Ku tinyiketa eka Xikwembu, ni le ntirhweni wa xona.
1Vamakwerhu, ndza mi khongotela hi tintswalo ta Xikwembu, leswaku mi nyiketa miri wa n'wina, wu va mhamba leyi hanyaka, leyi kwetsimaka, leyi tsakisaka Xikwembu; hi rona gandzelo leri mi fanelaka. 2Mi nga tshuki mi tifanisa ni misava leyi, kambe mi hundzuka hi vuntshwa bya miehleketo ya n'wina, mi ta twisisa hakona leswaku ku rhandza ka Xikwembu, hi lokunene, ka tsakisa, ku hetisekile.
3Hikuva hi tintswalo leti ndzi ti nyikiweke, ndzi byela munhu un'wana ni un'wana exikarhi ka n'wina leswaku, a nga tshuki a tiringanisa hi vukulu ku tlurisa leswi fanelaka, kambe a a ve ni miehleketo ya ku titsongahata a ya hi mpimo wa ku pfumela loku Xikwembu xi ku aveleke un'wana ni un'wana. 4Hikuva kukota leswi hi nga ni swirho leswo tala emirini wu ri wun'we, kutani swirho hinkwaswo swi nga ri na ntirho wun'we; 5hi mukhuva wolowo, na hina, hambi hi tele, hi miri wun'we eka Kriste, kutani un'wana ni un'wana i xirho xa van'wana.
6Kambe leswi hi nga ni tinyiko leti hambaneke, hilaha hi nyikiweke tintswalo hakona, a hi tirheni ha tona loko hi ri ni ku profeta, a hi profeteni hi mpimo wa ku pfumela; 7la averiweke ntirho, a a tiye entirhweni; la dyondzisaka, a a tiye eku dyondziseni, la khongotelaka a a tiye eku khongoteleni; 8la hananaka, a a hanane hi mbilu leyo tenga; la lerisaka, a a lerise hi ku xiya; la endlaka mitirho ya tintswalo, a a endle hi ku tsaka.
Mitirho ya rirhandzu.
9Rirhandzu ri nga tshuki ri va ni ku kanganyisa. Vengani leswo biha, mi namarhela leswinene. 10Tolovelanani hi rirhandzu ra vuxaka, mi ri karhi mi yisana emahlweni hi mafundzha. 11Mi nga tshuki mi loloha ku tirhela van'wana kambe mi va ni ku hiseka emoyeni, mi tirhela Hosi. 12Tsakani eku languteleni, mi yingisela emaxangwini, mi chivirikela eku khongeleni. 13Pambulelani vakwetsimi loko va pfumala, mi va ni ku gingirika ku amukela vaendzi. 14Katekisani lava mi xanisaka; katekisani, mi nga tshuki mi rhukana.
15Tsakani ni lava tsakeke, mi rila ni lava rilaka. 16Mi namarhelana kun'we hi mbilu yin'we; mi nga tshuki mi navela leswi tlakukeke, kambe xaxamelani ni lava titsongahataka; mi nga tivoni lavo tlhariha.
17Mi nga tlheriseli ku biha hi ku biha, hambi ku ri ka mani na mani. Lavani leswinene emahlweni ka vanhu hinkwavo. 18Loko swi nga endleka, ni loko mi swi kota, tshamani hi ku tsakelana ni vanhu hinkwavo.
19Varhandziwa, mi nga tshuki mi tirihisela mi ri n'wina; kambe kendlukelani vukari bya Xikwembu, hikuva ku tsariwe leswaku: “Ku rihisa, i ka mina; hi mina loyi ndzi nga ta rihisa; ku vula Hosi.” 20Hikwalaho, “la nga nala eka wena, loko a ri ni ndlala, n'wi phamele; loko a ri ni torha, n'wi siyele a nwa; hikuva, loko u endlisa sweswo, u n'wi hlengeletele mpfundze enhlokweni.” 21U nga tshuki u hluriwa hi leswo biha, kambe hlula leswo biha hi leswo saseka.
