Ku vaviseka lokukulu.
Risimu. Pisalema ya vana va Kore. Eka mufambisi wa vasimi; ku yimbelela hi mikarhi ya ku xaniseka. Risimu ra Hemani, Muezra.
1Oho Yehovha,
Xikwembu xa ku hlayiseka ka mina!
Ndzi huwelela eka wena nhlekanhi ni vusiku.
2Xikhongelo xa mina a xi fike eka wena!
U va u yingisa ku huwelela ka mina!
3Hikuva moya wa mina wu xurhile hi makhombo,
Ni vutomi bya mina byi voyamele exivandleni xa vafi.
4Ndzi hlayiwile exikarhi ka lava rhelelaka esirheni,
Ndzi fana ni munhu la heleriweke hi matimba.
5Ndzi loyi a etleleke exikarhi ka vafi,
Tanihi lava dlayiweke, lava etlelaka esirheni,
Lava u nga va anakanyiki,
Va hambanyisiweke na wena.
6U ndzi cukumetile ekheleni lera ku enta,
Emunyameni, ni le xiweni xa le hansi ngopfu.
7Vukari bya wena bya ndzi tikela,
Ndzi funengetiwe hi magandlati hinkwawo ya wena.
8U ndzi tshinetile ekule ni vanakulorhi,
U ndzi endlile la nyenyetsaka eka vona;
Ndzi pfaleriwe laha ku nga humiwiki.
9Mahlo ya mina ma hela hi ku vaviseka;
Oho Yehovha! Ndza ku khongela hi masiku hinkwawo.
Ndzi tshambuluta mavoko ya mina eka wena.
10Xana u endlela vafi masingita?
Vafi va pfuka va ku dzunisa xana?
11Xana vunene bya wena byi vuriwa esirheni,
Ni ku lulama ka wena le xiweni xa rifu xana?
12Xana masingita ya wena ma tiviwa le munyameni,
Ni ku lulama ka wena le misaveni yo rivaleka vana?
13Kambe, Yehovha, ndza huwelela eka wena,
Ku khongela ka mina ku fika nimpundzu eka wena.
14Oho Yehovha!
U sivela yini moya wa mina?
U ndzi fihlelela yini mombo wa wena?
15Mpfhuka ndzi nga tswariwa ndzi le vusiwaneni ni le kusuhi ni ku fa.
Ndzi tshukisiwa hi michavo ya wena ndzi le ku karhatekeni.
16Vukari bya wena byi ndzi wele ehenhla,
Ku chavisa ka wena ku ndzi tsema nhlana;
17Xi ndzi rhendzele tani hi mati hi masiku hinkwawo;
Xi ndzi rhendzele swin'we hinkwako.
18U tshinetele ekule na mina vanakulorhi ni tintangha ta mina;
Leswi ndzi seleke na swona i munyama.
