I Tikronika 21

₁Sathana a pfilunganya makungu ya Vaisraele, kutani a kucetela Davhida ku hlaya ntsengo wa vona. ₂Hiloko Davhida a lerisa Yowabu ni tindhuna ta mavuthu, a ku: “Rhendzelekani mi hlaya Vaisraele ku sukela eBerexeba ku ya fika eDani, mi vuya mi ta ndzi tivisa ntsengo wa vona.” ₃Kambe Yowabu a hlamula a ku: “Ingi HOSI Xikwembu xi nga andzisa ka dzana ntsengo wa vanhu va xona! We hosi n'wini wanga, xana vanhu lava hinkwavo a hi malandza ya wena xana? Hikwalaho ka yini u lava ku tiva nhlayo ya vona ke, we n'wini wanga? Xana mhaka leyi a yi nga dyohisi Vaisraele xana?” ₄Kambe hosi Davhida a hlula Yowabu hi ku vulavula, kutani Yowabu a suka a famba, a rhendzeleka etikweni hinkwaro ra Israele, a tlhela a vuya eYerusalema, ₅a ya vikela Davhida entsengo wa vavanuna lava va nga hlomaka matlhari: Etikweni ra Israele, a va ri 1 100 000, kasi etikweni ra Yuda a va ri 470 000. ₆Kambe va ka Levhi ni va ka Benjamini a va nga hlayiwanga, hikuva Yowabu a a nga twanani na ku lerisa loku ka hosi Davhida.

₇Xikwembu na xona a xi nga yi tsakeli mhaka leyi, kutani xi ba Vaisraele hikwalaho ka swona. ₈Kutani Davhida a ku ka Xikwembu: “Ndzi dyohile ngopfu eka leswi ndzi swi endleke. Kambe sweswi, mina nandza wa wena, ndzi kombela leswaku u ndzi rivalela nandzu wa mina, hikuva leswi ndzi swi endleke i vuphukuphuku lebyikulu!” ₉Kavaloko HOSI Xikwembu xi vulavula na muprofeta Gadi, mavonakule wa Davhida, xi ku: ₁₀“Yana u ya byela Davhida leswaku mina HOSI ndzi lava ku n'wi vangela swilo swinharhu; a a hlawule xin'we eka swona, lexi ndzi nga ta n'wi ba ha xona!” ₁₁Hiloko Gadi a ya eka Davhida, a fika a n'wi vikela rito ra HOSI Xikwembu, a ku ka yena: “Hlawula eka leswi swinharhu: ₁₂Malembe manharhu ya ndlala; kumbe ku hlongoriwa hi valala va wena va ku hlasela tin'hweti tinharhu; kumbe ku wela hi ntungu wa masiku manharhu, wu va wona nkhavi lowu HOSI Xikwembu xi ku baka ha wona, ntsumi ya xona yi ri karhi yi herisa vanhu etikweni hinkwaro ra Israele. Sweswi, ndzi nyike nhlamulo leyi ndzi nga ta tlhela na yona eka loyi a ndzi rhumeke!” ₁₃Davhida a hlamula Gadi a ku: “Ndzi le khombyeni lerikulu! Swa antswa loko ndzi wela emavokweni ya HOSI Xikwembu, hikuva tintswalo ta xona i tikulu swinene; ndzi nga tshuki ndzi wela emavokweni ya vanhu!”

₁₄Kutani HOSI Xikwembu xi rhumela ntungu etikweni ra Israele, ku fa vavanuna va 70 000. ₁₅HOSI Xikwembu xi tlhela xi rhumela ntsumi ku ya herisa muti wa Yerusalema. Kambe loko ntsumi yi ri karhi yi endlisa sweswo, HOSI Xikwembu xi swi vona, kutani xi yimisa ntungu lowu wo chavisa, xi byela ntsumi xi ku: “Yima, swi ringene!” Enkarhini lowu, ntsumi ya HOSI Xikwembu a yi yimile kusuhi ni xivuya xa muti wa Orinani lowa Muyebusi. ₁₆Kuteloko Davhida a languta ehenhla, a vona ntsumi ya HOSI Xikwembu yi yimile exikarhi ka tilo ni misava, yi khomile fumu yi ri kongomisa eYerusalema. Hiloko Davhida ni vakulukumba va yena va ambala swiambalo swo khwaxa swa nkosi, va wela hansi hi mimombo. ₁₇Kutani Davhida a ku ka Xikwembu: “Hi mina ndzi leriseke leswaku vanhu va hlayiwa; xidyoho lexi i xa mina, ndzi endlile leswo biha ngopfu. Kambe vambuyangwana lava, vona va onhile yini xana? We HOSI Xikwembu xanga, ndzi kombela leswaku u ba mina ni vandyangu wa mina, kutani u susa ntungu exikarhi ka vanhu va wena.”

₁₈Ntsumi ya HOSI Xikwembu yi vulavula hi nomo wa Gadi, yi lerisa Davhida ku ya akela Xikwembu alitari exivuyeni xa Orinani lowa Muyebusi. ₁₉Davhida a tlhandluka hilaha Gadi a n'wi byeleke hakona hi ku lerisiwa hi HOSI Xikwembu. ₂₀Enkarhini wolowo, Orinani ni vana va yena va mune a va ri eku huleni ka mavele; loko Orinani a hundzuluka, a vona ntsumi, vana va yena vona va tsutsuma va ya tumbela. ₂₁Loko hosi Davhida a ri karhi a tlhandluka, Orinani a n'wi vona na yena, kutani a suka exivuyeni a ya hlanganisa Davhida, a n'wi nkhinsamela mombo wa yena wu ko wu khumba hansi. ₂₂Davhida a ku ka Orinani: “Ndzi nyike ndhawu leyi yi nga ni xivuya xa wena, leswaku ndzi ta aka kona alitari ya HOSI Xikwembu; ndhawu ya kona, ndzi ta yi xava hi nxavo lowu heleleke, ndzi endlela ku yimisa ntungu lowu wu hetaka vanhu va mina.” ₂₃Orinani a ku ka Davhida: “We hosi n'wini wanga, xi teke xivuya lexi, u endla leswi u swi tsakelaka. Vona, tihomu to endla ha tona magandzelo lama hisiwaka, hi leti; swileyi swo hula ha swona swi ta endla tihunyi; ndzi humesa ni mapa ya magandzelo ya xinakulobye. Ndzi ku nyika leswi hinkwaswo.” ₂₄Kambe hosi Davhida a hlamula Orinani a ku: “E-e! Swilo leswi ndzi ta swi xava hi nxavo lowu heleleke. Ndzi nga ka ndzi nga ku tekeli leswi swi nga swa wena ndzi ya swi nyika HOSI Xikwembu. Naswona a ndzi nga xi humeseli magandzelo lama hisiwaka hi swilo leswi ndzi nga lo nyikiwa kunene.” ₂₅Kutani Davhida a hakela Orinani nsuku wa 7 200 kg, a xava ha wona ndhawu ya xivuya. ₂₆Kutani a akela HOSI Xikwembu alitari kona, a xi humesela magandzelo lama hisiwaka ni ya xinakulobye, a khongela HOSI Xikwembu, xona xi n'wi hlamula hi ndzilo lowu humaka etilweni, wu wela ehenhla ka alitari wu hisa magandzelo ya kona. ₂₇Kutani hi ku lerisiwa hi HOSI Xikwembu, ntsumi yi tlherisela fumu ra yona enkotlotweni.

₂₈Loko Davhida a vona leswaku HOSI Xikwembu xi hlamurile xikhongelo xa yena exivuyeni xa Orinani lowa Muyebusi, a hamba a xi humesela magandzelo kona. ₂₉Enkarhini wolowo, Ntsonga wa HOSI Xikwembu lowu endliweke hi Muxe le mananga, ni alitari ya magandzelo lama hisiwaka, a swi ri exitsungeni xa le Gibiyoni, ₃₀kambe Davhida a a nga ha swi koti ku ya kona a ya vutisa timhaka eka Xikwembu, hikuva a a chava fumu ra ntsumi ya HOSI Xikwembu.