U nga ndzi tshiki emasikwini ya ku dyuhala ka mina!
1Yehovha! Ndzi chavela eka wena;
Ndzi nga tshuki ndzi va ni tingana, ni siku ni rin'we!
2Ndzi tshunxe hi ku lulama ka wena, u va u ndzi kutsula;
U ndzi rhiyela ndleve, kutani u ndzi ponisa!
3U va ribye ra mina laha ndzi akaka kona,
Laha ndzi tivaka ku ya kona hi masiku.
U lerisile leswaku ndzi ponisiwa;
Hikuva u ribye ra mina, ni khokholo ranga.
4Xikwembu xanga, ndzi ponise evokweni ra lowo biha,
Evokweni ra mbabva, ni ra munhu la karihaka;
5Hikuva u tshembo ra mina, wena Hosi Yehovha!
Ndzi ku tshembile ndza ha ri evuntshweni bya mina.
6Ku suka ekhwirini ra manana, ndzi tiseketele eka wena;
Hi wena la ndzi humeseke ekhwirini ra manana;
Ndzi ta ku tlangela hi masiku.
7Ndzi xihlamariso eka lavanyingi,
Kambe wena u vuchavelo bya mina lebyo tiya.
8Nomu wa mina wu ta tala hi xidzumo xa wena,
Ni ku kwetsima ka wena hi masiku hinkwawo.
9U nga ndzi cukumeti enkarhini wa ku dyuhala ka mina,
U nga ndzi tshiki loko matimba ya mina ma ta hela!
10Hikuva valala va mina va vulavula ha mina,
Lava rhiyelaka vutomi bya mina va kanela swin'we,
11Va ku: “Xikwembu xi n'wi tshikile,
N'wi hlongoriseni, mi n'wi khoma; hikuva a ku na loyi a nga ta n'wi ponisa.”
12Oho Xikwembu!
U nga vi kule na mina!
Xikwembu xanga! Hatlisa ku ta ndzi pfuna!
13A va khomiwe hi tingana, a va herisiwe lava pfukaka vutomi bya mina;
A va sandziwe ni ku soriwa lava lavaka ku ndzi lovisa.
14Loko ndzi ri mina, ndzi ta tshemba hi masiku,
Ndzi va ndzi engetela ku ku dzunisa.
15Nomu wa mina wu ta twarisa ku lulama ka wena,
Ni ku hlayiseka ka wena hi siku rin'wana ni rin'wana;
Hikuva a ndzi tivi mpimo wa swona.
16Ndzi ta yima ndzi vula mitirho ya matimba ya Hosi Yehovha,
Ndzi ta tsundzuxa ku lulama ka wena ntsena.
17Oho Xikwembu!
U ndzi dyondzisile ku sungula evuntshweni bya mina,
Kutani ku fika sweswi, ndzi tshama ndzi vula swihlamariso swa wena.
18U nga ndzi tshiki, oho Xikwembu!
Ni le ku dyuhaleni ka mina,
Ndzi ta kota ku vula matimba ya wena eka vanhu va sweswi,
Ni mitirho ya ntamu wa wena eka hinkwavo lava nga ta ta!
19Ku lulama ka wena Xikwembu, ku tlakukile ngopfu,
U endle leswikulu, oho Xikwembu!
I mani la fanaka na wena!
20U hi nghenisile emakhombyeni ya ku tala ni le ku vavisekeni;
Kambe u ta tlhela u hi hanyisa,
U ta tlhela u hi humesa emakheleni ya misava.
21U ta andzisa vukulu bya mina,
U ta tlhela u ndzi miyeta kambe!
22Hikwalaho ndzi ta ku vonga hi gubu,
Ndzi ta twarisa ku tshembeka ka wena,
Xikwembu xanga,
Ndzi va ndzi ku yimbelela hi haripa wena, Mukwetsimi wa Israele.
23Milomu ya mina yi ta huwelela hi ku tsaka, loko ndzi ku yimbelela.
Na wona moya wa mina lowu u wu kutsuleke.
24Ririmi ra mina ri ta vula ku lulama ka wena hi masiku hinkwawo.
Hikuva va ta va ni tingana, va tshuka, lava lavaka ku ndzi lovisa.
