TIPISALEMA 66

₁Tlakuselani eka Xikwembu ku huwelela ka ku tsaka,

N'wina hinkwenu vaaki va misava!

₂Yimbelelani ku kwetsima ka vito ra xona,

Twarisani ku kwetsima ka xona hi ku xi dzunisa.

₃Mi ku eka Xikwembu:

“Mitirho ya wena yi chavisa swonghasi!

Hikwalaho ka vukulu bya matimba ya wena, valala va wena va ku xengetela.

₄Misava hinkwayo yi ta ku khinsamela;

Yi ku yimbelela, yi yimbelela vito ra wena.”

₅Tanani, mi vona mitirho ya Xikwembu;

Xa chaviseka eku endleni ka xona ehenhla ka vana va vanhu;

₆Xi hundzuluxile lwandle, ri va misava leya ku oma;

Va perile nambu hi milenge:

Ku va laha hi titsakelaka eka xona.

₇Xi fuma hi matimba ya xona hi laha ku nga heriki;

Mahlo ya xona ma langutisa matiko.

Lava tiarisaka va nga tshuki va tikurisa.

₈N'wina matiko, vongani Xikwembu xa hina!

Twarisani rito ra ku dzuna ka xona!

₉Xi hanyisile mimoya ya hina,

A xi pfumelanga leswaku milenge ya hina yi khunguvanyeka.

₁₀Hikuva wena, Xikwembu, u hi ringile!

U hi nyukisile exirhengeleni kukotisa silivhere.

₁₁U hi kokerile enkukutweni,

U vekile ndzhwalo lowo tika eswifungheni swa hina;

₁₂U khandziyisile vanhu etinhlokweni ta hina;

Hi hundzile exikarhi ka ndzilo ni mati.

Kambe u hi humesile erivaleni ni le ndzalweni.

₁₃Ndzi ta nghena endlwini ya wena hi tiholokosta,

Ndzi ku rihela leswi ndzi ku hlambanyeleke,

₁₄Leswi humeke emilon'wini ya mina,

Leswi vuriweke hi nomu wanga emapfalweni ya mina.

₁₅Ndzi ta ku humesela tiholokosta ta tinyimpfu leti noneke,

Swin'we ni mafurha ya makhuna,

Ndzi ta tlhava tinkunzi ni swiphongo.

₁₆Tanani, yingisani n'wina hinkwenu lava chavaka Xikwembu,

Ndzi ta vula leswi xi swi endleleke moya wa mina.

₁₇Ndzi xi vitanile hi nomu wa mina,

Ndzi xi twarisile hi ririmi ra nga.

₁₈Loko a ndzi anakanyile ku homboloka embilwini ya mina,

Hosi a yi nga ta ndzi yingisanga,

₁₉Kambe kunene Xikwembu xi ndzi yingisile,

Xi rhiyele rito ra ku khongela ka mina ndleve.

₂₀A ku vongiwe Xikwembu lexi nga cukumetangiki xikhongelo xa mina,

Lexi nga ndzi tekelangiki tintswalo ta xona!