I Samiele 15

₁Samiele a ku ka Sawulo: “HOSI Xikwembu xi ndzi rhumile ku ta ku chela mafurha enhlokweni leswaku u va hosi ya vanhu va xona va Israele, kutani sweswi, yingisa marito lawa HOSI Xikwembu xi ku byelaka wona. ₂HOSI ya matimba hinkwawo yi vurisa sweswo yi ri: ‘Ndzi ta ba Vaamaleke, hikuva va xanisile Vaisraele hi ku va sivela ndlela, loko va huma etikweni ra Egipta.’ ₃Kutani sweswi, famba u ya hlasela Vaamaleke, u herisa hinkwaswo leswi va nga na swona, swi ku bì! U nga va tsetseleli, kambe u dlaya vavanuna hinkwavo ni vavasati; hambi va ri vana kumbe swihlangi swa le makatleni, hambi ti ri tihomu kumbe tinyimpfu, hambi ti ri tikamela kumbe timbhongolo, dlaya hinkwaswo!”

₄Kutani Sawulo a vitana vanhu, a va xaxameta emahlweni ka yena emutini wa Telayimi. A ku ri ni masocha ya 200 000 lama a ma famba hi milenge, ni vavanuna va Yuda va 10 000. ₅Sawulo ni masocha ya yena va ya tumbelela Vaamaleke exinkobyaneni lexi nga kusuhi ni muti wa vona. ₆Kutani Sawulo a tivisa Vakeni, a ku: “Sukani mi famba, mi huma exikarhi ka Vaamaleke, leswaku ndzi ta ka ndzi nga mi katsi na vona loko ndzi va herisa, hikuva mi kombisile ku tshembeka ka n'wina eka Vaisraele hinkwavo, nkarhi lowu va humaka etikweni ra Egipta.” Kutani Vakeni va huma exikarhi ka Vaamaleke. ₇Sawulo a hlula Vaamaleke, ku suka eHavhila, ku ya fika emutini wa Xuru lowu vandzakaneke na Egipta. ₈A herisa Vaamaleke hinkwavo va ku bi, a siya ntsena hosi ya vona Agaga, loyi a n'wi khomeke a ha hanya. ₉Kutani Sawulo ni vanhu va yena va tsetselela Agaga, va siya tinyimpfu ni tihomu leto saseka, ni swifuwo leswi noneke, ni swinyimpfana, ni hinkwaswo leswinene, va nga lavi ku swi herisa; kambe swilo hinkwaswo leswi nga pfuniki nchumu, ni leswi nga riki na risima, va swi herisa.

₁₀Samiele a twa rito ra HOSI Xikwembu, leri nge: ₁₁“Ndza tilaya loko ndzi vekile Sawulo a va hosi, hikuva ú tshikile ku ndzi landza, a nga endlanga ku lerisa ka mina.” Samiele a tlhaveka ngopfu, a rila emahlweni ka HOSI Xikwembu vusiku hinkwabyo. ₁₂Kutani a vindzuka ni mixo ku ya hlangana na Sawulo, kambe loko a fika, vanhu va n'wi byela va ku: “Sawulo ú yile eKarmele a ya tidzimela ribye ra xitsundzuxo, kutani ú hundzerile emahlweni a rhelela a ya eGiligala.” ₁₃Samiele a fika eka Sawulo kwale Giligala, kutani Sawulo a ku ka yena: “HOSI Xikwembu a xi ku katekise! Ndzi endlile ku lerisa ka HOSI Xikwembu.” ₁₄Samiele a vutisa a ku: “Loko swi ri tano, xana ku rila loku ndzi ku twaka, a hi ka tinyimpfu ni tihomu xana?” ₁₅Sawulo a hlamula a ku: “Vanhu va mina va vuyile na swona hi le ka Vaamaleke; va hlayisile tinyimpfu ni tihomu leto saseka, leswaku va ta humesela HOSI Xikwembu xa wena egandzelo; kambe leswin'wana hinkwaswo, hi swi herisile, swi ku bì!” ₁₆Kutani Samiele a ku ka Sawulo: “Miyela! Ndzi ta ku tivisa leswi HOSI Xikwembu xi ndzi byeleke swona vusiku bya namuntlha.” Sawulo a hlamula a ku: “Vulavula!”

₁₇Kutani Samiele a ku: “Hambileswi u tivonaka u ri munhu ntsena, xana a hi wena mufambisi wa tinyimba ta Israele, xana? HOSI Xikwembu xi vekile wena ku va hosi ya Israele, hi ku ku chela mafurha enhlokweni. ₁₈Ku lerisa ka HOSI Xikwembu loko xi ku rhuma, a ku ri leswaku u ya herisa vadyohi lava va ka Amaleke, u va hlasela va kondza va heriseriwa makumu. ₁₉Hikwalaho ka yini u nga yingisanga ku lerisa ka HOSI Xikwembu xana? Hikwalaho ka yini u tsutsumele ku phangha swilo u vuya na swona, kutani u endla leswi biheke emahlweni ka HOSI Xikwembu, xana?” ₂₀Kambe Sawulo a hlamula Samiele a ku: “Ndzi yingisile ku lerisa ka HOSI Xikwembu; ndzi yile ndzi ya endla hilaha xi ndzi leriseke hakona. Ndzi vuyile na Agaga hosi ya le Amaleke, kambe vona Vaamaleke, ndzi va herisele makumu. ₂₁Hakunene vanhu va phanghile tihomu ni tinyimpfu, ni swin'wana swa risima exikarhi ka leswi a swi fanele ku herisiwa, kambe va endlela ku ta humesa gandzelo emahlweni ka HOSI Xikwembu xa wena la Giligala.” ₂₂Samiele a hlamula a ku:

₂₄Kavaloko Sawulo a tisola ka Samiele, a ku: “Ndzi dyohile, hikuva ndzi tlurile xileriso xa HOSI Xikwembu ni marito ya wena, hikwalaho ka ku yingisa marito ya vanhu, ndzi va chava. ₂₅Sweswi ke, ndza kombela, ndzi rivalele ku dyoha ka mina, hi tlhela hi vuyelelana, ndzi ta kota ku ya gandzela HOSI Xikwembu.” ₂₆Kambe Samiele a ku ka Sawulo: “Hi nga ka hi nga vuyelelani, hikuva u tshikile rito ra HOSI Xikwembu, kutani na xona xi ku tshikile, leswaku u nga ha vi hosi ya Israele.” ₂₇Loko Samiele a hundzuluka a lava ku famba, Sawulo a n'wi khoma hi xiambalo ya yena, kutani xi handzuka. ₂₈Kutani Samiele a ku ka yena: “Namuntlha, HOSI Xikwembu xi handzurile vuhosi bya Israele emavokweni ya wena, xi byi nyikile un'wana wa varikwenu, la lulameke ku tlula wena. ₂₉Naswona, Xikwembu lexi Vaisraele va tidzunisaka ha xona, a xi hembi, a xi tlheli emakungwini ya xona. A xi fani na vanhu, xona a xi tlheli!” ₃₀Kutani Sawulo a engeta a ku: “Ndzi dyohile! Hambiswiritano, ndzi xixime emahlweni ka vakulukumba va tiko ra mina, ni le mahlweni ka Vaisraele; a hi tlhele hi vuyelelana, leswaku ndzi ta kota ku ya gandzela HOSI, Xikwembu xa wena.” ₃₁Kavaloko Samiele a pfumela ku famba na Sawulo, kutani Sawulo a ya gandzela HOSI Xikwembu.

₃₂Kutani Samiele a lerisa a ku: “Tisani Agaga hosi ya Vaamaleke haleno ka mina.” Agaga a ya a tsakile, a anakanya leswaku ú ponile rifu ni ku bava ka rona. ₃₃Kambe Samiele a ku ka yena: “Banga ra wena ri tekerile vavasati lavo tala evana va vona. Namuntlha, mana wa wena ú tekeriwa n'wana wa yena, ku fana na vona.” Kavaloko Samiele a khavangela Agaga eGiligala a fa, emahlweni ka HOSI Xikwembu.

₃₄Kutani Samiele a ya eRhama. Sawulo yena a tlhandlukela ekaya ka yena eGibeya. ₃₅Samiele ú kale a fa a nga ha vonananga na Sawulo, kambe xiviti xa yena xa ku rila Sawulo a xi helanga. HOSI Xikwembu xona a xi vaviseka hileswi xi vekeke Sawulo ku va hosi ya Israele.