TIPISALEMA 69

₁Ndzi ponise, oho Xikwembu!

Hikuva mati ma nghenile emoyeni wa mina.

₂Ndzi nyupele endzhopeni laha ndzi hlulekaka ku yima;

Ndzi nghene ematini ya ku enta, ma ndzi funengetile,

₃Ndzi hele matimba hi ku huwelela,

mikolo ya mina yi omile;

Mahlo ya mina ma hela

hi ku languta eka Xikwembu xanga.

₄Va andzile ku tlula misisi ya nhloko ya mina

Lava ndzi vengaka ntsena;

Va ni matimba lava lavaka ku ndzi dlaya,

Lava nga valala va mina,

hambi ndzi nga ri na nandzu eka vona;

Ndzi fanele ku tlherisa leswi ndzi nga swi yivangiki.

₅Oho Xikwembu!

Wa tiva vuhunguki bya mina,

Ni milandzu ya mina a yi fihliwanga eka wena.

₆Lava langutaka eka wena,

Hosi Yehovha wa tinyimpi,

Va nga tshuki va kanakana hikwalaho ka mina!

Lava lavaka wena, Xikwembu xa Israele,

Va nga tshuki va khomiwa hi tingana hikwalaho ka mina!

₇Hikuva ndzi soriwa hikwalaho ka wena,

Ni tingana ti funengeta mombo wa mina.

₈Ndzi hundzukile muendzi eka vamakwerhu,

La nga tiviwiki eka vana va manana;

₉Hikuva ku hiseka ka yindlu ya wena ku ndzi dyile,

Ni swisandzu swa lava ku sandzaka swi ndzi wele ehenhla.

₁₀Ndzi ri karhi ndzi rila, ndzi titsona swakudya,

Kambe ni leswi, swi hundzukile xisandzu eka mina.

₁₁Ndzi ambala tinguvu to khwaxa,

Kutani va ndzi hleka.

₁₂Lava tshamaka ehubyeni, va vulavula ha mina,

Ndzi risimu ra lava phyophyaka.

₁₃Kambe mina, ndza ku khongela, oho Yehovha!

Hi nkarhi lowunene wa vukulu bya tintswalo ta wena Xikwembu;

Ndzi hlamule hi vunene bya ku hlayiseka ka wena.

₁₄Ndzi humese endzhopeni, ndzi nga tshuki ndzi nghena eka wona;

A ndzi humesiwe emavokweni ya valala va mina, ni le xidziveni!

₁₅Ndzi nga tshuki ndzi funengetiwa hi mati lama tsutsumaka,

Xidziva xi nga tshuki xi ndzi mita,

Khele ri nga tshuki ri pfala nomu wa rona ehenhla ka mina!

₁₆Ndzi hlamule, Yehovha, hikuva tintswalo ta wena ti nene.

Hundzukela eka mina hi vukulu bya musa wa wena,

₁₇U nga fihli mombo wa wena eka nandza wa wena!

Hikuva ndzi le mahlomulweni, hatlisa ku ndzi hlamula.

₁₈Tshinelela moya wa mina, u wu kutsula,

Ndzi ponise hikwalaho ka valala va mina.

₁₉U tiva ku soriwa ka mina, ni tingana ta mina, ni ku sandziwa ka mina; Valala hinkwavo va mina va le mahlweni ka wena.

₂₀Xisandzu xi handzule mbilu ya mina kambe ndza vabya;

Ndzi langutele ku tweriwa vusiwana, kambe a swi kona,

Ni lava ndzi miyetaka, kambe a ndzi va voni.

₂₁Va ndzi nyika nyongwa, swi va swakudya swa mina;

Ni ku tima torha ra mina, va ndzi nwisa ntsuvi.

₂₂Tafula ra vona a ri ve rindzi emahlweni ka vona,

Ni ntlhamu eku tsakeni ka vona.

₂₃Mahlo ya vona a ma timiwe, ma nga ha voni,

Tsekatsekisa mihlana ya vona hi masiku.

₂₄Chulula vukari bya wena ehenhla ka vona,

Ni ku leva ka vukari bya wena a ku va fikele.

₂₅Vuako bya vona a byi hundzuke mananga,

Ku nga ha vi na muaki emitsongeni ya vona!

₂₆Hikuva va xanisa loyi u n'wi beke;

Kutani va vulavula hi ku vaviseka eka lava u va tlhaveke.

₂₇Engetela swidyoho ehenhla ka swidyoho swa vona,

Kambe va nga ngheni eku lulameni ka wena!

₂₈A va hlanguriwe ebukwini ya vutomi,

Kutani va nga tsariwi swin'we ni lava lulameke!

₂₉Mina, ndzi le khombyeni ni le ku vavisekeni;

Kambe ku pfuna ka wena ku ta ndzi pfuxa, oho Xikwembu!

₃₀Ndzi ta twarisa vito ra Xikwembu hi tinsimu,

Ndzi ta ri kurisa hi ku ri dzunisa.

₃₁Leswo swi ta tsakisa Yehovha ku tlula nkunzi,

Leyi nga ni timhondzo ni masondzo.

₃₂Lava nga enhlomulweni va ta swi vona, va tsaka;

N'wina lava lavaka Xikwembu timbilu ta n'wina ti ta hanya.

₃₃Hikuva Yehovha wa yingisa swisiwana,

Kutani a nga sandzi vabohiwa va yena.

₃₄Matilo ni misava a swi n'wi twarise,

Malwandle ni hinkwaswo leswi fambafambaka eka wona!

₃₅Hikuva Yehovha u ta ponisa Siyoni u ta aka miti ya Yuda;

Va ta tshama kona, va fuma tiko.

₃₆Vatukulu va malandza ya yena va ta ri endla ndzhaka ya vona.

Kutani lava rhandzaka vito ra yena va ta aka kona.