ZAKARIYA 4

₁Ntsumi leyi ngi yi vulavula na mina yi engeta yi tlhela yi ndzi pfuxa, kukota loko ku pfuxiwa munhu evurhongweni. ₂Yi ku eka mina: “U vona yini?” Ndzi ku: “Ndzi vona kandelari leri nga ra nsuku ntsena, ri nga ni khuwana ra rona ra mafurha emakumu ka rona, ni mavoningo ya rona ya ntlhanu na mambirhi ehenhla ka rona, ni tipompinyana ta ntlhanu na timbirhi ta mavoningo lawa ma nga ehenhla ka rona. ₃Ndzi vona ni mitlhwari mimbirhi ekusuhi na rona, wun'wana exineneni xa khuwana, wun'wana eximatsini.”

₄Ndzi byela ntsumi leyi vulavulaka na mina, ndzi ku: “Swilo sweswo i swini, n'wini wanga?” ₅Kutani ntsumi leyi vulavulaka na mina, yi ndzi hlamula, yi ku: “Xana a ku tivi leswaku swilo sweswo i swini?” Ndzi ku: “E, hosi ya mina.” ₆Kutani a ndzi byela, a ku: “I rito ra Yehovha eka Zerubabele, ri nge: Ku nga ka ku nga vi hi nyimpi ni matimba, kambe hi Moya wa mina, ku vula Yehovha wa tinyimpi! ₇Wena, ntshava leyikulu, u yini eka Zerubabele? U rivala ntsena! U ta humesela ehandle ribye ra yinhla exikarhi ka huwa leyi nge: ‘A ri tsetseleriwe! A ri tsetseleriwe!’ ”

₈Rito ra Yehovha ri ta eka mina, ri ku: ₉“Mavoko ya Zerubabele ma sungule yindlu leyi, mavoko ya yena ma ta yi heta; kutani U ta tiva leswaku, Yehovha wa tinyimpi u ndzi rhumile eka n'wina. ₁₀Hikuva i mani la nga solaka siku ra timhaka letitsongo, loko mahlo lawa ya ntlhanu na mambirhi, ma nga mahlo ya Yehovha lawa a langutaka ha wona misava hinkwayo, ma tsakile hi ku vona mpimo evokweni ra Zerubabele?”

₁₁Kutani ndzi vulavula ni ntsumi, ndzi ku eka yona: “Mitlhwari leyimbirhi leyi nga exineneni xa kandelari ni le ximatsini xa rona i yini?” ₁₂Ndzi engeta ndzi vulavula ra vumbirhi, ndzi ku eka yona: “Swini swichocho leswimbirhi swa mihandzu ya mitlhwari leswi nga ekusuhi ni swimbitana swimbirhi swa tintuva ta nsuku, leswi ku phomaphomelaka mafurha eka swona?” ₁₃Yi ndzi byela, yi ku: “A ku tivi leswaku swilo sweswo i ntswini xana?” Ndzi ku: “E, hosi ya mina.” ₁₄Yi ku: “I vatotiwa vambirhi lava yimeke emahlweni ka Hosi ya misava hinkwayo.”