Muoswi lonkulu.
1Ntsumi yin'wana ya leta ntlhanu na timbirhi leti tameleke swimbitana swa ntlhanu na swimbirhi yi ta, yi vulavula na mina, yi ku: “Tana, ndzi ta ku kombisa ku avanyisiwa ka muoswi lonkulu, la tshamiseke ehenhla ka mati layo tala, 2loyi tihosi ta misava ti oswaneke na yena, ni loyi lava akeke emisaveni va pyopyiweke hi vhinyo ya vuoswi bya yena.” 3Kutani yi ndzi yisa emananga hi moya, kutani ndzi vona wansati la tshameke ehenhla ka xivandzana xa ribungu lexi teleke mavito ya xisandzu, lexi ngi xi ri ni tinhloko ta ntlhanu na timbirhi, ni timhondzo ta khume. 4Wansati a a ambele xivunguvungu ni leswo tshwuka; a bombile hi nsuku, ni maribye ya nxavo wa nkoka ni tiperela; a tamele evokweni ra yena xinwelo xa nsuku lexi teleke manyala, ni thyaka ra vuoswi bya misava. 5Emombyeni wa yena ku tsariwile vito leri nge: “Swihundla, Babilona lonkulu, mana wa swioswi ni wa manyala ya misava.” 6Kutani ndzi vona wansati a pyopyiwile hi ngati ya vakwetsimi, ni ngati ya timbhoni ta Yesu; kakuloko ndzi n'wi vona, ndzi hlamala ngopfungopfu.
Xihundla xa wansati ni xivandzana.
7Kutani ntsumi yi ku eka mina: “U hlamalela yini xana? Ndzi ta ku byela xihundla xa wansati ni xa xivandzana lexi a xi khandziyeke, lexi nga ni tinhloko ta ntlhanu na timbirhi, ni timhondzo ta khume. 8Xivandzana lexi u xi voneke a xi ri kona, kambe a xa ha ri kona; xi ta huma ekheleni kutani xi ya eku loveni. Lava akeke emisaveni, lava mavito ya vona ma nga tsariwangiki ebukwini ya vutomi ka ha ri mpfhuka loko misava yi tumbuluka, va ta hlamala loko va vona xivandzana, hikuva a xi ri kona, kutani a xa ha ri kona, kasi xi ta tlhela xi va kona. 9Hilaha ku fanelaka ku va ku twisisa loku nga ni vutlhari: Tinhloko ta ntlhanu na timbirhi, i tintshava ta ntlhanu na timbirhi leti wansati a tshameke ehenhla ka tona; 10kambe i tihosi ta ntlhanu na timbirhi; ku wile ta ntlhanu, yin'wana ya ha ri kona, kambe yin'wana a yi si ta. Kutakuloko yi tile yi fanele ku tshama nkarhinyana. 11Kambe xivandzana lexi a xi ri kona, lexi nga ha riki kona, xona i hosi ya ntlhanu na tinharhu; hi yin'wana ya leta ntlhanu na timbirhi, kutani yi ya eku loveni. 12Timhondzo ta khume leti u ti voneke, i tihosi ta khume leti nga siki kumaka vuhosi, kambe ti ta teka vuhosi swin'we ni xivandzana hi nkarhi wu ri wun'we. 13Ti ni ku anakanya kun'we, ti nyika xivandzana vuhosi ni matimba ya tona. 14Ti ta lwa ni Xinyimpfana, kambe Xinyimpfana xi ta ti hlula, hikuva i Hosi ya tihosi ni Mufumi wa vafumi; kutani lava a nga na vona hi lava vitaniweke ni vahlawuriwa, ni vapfumeri.”
15Kutani a ku eka mina: “Mati lawa u ma voneke, lawa muoswi a tshamiseke eka wona, i swivongo, ni vunyingi, ni matiko, ni tindzimi. 16Kutani timhondzo ta khume leti u ti voneke, ni xivandzana, swi ta venga muoswi, swi n'wi endla rivala, swi n'wi hluvurisa, swi dya tinyama ta yena, swi n'wi hisa hi ndzilo. 17Hikuva Xikwembu xi nghenisile etimbilwini ta swona ku endla makungu ya xona hi ku pfumelelana, ni ku nyika xivandzana ku fuma ka vona, ku ko ku hetiseka marito ya Xikwembu. 18Loko a ri wansati loyi u n'wi voneke, i muti lowukulu lowu fumaka tihosi ta misava.”
