NHLAVUTELO 15

₁Kutani ndzi vona etilweni xikombiso xin'wana lexikulu lexi hlamarisaka, ti ri tintsumi ta ntlhanu na timbirhi leti tameleke makhombo ya ntlhanu na mambirhi ya ku hetelela hikuva vukari bya Xikwembu byi hetelela ha wona. ₂Kutani ndzi vona leswi fanaka ni lwandle ra nghilazi leri hlanganeke ni ndzilo, kutani lava nga hlula xivandza, ni xifaniso xa xona, ni tinhlayo ta vito ra xona a va yimile elwandle ra nghilazi, va tamele tiharipa ta Xikwembu. ₃Va yimbelela risimu ra Muxe, nandza wa Xikwembu, ni risimu ra Xinyimpfana, va ku: “Hi leyikulu, ya hlamarisa, mitirho ya wena, Hosi, Xikwembu xa matimba hinkwawo! Oho! Hosi ya matiko, tindlela ta wena ti lulamile ti tshembekile swonghasi! ₄I mani la nga taka a nga ku chavi, Hosi? I mani la nga taka a nga dzunisi vito ra wena xana? Hikuva hi wena ntsena la kwetsimeke; hikwalaho matiko hinkwawo ma ta ta, ma khinsama emahlweni ka wena, hikuva ku avanyisa ka wena ku hume erivaleni.”

₅Endzhaku ka sweswo ndzi languta, kutani ndzi vona tempele ya Tabernakela ya vumbhoni yi pfuriwa etilweni. ₆Kutani tintsumi ta ntlhanu na timbirhi leti tameleke makhombo ya ntlhanu na mambirhi, ti huma etempeleni, ti ambele ntsembyana lowo saseka lowo vangama, ti tibohile eswifuveni hi mavamba ya nsuku. ₇Xin'wana xa swivumbiwa swa mune leswi hanyaka xi nyika tintsumi leta ntlhanu na timbirhi swimbitana swa nsuku swa ntlhanu na swimbirhi, leswi teleke vukari bya Xikwembu lexi hanyaka hilaha ku nga heriki. ₈Kutani tempele yi tala musi hikwalaho ka ku kwetsima ka Xikwembu ni matimba ya xona; kambe a ku nga ri na loyi a swi kotaka ku nghena etempeleni, ku nga si hetiseka makhombo laya ntlhanu na mambirhi ya tintsumi leta ntlhanu na timbirhi.