Muavanyisi wa tihosi ta misava.
Eka mufambisi wa vasimi. Hi magubu. Pisalema ya Asafa. Risimu.
1Xikwembu xi tiviwa hi Yuda,
Vito ra xona rikulu eka Israele.
2Tabernakela ya xona yi le Salema.
Ni vutshamo bya xona eSiyoni.
3Hi laha a tshoveke miseve kona,
Ni switlhangu, ni banga, ni matlhari ya ku lwa.
4U hundzisa hi ku kwetsima, ni ku saseka
Tintshava ta vawutli!
5Vanhu lava va vurhenha ngopfu va phangiwile,
Va tietlelele evurhongweni bya vona;
A va tivanga ku tilwela, vanhu hinkwavo lava va tinhenha.
6Hi ku chavisa ka wena, Xikwembu xa Yakobo,
Vakhandziyi va tietlelele ni tihanci ta vona.
7Wena, wa chaveka!
I mani la nga yimaka emahlweni ka wena,
Loko vukari bya wena byi pfuka?
8Hi le henhla etilweni, u tivisile ku avanyisa ka wena,
Kutani misava yi miyele hi ku chava,
9Loko Xikwembu xi pfukile ku ta avanyisa,
Ni ku ponisa hinkwavo lava xanisekaka la emisaveni.
10Na byona, vukari bya munhu bya ku dzunisa,
Loko u ambala vukari bya wena hinkwabyo.
11Vulani ku hlambanya ka n'wina eka Yehovha Xikwembu xa n'wina, mi va mi ku hlayisa,
Hinkwavo lava n'wi rhendzelaka exikarhi a va tise tinyiko eka Loyi a chavisaka!
12Wa tsema ku tikurisa ka tihosana,
Wa chaveka ni ka tihosi ta misava.
