Loko Xikwembu xi ri na hina, i mani la nga ta lwa na hina?
Eka mufambisi wa vasimi. Hi “Tuva ra mikanyi swa le kule.” Risimu ra Davhida, ra siku Vafilista va nga n'wi khoma eGati.
1Oho Xikwembu, ndzi twele vusiwana, hikuva vanhu va rhandza ku ndzi mita;
Va lwa na mina siku hinkwaro, va ndzi xanisa.
2Hi siku hinkwaro valala va mina va lava ku ndzi mita;
Hikuva va tele lava lwaka na mina hi ku tikurisa.
3Esikwini ra ku chava ka mina ndzi titshembela wena.
4Eka Xikwembu, ndzi ta twarisa rito ra xona;
Ndzi tshemba Xikwembu, a ndzi chavi nchumu;
Xana a nga ndzi endla yini la nga nyama ntsena?
5Hi siku hinkwaro, va onha marito ya mina;
Loko va ndzi anakanya, i ku ndzi dyohela ntsena.
6Va hlengeletana, va rindza, va xiya mikondzo ya mina,
Hikuva va lava ku susa vutomi bya mina.
7Xana va ta phonyoka hi ku homboloka xana?
Oho Xikwembu, wisa vamatiko hi vukari bya wena!
8U tsala ku valanga hinkwako ka mina.
Hlengeleta mihloti ya mina ekhuwaneni ra wena;
A yi tsariwanga ebukwini ya wena xana?
9Valala va mina va ta tshinela endzhaku siku ndzi nga ta huwelela;
Ndza swi tiva, hikuva Xikwembu xi na mina.
10Eka Xikwembu, ndzi ta twarisa rito ra xona;
Eka Yehovha, ndzi ta twarisa rito ra yena.
11Ndzi tshemba Xikwembu, a ndzi chavi nchumu;
Vanhu va nga ndzi endla yini xana?
12Oho Xikwembu!
Ndzi rhandza ku hetisa ku hlambanya ka mina eka wena;
Ndzi ta ku humesela ku khensa.
13Hikuva u kutsurile moya wa mina eku feni,
Ni mikondzo ya nga eku weni,
Leswaku ndzi famba emahlweni ka Xikwembu,
Eku vonakaleni ka lava hanyaka.
