nga miyeli;

Emahlweni ka xona ku ni ndzilo lowu pfurhaka,

Xi rhendzeriwe exikarhi hi xidzedze lexa matimba.

₄Xi huwelela ematilweni ehenhla,

Ni la emisaveni, ku avanyisa tiko ra xona.

₅Ndzi hlengeleteleni lava ndzi rhandzaka,

Lava endleke ntwanano na mina hi magandzelo.

₆Kutani matilo ma ta vula ku lulama ka xona,

Hikuva hi xona Xikwembu lexi avanyisaka.

₇“Yingisa, tiko ranga, ndzi ta vulavula,

Yingisa, Israele, ndzi ta vula vumbhoni exikarhi ka wena.

Hi mina Xikwembu, Xikwembu xa wena.

₈A ndzi ku tshinyi hikwalaho ka magandzelo ya wena;

Tiholokosta ti le mahlweni ka mina hi masiku.

₉Ndzi nga ka ndzi nga teki nkunzi endlwini ya wena,

Hambi swi ri swiphongo ematshangeni ya wena;

₁₀Hikuva swiharhi hinkwaswo swa nhova i swa mina,

Ni swiharhi hinkwaswo swa tintshava swa madzanadzana;

₁₁Ndzi tiva tinyanyana hinkwato ta tintshava,

Ni hinkwaswo leswi fambafambaka emasin'wini i swa mina.

₁₂“Loko ngi ndzi ri ni ndlala ndzi nga ka ndzi nga ku byeli nchumu,

Hikuva misava i ya mina, ni hinkwaswo leswi nga eka yona.

₁₃Xana ndzi nga dya nyama ya tinkunzi leta matimba xana?

Ndzi nga nwa ngati ya swiphongo xana?

₁₄Humesela Xikwembu ku vonga ri nga gandzelo ra wena,

U va u riha ku hlambanya ka wena eka La nge henhlahenhla.

₁₅Kutani u vitana eka mina hi siku ra mahlomulo,

Ndzi ta ku lwela, kutani wena u ta ndzi dzunisa.”

₁₆Kambe Xikwembu xi ku eka lowo biha:

“Xana-ke hi wena la fanelaka ku hlaya milawu ya mina,

U va ni ntwanano wa mina enon'wini wa wena xana?

₁₇Wena la vengaka ku layiwa,

La cukumetaka marito ya mina endzhaku ka wena!

₁₈Loko u vona muyivi, u rhandzana na yena,

Kutani ku averiwa ka wena ku ni vaoswi.

₁₉“U nyiketa nomu wa wena eku biheni,

Ni ririmi ra wena ri luka ku kanganyisa ntsena.

₂₀U tshamisa kutani u hleva makwenu;

U sandza n'wana wa mana wa wena.

₂₁Hi lexi u xi endleke, kutani mina ndzi miyerile.

U ringanise leswaku a ndzi fana na wena.

Kambe ndzi ta ku laya sweswi, ndzi ta humesa hinkwaswo emahlweni ka wena.

₂₂“Twisisani-ke swilo leswi, n'wina lava rivalaka Xikwembu,

Leswaku kumbe ndzi nga handzula, ku nga ri na mulweri.

₂₃La humesaka ku vonga ri va gandzelo, wa ndzi dzunisa,

Ni loyi a lulamisaka ndlela ya yena,

Ndzi ta n'wi kombisa ku hlayiseka ka Xikwembu.”