Ta hosi Hezekiya, loko a susa swa manyala eTempeleni
1Hezekiya a a ri ni malembe ya 25 loko a sungula ku fuma, kutani a fuma malembe ya 29 a ri eYerusalema. Mana wa yena a a ri Abiya N'wa-Zakariya. 2A endla leswi lulameke emahlweni ka HOSI Xikwembu, a fana ni kokwa wa yena Davhida emintirhweni ya yena hinkwayo.
3Hi n'hweti yo sungula ya lembe ro sungula ra ku fuma ka yena, Hezekiya a pfalula timbanti ta Tempele, a ti pfuxeta. 4A vitana vaprista ni Valevhi, a va hlengeleta erivaleni leri nga vuxeni bya muti, 5kutani a ku ka vona: “N'wina va ka Levhi, yingisani swinene! Mi fanele ku tibasisa, mi basisa ni yindlu ya HOSI, Xikwembu xa vatata wa n'wina, mi susa swilo swa manyala leswi nga xivandleni xa yona lexo hlawuleka. 6Hakunene, vatata wa hina a va nga tshembeki: Va endlile leswo homboloka emahlweni ka HOSI Xikwembu xa hina, va xi tshika, va nga ha tsakeli vutshamo bya xona lebyi, va byi fularhela. 7Va pfarile timbanti erikupakupeni ra Tempele, va tima ni timboni endzeni ka yona, va tshika ku humesa eka yona mirhi ya risuna, va humesela Xikwembu xa Israele. 8Hikokwalaho, HOSI Xikwembu xi hlundzukerile va ka Yuda ni vaaki va Yerusalema, xi va hundzula xikombiso lexo biha, va tshama emarhumbini layo chavisa, vanhu va va hlakahlela tinhloko va va monya, hilaha mi swi vonaka hakona n'wina hi n'wexe. 9Kutani vatata wa hina va dlayiwile etinyimpini, vana va hina va xinuna ni va xisati va yisiwile evukhumbini, swin'we ni vasati va hina. 10Sweswi ndzi ehleketa ku pfuxa ntwanano exikarhi ka hina na HOSI, Xikwembu xa Israele, leswaku ku hlundzuka ka xona ku vohla ku nga hi lovisi. 11Kutani ke, n'wina vanakulorhi, pfukani mi nga lolohi, hikuva hi n'wina Valevhi lava HOSI Xikwembu xi mi hlawuleke ku ya yima emahlweni ka xona, mi va malandza ya xona, mi xi gandzela ni ku xi humesela mirhi ya risuna.”
12-14Valevhi lava nga tinyiketa entirhweni hi lava, hi mindyangu ya vona:
Va ka Kohata: Mahata n'wana Amasayi, na Yuwele n'wana Azariya;
va ka Merari: Kixi n'wana Abidi, na Azariya n'wana Yehaleleli;
va ka Gerixoni: Yowa n'wana Zima, na Edeni n'wana Yowa;
va ka Elisafani: Ximri, na Yuwele;
va ka Asafa: Zakariya, na Mataniya;
va ka Hemani: Yehuwele, na Ximeyi;
va ka Yedutuni: Xemaya, na Uziele.
15Vavanuna lava va rhamba Valevhi-kulobye, kutani loko va tibasisile, va ya eTempeleni ku ya yi basisa, hilaha hosi Hezekiya a va leriseke hakona endzhaku ka loko HOSI Xikwembu xi vulavurile na yena. 16Vaprista va nghena exivandleni lexo hlawuleka xa Tempele leswaku va ta xi basisa; kutani va teka swilo hinkwaswo swa manyala leswi va swi kumaka kona, va swi humesela ehandle exivaveni xa Tempele, kutani Valevhi va swi teka va ya swi cukumeta enkoveni wa Kedroni ehandle ka muti. 17Va nghena entirhweni lowu hi siku ro sungula ra n'hweti yo sungula, kutani va heta masiku ya 8 va ri karhi va basisa yindlu ya Tempele, ku katsa ni rikupakupa ra yona; kutani va tirha masiku ya 8 nakambe ku basisa xivandla hinkwaxo xa Tempele, va heta hinkwaswo hi siku ra vu-16 ra n'hweti yo sungula. 18Kavaloko va ya vikela hosi Hezekiya le ntsindza, va ku: “Ndhabezitha, hi basisile Tempele hinkwayo; na yona alitari ya magandzelo lama hisiwaka ni swigotso swa yona hinkwaswo, hi swi basisile; hi basisile ni tafula ra swinkwa leswo hlawuleka ni swigotso swa rona hinkwaswo. 19Hi lulamisile swingolongondzwana hinkwaswo leswi hosi Akazi a a swi cukumetile loko a ha fuma hi tindlela ta yena to ka ti nga tshembeki; hi tlhele hi basisa swingolongondzwana swa kona, kutani hi swi vekile hinkwaswo emahlweni ka alitari ya HOSI Xikwembu.”
20Hiloko hosi Hezekiya a vindzuka, a vitana varhangeri va muti, kutani a tlhandlukela na vona endlwini ya HOSI Xikwembu. 21A va ri ni tinkuzi ta 7, ni tinyimpfu ta makhuna ta 7, ni swinyimpfana swa 7, ni timbuti ta swiphongho ta 7, va tilulamiserile ku humesa magandzelo yo basisa Tempele ni mhamba yo susa swidyoho swa vanhu va le ntsindza ni swa tiko hinkwaro. Kutani va fika va lerisa vaprista va ndyangu wa ka Aroni leswaku va tlhava swifuwo leswi, va humesa ha swona magandzelo alitarini ya HOSI Xikwembu. 22Ku rhanga tinkuzi ti tlhaviwa, vaprista va teka ngati ya tona va xuva alitari ha yona. Va endlisa sweswo hi tinyimpfu ni swinyimpfana, va swi tlhava, va xuva alitari hi ngati ya swona. 23Kutani eku heteleleni, ku tisiwa timbuti ta mhamba yo susa swidyoho, ti yimisiwa emahlweni ka hosi Hezekiya ni nhlengeletano hinkwayo, kutani vanhu hinkwavo va tlhandleka mavoko ya vona etinhlokweni ta tona. 24Kavaloko vaprista va ti tlhava, va chela ngati ya tona ehenhla ka alitari, yi va mhamba yo susa swidyoho swa Vaisraele hinkwavo, hilaha hosi Hezekiya a a lerisile hakona, loko a te: “Magandzelo lama hisiwaka ni mhamba yo susa swidyoho swi ta endleriwa Vaisraele hinkwavo!”
25Kutani Hezekiya a endla leswi HOSI Xikwembu xi swi leriseke hosi Davhida hi milomo ya vaprofeta va xona, a nga Gati mavonakule wa le ntsindza, na muprofeta Natani: A veka Valevhi eTempeleni, va tamele swiphambati swa nsimbhi ni tiharipa ni switende, 26swi nga swichaya-chayani leswi a swi ri na Davhida; vaprista na vona va byeriwa ku yima va tamele tinanga. 27Hezekiya a lerisa leswaku ntirho wa ku hisa magandzelo alitarini wu sunguriwa; kutani swi va tano, ku sumiwa ni tinsimu to dzunisa HOSI Xikwembu, tinanga ti chayiwa, ku chayiwa ni swichaya-chayani swin'wana swa Davhida hosi ya Israele. 28Loko tinsimu ti ri karhi ti yimbeleriwa ni loko tinanga ti chayiwa, nhlengeletano hinkwayo yi korhamela hansi, ntirho wa magandzelo lama hisiwaka wu kondza wu hela. 29Loko wu herile, na yena Hezekiya ni va le ntsindza hinkwavo va nkhinsama hi matsolo va gandzela. 30Kutani hosi Hezekiya ni varhangeri va tiko va lerisa Valevhi ku ya emahlweni va dzunisa HOSI Xikwembu hi tinsimu leti qambiweke hi Davhida na Asafa mavonakule. Valevhi va endlisa sweswo, va yimbelela va tsakile ngopfu, va pfa va korhamela hansi, va gandzela na vona.
31Kutani Hezekiya a ku ka ntshungu: “Hinkwenu mi tile haleno mi tamerile xo gandzela HOSI Xikwembu ha xona; hi wona nkarhi wa ku tshinela kusuhi na xona, mi xi humesela magandzelo ya n'wina ya ku nkhensa kwala ndlwini ya xona!” Kutani vanhu hinkwavo va ta ni swifuwo swa magandzelo ya vona ya ku nkhensa; van'wana lava titwaka, va humesa ni swifuwo swa magandzelo lama hisiwaka, 32swi nga leswi: Tinkuzi ta 70, ni tinyimpfu ta 100, ni swinyimpfana swa 200, hinkwaswo swi humeseriwa HOSI Xikwembu hi magandzelo lama hisiwaka. 33Kasi swifuwo swa magandzelo laman'wana swona a swi ri tinkuzi ta 600 ni tinyimpfu ta 3 000. 34Vaprista a va nga talanga, kutani a va nga koti ku yevula swifuwo leswi hinkwaswo swa magandzelo va ri voxe; kutani va kombela va ka Levhi ku va pfuna, ntirho wu kondza wu hela. Ntsengo wa vaprista a wu ri hansi, hikuva a va hlwerile ku tibasisa; kasi Valevhi vona a va twisisile mhaka leyi ya ku tibasisa ku tlula vaprista. 35Mintirho yin'wana ya siku rero, ehandle ka ntirho lowukulu wa magandzelo lama hisiwaka, yi vile ya ku hisa mafurha ya magandzelo ya xinakulobye, ni ya ku chela swakunwa swa magandzelo alitarini.
Hi ndlela leyi, ntirho wa vugandzeri bya le Tempeleni, wu simekiwa hi vuntshwa. 36Kutani Hezekiya ni vaaki hinkwavo va tiko va tsaka swinene, hikuva HOSI Xikwembu a xi va tiyisile, va kota ku hatla va heta mintirho leyi hinkwayo.
