TIPISALEMA 64

₁Oho Xikwembu, yingisa rito ra mina, loko ndzi rila!

Hlayisa vutomi bya mina eka nala loyi ndzi n'wi chavaka!

₂Ndzi sirhelele eka makungu ya lavo biha,

Ni ka ntshungu lowu baka pongo, lowu tirhaka leswo biha.

₃Va lota tindzimi ta vona kukotisa banga;

Va hoxa marito ya ku bava kukotisa miseve,

₄Va tilunghisa exihundleni ku hoxela munhu la nga riki na nandzu;

Kan'we va n'wi hoxela, va nga chavi nchumu;

₅Va titiyisa emhakeni ya vona leyo biha;

Va endla makungu ku fihla mitlhamu,

Va ku: “I mani la nga ta swi vona?”

₆Va anakanya vumbabva, va tilunghisile, makungu ma herile!

Mianakanyo ya munhu ni mbilu ya yena swi entile ngopfu.

₇Kambe Xikwembu xi va copa hi miseve ya xona:

Vonani, va tlhaviwa kan'we;

₈Tindzimi ta vona ti va wisa ehansi,

Hinkwavo lava va vonaka va ninginisa tinhloko.

₉Vanhu hinkwavo va khomiwa hi ku chava,

Va vula mitirho ya Xikwembu, va anakanya leswi xi swi endleke,

₁₀Lowo lulama u titsakela eka Yehovha, a chavela eka yena,

Kutani hinkwavo lava nga ni timbilu to lulama, va tidzunisa.