RISIMU RA TINSIMU 5

₁Ndzi tile ensin'wini ya mina,

oho makwerhu, muvutiwa wa mina!

Ndzi hlengeletile mirha ya mina ni swinun'hwelo swa mina;

Ndzi dyile xihlenga xa mina ni vulombe bya mina;

Ndzi nwile vhinyo ya mina ni ntswamba wa mina.

Dyanani, maxaka, nwanani, mi pyopya hi rirhandzu.

₂A ndzi etlela, kambe mbilu ya mina a yi sisimuka,

I rito ra murhandziwa wa mina la gongondzaka,

A ku: “Ndzi pfulele, makwerhu, murhandziwa wanga,

Tuva ra mina, mukwetsimi wanga!

Hikuva nhloko ya mina yi tele hi mberha,

Misisi ya mina yi tsakamile hi mathonsi ya vusiku.”

₃Ndzi hluvurile nguvu ya mina; ndzi ta yi ambarisa ku yini?

Ndzi hlantswile milenge ya mina; ndzi ta yi nyamisisa ku yini?

₄Murhandziwa wanga u nghenise voko ra yena hi le fasitereni,

Kutani xiviri xa mina xi nyawuka ha yena.

₅Ndzi pfukile ku pfulela murhandziwa wa mina;

Kutani mavoko ya mina ma tshone mirha,

Ni tintiho ta mina ti xiririka hi mirha loko ti khoma xipfalo.

₆Ndzi pfulele murhandziwa wa mina;

Kambe murhandziwa wa mina a a sukile, a famba.

Moya wa mina a wu titivala loko a vulavula na mina:

Ndzi n'wi lava, kambe a ndzi n'wi kumanga;

Ndzi n'wi vitana, kambe a nga ndzi hlamulanga.

₇Ndzi kumiwa hi varindzi lava ingi va fambafamba emutini,

Va ndzi ba, va ndzi vavisa;

Vahlayisi va rirhangu va ndzi tekela xisirhelo xa mina.

₈Ndza mi khongotela n'wina, vanhwanyana va Yerusalema, ndzi ri:

“Xana loko mi kuma murhandziwa wa mina,

Xana mi ta ku yini eka yena?”

Mi ta ku: “Ndza vabya hi rirhandzu.”

₉I ncini lexi murhandziwa wa wena a tlulaka un'wana ha xona,

Wena lowo saseka exikarhi ka vavasati?

Murhandziwa wa wena u na yini lexi a tlulaka un'wana ha xona,

Loko u hi lerisa swo tano?

₁₀Murhandziwa wa mina u basile, u tshwukile;

U hlawulekile exikarhi ka lava khume ra madzana.

₁₁Nhloko ya yena yi fana ni nsuku lowo saseka ngopfu,

Xihluthu xa yena xa lengalenga,

Hi lexa ntima ku fana ni wukuwuku.

₁₂Mahlo ya yena ma fana ni matuva eswinambyaneni,

Ma hlantswiwe hi ntswamba, ma tshame endzalweni.

₁₃Marhama ya yena ma fana ni xirhapa xa mirhi ya risuna,

Ma fana ni swiluva leswi nun'hwelaka;

Milomu ya yena yi fana ni makhon'wa lama tshonaka mirha.

₁₄Mavoko ya yena ma fana ni swingwavila swa nsuku,

Leswi namekiweke hi maribye ya krisolita;

Khwiri ra yena ri fana ni timhondzo ta ndlopfu leti hatimaka,

Ti namekiweke hi maribye ya safiri.

₁₅Milenge ya yena yi fana ni timhandze ta mabulu leyo basa;

Ti vekiwe eswikhatweni swa nsuku lowu tengeke.

Xivumbeko xa yena xi fana na Lebanoni,

Xi hlawulekile ku fana ni xa tikedari.

Rito ra yena ra nandziha ngopfu,

Kutani vumunhu bya yena hinkwabyo hi lebyi tsakisaka.

₁₆Murhandziwa wanga u tano, munghana wa mina u tano,

N'wina, vanhwanyana va Yerusalema.