RHUTI 1

₁Enkarhini lowu wa ku fuma ka vaavanyisi, a ku ri ni ndlala etikweni ra Israele. Kutani munhu wa Betlehema-Yuda a ya luvela etikweni ra Mowabu, a ri ni nsati wa yena, ni vana va yena va xinuna vambirhi. ₂Vito ra munhu loyi a a ri Elimeleke ni vito ra nsati wa yena a a ri Nahumi ni mavito ya vana vambirhi va yena a a ri Mahaloni na Kiliyoni; a va ri Vaefrata, va Betlehema-Yuda, kutani va ya aka etikweni ra Mowabu.

₃Elimeleke, nuna wa Nahumi, a fa kutani Nahumi a sala ni vana va yena vambirhi; ₄vona va teka vasati va Vamowabu, vito ra un'wana a a ri Oripa, ra un'wana Rhuti, kutani va tshama kona, malembe lama lavaka ku va khume. ₅Mahaloni na Kiliyoni va fa na vona havambirhi. Sweswo wa nsati loyi a sala a ri swakwe ndzhaku ka rifu ra vana vambirhi va yena ni nuna wa yena.

₆Kutani a pfuka ni vingi va yena, a a sukela etikweni ra Mowabu, hikuva a a twile etikweni ra Mowabu leswaku Yehovha u endzele tiko ra yena, a ri nyike swakudya. ₇A rhurhisa sweswo etikweni leri ngi a ri ka rona, a ri ni vingi va yena vambirhi, va tifambela, va tlhelela etikweni ra Yuda.

₈Kutani Nahumi a ku eka vingi va yena vambirhi: “Tlhelani, timukelani un'wana ni un'wana endlwini ya mana wakwe. Yehovha a mi endle hi tintswalo kukota leswi mi endleleke lava feke na mina. ₉Yehovha a mi nyike un'wana ni un'wana ku tsaka endlwini ya nuna wa yena.” Kutani a va ntswontswa. Kambe va tlakusa marito, va rila, va ku eka yena: ₁₀“Swi tlula hi loko hi famba na wena etikweni ra wena.” ₁₁Kutani Nahumi a hlamula a ku eka vona: “Tlhelani, vana vanga, mi ta ndzi landzela yini xana? Xana mi ri ndzi ni vana enyimbeni ya mina leswaku mi ta kuma vanuna va n'wina-ke? ₁₂Tlhelani, vana vanga, mi timukela; hikuva ndzi dyuhele ngopfu, ndzi hluleka ku tekiwa, ni loko ndzi nga mi tshembisa leswaku ndzi nga va ni nuna nivusiku lebyi; kutani ndzi veleka vana, ₁₃xana mi nga va tshamela va ko va kula? Xana mi ta va yimela, mi ala ku tekiwa? A hi swona, vana vanga. Kunene ndzi le khombyeni ku tlula n'wina, hikuva voko ra Yehovha ri ndzi tsongahatile ngopfu.” ₁₄Kutani va tlakusa marito, va engeta va rila. Kutani Oripa a ntswontswa n'wingi wa yena. Kambe Rhuti a namarhela yena.

₁₅Kutani Nahumi a ku eka yena: “Waswivo, makwenu u mukile etikweni ra yena ni swikwembyini swa rikwavo. Sweswi, tlhela u n'wi landza.” ₁₆Kambe Rhuti a hlamula, a ku: “U nga tshuki u ndzi sindzisa leswaku ndzi ku siya, ndzi ku fularhela; hikuva ndzi ta ya laha u yaka kona, ndzi ta tshama laha u nga ta tshama kona; tiko ra wena ri ta va tiko ra mina, Xikwembu xa wena xi ta va Xikwembu xa mina. ₁₇Laha u nga ta fa kona, ndzi ta fa, ndzi lahliwa kona. Yehovha a a ndzi endle hi matimba ku tlurisa loko ndzi hambana na wena loko ku nga ri hi ku fa.” ₁₈Kakuloko Nahumi a vona leswaku a rhandza ku n'wi landzela, a tshika ku vulavula na yena. ₁₉Kutani va famba va ri vambirhi, va ko va fika eBetlehema.

Kakuloko va nghena eBetlehema muti hinkwawo wu hlamala ha vona; vavasati va ku: “Xana a hi yena Nahumi xana?” ₂₀Kambe a va hlamula, a ku: “Mi nga ndzi vuleni Nahumi, mi ndzi vula Mara, hikuva La nga ni matimba hinkwawo u ndzi dyise mbitsi ngopfu! A ndzi fambile ndzi ri ni ndzalo, ₂₁kambe Yehovha a ndzi tlherisa ndzi nga ri na nchumu. Mi ta ndzi vula Nahumi ha yini-ke? Kasi Yehovha u ndzi avanyisile; La nga ni matimba hinkwawo, u ndzi nghenise enhlomulweni.”

₂₂Hi kona ku vuya ka Nahumi, a ri na Rhuti, wa Mowabu n'wingi wa yena, la humeke etikweni ra Mowabu, kutani va nghena eBetlehema eku sunguleni ka ku tshovela ka barley.