TIPISALEMA 83

₁Oho Xikwembu, u nga tshuki u miyela!

U nga miyeli, u nga wisi, Xikwembu!

₂Hikuva valala va wena va dzumadzuma,

Lava ku vengaka va tlakusa tinhloko.

₃Va kanelela tiko ra wena emakungu lama teleke hi mano,

Va hleva lava u va chavelelaka.

₄Va ku:

“Tanani, a hi va hetiseni exikarhi ka matiko

Leswaku vito ra Israele ri nga ha twakari.”

₅Va endle makungu va ri mbilu yin'we,

Va hlangene ku lwa na wena;

₆Va mitsonga ya Edomu ni Vaiximaele,

Vamowabu, ni va Hagara.

₇Gebali na Amoni na Amaleke,

Va Filista ni vaaki va Tiri,

₈Va Axuru, na vona, va hlangene na vona;

Va lombile vana va Lota mavoko ya vona.

₉U va endla hi laha u endleke va Midiyani,

Na Sisera, na Yabini, exinambyaneni xa Kixoni!

₁₀Va herisiwele Eni-Dori,

Va endliwe vulongo bya misava.

₁₁Endla tihosi ta vona, ti va tani hi va Orebe na Zebe,

Ni tihosana hinkwato ta vona, tani hi Zeba na Salmuna.

₁₂Hikuva va ku:

“A hi yeni, hi teka tindlu ta Xikwembu!”

₁₃Oho Xikwembu xanga!

U va fanisa ni xidzedze,

Ni mungu lowu hungiwaka hi moya,

₁₄Ni ndzilo lowu pfurhaka exihlahleni,

Ni malangavi ya ndzilo lowu hisaka etintshaveni!

₁₅U va hlongorisa hi xidzedze xa wena,

U va rhurhumerisa hi mheho leyi chavisaka ya wena!

₁₆U funengeta hi tingana mimombo ya vona,

Leswaku va lava vito ra wena, Yehovha!

₁₇Ni leswaku va khomiwa hi tingana, ni ku chavisiwa ni makumu,

Va khomiwa hi mapfalo va fa.

₁₈Va ta tiva leswaku wena loyi vito ra yena a nga Yehovha,

U tlakukile ehenhla ka misava hinkwayo.