II Vakorinto 13

₁Sweswi ndzi ta ra vunharhu eka n'wina. Mhaka yin'wana ni yin'wana yi ta tiyisiwa hi milomu ya timbhoni timbirhi kumbe tinharhu. ₂Loko ndzi mi endzerile ra vumbirhi, nisweswi hambiloko ndzi ri kule na n'wina, ndzi tsundzuxile lava dyoheke khale, ni lavan'wana hinkwavo, kutani ndza ha va tsundzuxa: Loko ndzi tlhela ndzi ta, a ndzi nga va tsetseleli, ₃leswi mi lavaka xikombiso xa leswaku Kriste ú vulavula ha mina. Yena a nga tsananga loko a tirha exikarhi ka n'wina, matimba ya yena ma tirha exikarhi ka n'wina. ₄A a tsanile loko a vambiwa exihambanweni, kambe sweswi, hi matimba ya Xikwembu, wa hanya. Na hina, ha tsana swin'we na yena, kambe matimba ya Xikwembu ma ta hi nyika vutomi bya yena, leswaku hi kota ku tirha exikarhi ka n'wina.

₅Yanani emahlweni mi tikamba, ku vona loko ma ha ri eku pfumeleni. Tianakanyeni! Xana a mi swi voni leswaku Yesu Kriste ú le ka n'wina xana? Nkarhi wun'wana, mi nga tsa ndzeka ku tianakanya! ₆Loko hi ri hina, ndza tshemba leswaku mi ta swi vona: A hi tsandzekanga!

₇Hi khongela Xikwembu leswaku mi nga endli xo biha ni xin'we; xikongomelo, a hi ku komba leswaku hina ha swi kota sweswo, kambe i ku komba leswaku n'wina ma swi kota, hambiloko hina hi nga vonaka hi ri vatsandzeki. ₈Hakunene hi nga ka hi nga lwi ni ntiyiso, kambe hi ta yima entiyisweni. ₉Hi tsakile loko hi tsanile, ni loko n'wina mi tiyile; kutani leswi hi swi kombelaka, hileswaku n'wina mi va lava hetisekeke. ₁₀Leswi endlaka leswaku ndzi tsala timhaka leti ndzi nga si ta le ka n'wina, hileswaku siku ndzi fikaka ndzi nga tshuki ndzi tirha na n'wina hi ku nonon'hwa, hi matimba lawa Hosi yi ndzi nyikeke wona. Hosi yi ndzi nyikile wona ku akisa, ku nga ri ku hahlula.

₁₁Sweswi ke, vamakwerhu, ndzi ri: Salani! Ringetani ku hetiseka; amukelani ku tsundzuxa ka mina; mi va ni ku anakanya kun'we; mi hanya hi ku rhula; kutani Xikwembu xa rirhandzu ni xa ku rhula xi ta va na n'wina.

₁₂Xewetanani hi ku ntswontswana ka vukwavo. Vahlawuriwa va Xikwembu hinkwavo va mi rhungula.

₁₃Tintswalo ta Hosi Yesu Kriste, ni rirhandzu ra Xikwembu, ni ku hlangana kun'we ni Moya lowo Kwetsima, a swi ve na n'wina hinkwenu!