I Samiele 5

₁Vafilista va tekile Areka ya Xikwembu le Ebenezere, va ya na yona emutini wa Axidodo. ₂Kutani va fika va yi nghenisa etempeleni ya Dagona xikwembu xa vona, va yi veka kusuhi ni xifaniso xa Dagona wa kona. ₃Hi siku leri tlhandlamaka, loko vaaki va Axidodo va pfuka nimpundzu, va kuma leswaku Dagona ú wele ehansi hi mombo, emahlweni ka Areka ya HOSI. Kutani va n'wi pfuxa, va n'wi tlherisela evutshan'wini bya yena. ₄Kambe loko va pfuka nimpundzu hi siku leri tlhandlamaka, va kuma leswaku Dagona ú tlhele a wela ehansi hi mombo emahlweni ka Areka ya HOSI. Nhloko ya yena ni mavoko ya yena ha mambirhi swi tsemekile, swi wele enyangweni ya tempele, Dagona a sala ni miri wa yena ntsena. ₅(Hi swona leswi endlaka leswaku, ku fikela siku ra namuntlha, vaprista va Dagona ni hinkwavo lava nghenaka tempeleni ya yena le Axidodo, va nga kandziyi xihukuva, kambe va tlula kunene.)

₆HOSI Xikwembu xi ba vaaki va Axidodo hi nkhavi lowukulu, xi va xanisa ni ku va vangela vuvabyi bya matshumba, lebyi khomeke Vaaxidodo swin'we ni vaakelani va vona. ₇Loko vavanuna va Axidodo va vona leswi humelelaka, va ku: “Areka ya Xikwembu xa Vaisraele yi nga tshuki yi tshama ka hina, hikuva Xikwembu xa vona xa hi ba hi nkhavi lowukulu, hina ni xikwembu xa hina Dagona.” ₈Kavaloko va rhumela rito eka tihosi ta Vafilista, ti endla nhlengeletano na vona, kutani va ti vutisa va ku: “Xana hi ta endla yini hi Areka ya Xikwembu xa Israele xana?” Tihosi ti hlamula ti ku: “Areka ya Xikwembu xa Israele a yi hundziseriwe emutini wa Gati.” Kutani va endlisa sweswo. ₉Kambe loko va yi hundziserile kona, HOSI yi ba muti wolowo, yi wu chavisa swinene, yi xanisa vaaki, hinkwavo va huma matshumba, lavakulu ni lavatsongo. ₁₀Kavaloko va rhumela Areka ya Xikwembu emutini wa Ekroni. Kambe loko Areka ya Xikwembu yi fika le Ekroni, vaaki va kona va huwelela va ku: “Va tisile Areka ya Xikwembu xa Israele eka hina leswaku yi ta hi heta, hina ni va ka hina.” ₁₁Kutani va rhumela rito eka tihosi ta Vafilista, tona ti endla nhlengeletano na vona, kutani va ku ka tona: “Tlheriselani Areka ya Xikwembu ekaya ka yona, yi ta ka yi nga ha hi heti, hina ni vanhu va ka hina.” Muti hinkwawo a wu khomiwile hi ku chava lokukulu, wu chava ku fa, hikuva HOSI Xikwembu a xi ba vanhu va kona hi nkhavi lowukulu. ₁₂Lava a va ponile ku fa, a va huma matshumba, kutani xirilo xa muti a xi twala ni le matilweni.