I Tikronika 22

₁Hiloko Davhida a ku: “Yindlu ya HOSI Xikwembu yi ta va kwala; na yona alitari ya magandzelo lama hisiwaka, lama humesiwaka hi vito ra Vaisraele, yi ta va kwala.”

₂Davhida a lerisa leswaku valuveri lava nga tikweni ra Israele va hlengeletiwa, a hlawula lava tivaka ku vatla maribye, a va rhwexa ntirho wa ku lulamisa maribye lama nga ta aka Tempele. ₃Davhida a hlengeleta nsimbhi leyo tala ya ku endla swipikiri swo belela timbanti, ni ya ku endla swo manyisa marimba ha swona; Davhida a hlengeleta ni koporo yo tala ku tlula mpimo, ₄ni timhandze ta kedari ta ntsandza-vahlayi, a hlawula eka timhandze leti va le Tiri ni va le Sidoni a va n'wi tiserile tona hi xitalo. ₅Davhida a a ku: “N'wana wa mina Solomoni wa ha ri ntsongo, a nga si tiva swo tala. Kasi yindlu leyi yi nga ta akeriwa HOSI Xikwembu, yi fanele ku va leyikulu swinene, yi va ni ku twala, yi tiveka emisaveni hinkwayo; kutani mina ndzo fanela ku hlengeleta hi vutswatsi swilo leswi swi nga ta yi aka.” Hikokwalaho Davhida ú hlengeletile swilo leswo tala ngopfu swo aka ha swona, a nga si fa.

₆Kutani Davhida a vitana Solomoni n'wana wa yena, a n'wi lerisa ku akela HOSI Xikwembu xa Israele eTempele, ₇a ku ka yena: “N'wananga, a ndzi ri ni makungu ya ku aka Tempele, ndzi dzunisa HOSI Xikwembu xa mina ha yona. ₈Kambe HOSI Xikwembu xi vulavurile na mina xi ku: ‘U halatile ngati yo tala, u tlhela a lwa tinyimpi letikulu; hikokwalaho a hi wena loyi a nga ta ndzi akela Tempele ni ku ndzi dzunisa ha yona; ngati leyi u yi halateke laha misaveni, yi tele ngopfu. ₉Kambe u ta kuma n'wana wa xinuna la nga ta va munhu wa ndzhuti, wa ku rhula. Vaaki va matiko lama vandzakaneke na yena a va nga ha n'wi pfuki; ú ta thyiwa vito ra Solomoni (hileswaku “la rhuleke”). Enkarhini wa ku fuma ka yena, ndzi ta nyika Vaisraele ku rhula ni ku tshamiseka. ₁₀Hi yena loyi a nga ta ndzi akela Tempele. Ú ta va n'wana eka mina, na mina ndzi va tatana eka yena. Ndzi ta tiyisa vuhosi bya yena exikarhi ka Vaisraele hilaha ku nga heriki.’ ”

₁₁Davhida a engeta a ku ka Solomoni: “Sweswi we n'wananga, HOSI Xikwembu xa wena a xi ve na wena, leswaku u kateka entirhweni wa wena wa ku aka Tempele ya xona; minkateko ya kona, xi ku tshembisile yona. ₁₂Kambe ngopfu ngopfu ndzi navela leswaku HOSI Xikwembu xa wena xi ku nyika miehleketo ni ku twisisa, leswaku loko xi ku veka ku fuma Vaisraele, u kota ku hlayisa Nawu wa xona. ₁₃U ta humelela ntsena loko u hlayisa milawu ni swiletelo leswi HOSI Xikwembu xi swi leriseke Muxe, swi nga leswi yena a swi dyondziseke Vaisraele. Tiya, u komba vunhenha bya wena; u nga tshuki u hela mbilu, u nga chavi. ₁₄Ndzi tikarhatile swinene ku hlengeleta swo aka Tempele ya HOSI Xikwembu ha swona, swi nga leswi: Nsuku wa tithani ta 4 100, ni silivhere ya tithani ta 41 000, ni koporo ni nsimbhi leyi nga pimekiki hi ku tala ka yona; timhandze ni maribye na swona ndzi swi hlengeletile, kambe wena wa ha ta engetela eka leswi hinkwaswo.

₁₅“Naswona, u ni vavanuna lavo tala lava tivaka ntirho, va nga vaaki, ni vavatli va maribye, ni vavatli va timhandze, ni van'wana lavo tala lava kotaka ku tirha ₁₆hi nsuku, ni silivhere, ni koporo, ni nsimbhi. Sweswi famba u ya tirha. HOSI a yi ve na wena!”

₁₇Davhida a lerisa varhangeri hinkwavo va Israele ku pfuna Solomoni n'wana wa yena, a ku ka vona: ₁₈“Xana HOSI Xikwembu xa n'wina a xi yimi na n'wina ke? A xi mi nyikanga ku rhula hi matlhelo hinkwawo xana? Vanhu lava khale a va akile etikweni leri, xi va nyiketile emavokweni ya mina; kutani va le hansi ka HOSI Xikwembu ni vanhu va xona. ₁₉Sweswi lavani HOSI Xikwembu xa n'wina hi mbilu ni moya; tinyiketeni mi aka Tempele leyo hlawuleka leyi yi nga ta dzunisa HOSI Xikwembu, mi nghenisa ka yona Areka ya Ntwanano wa xona, ni swibya swa xona leswo hlawuleka.”