Ta Yosiyasi loko a pfuxa ntwanano na Xikwembu
1Endzhaku ka sweswo, hosi Yosiyasi a vitana vakulukumba hinkwavo va Yuda ni va Yerusalema, kutani va hlengeletana ehubyeni ya yena. 2Kutani a tlhandlukela endlwini ya HOSI Xikwembu, a ri ni vavanuna hinkwavo va Yuda, ni vaaki hinkwavo va Yerusalema, ni vaprista, ni vaprofeta, ni vanhu hinkwavo va tiko, lavakulu ni lavatsongo. Yosiyasi a va hlayela marito hinkwawo ya “Buku ya Ntwanano” leyi kumiweke endlwini ya HOSI Xikwembu, 3a hlaya a yimile kusuhi ni phuphu; kutani a pfuxa ntwanano na HOSI Xikwembu; a tiboha ku xi landza, ni ku hlayisa swileriso, ni switsundzuxo, ni milawu ya xona, hi mbilu ya yena hinkwayo ni moya wa yena hinkwawo; a tiboha ni ku landza marito hinkwawo lama tsariweke ebukwini leyi ya Ntwanano, kutani hinkwavo vanhu va tiko na vona va tiboha ku hlayisa ntwanano lowu.
Ta Yosiyasi loko a herisa vukhongeri bya hava
4Hosi Yosiyasi a lerisa Hilkiya Muprista Lonkulu ni vaprista lavan'wana, ku katsa ni lava hlayisaka tinyangwa, a va byela ku humesa eTempeleni ya HOSI Xikwembu swingolongondzwana hinkwaswo leswi a swi endleriwile vugandzeri bya Baali, ni bya Axera xikwembukazi, ni bya dyambu ni tinyeleti. Kutani va swi rhwala swi ya handle ka muti wa Yerusalema, va ya swi hisa emasin'wini ya le Kidroni, kutani va yisa nkuma wa swona eBetele. 5Yosiyasi a hlongola vaprista va swikwembu swa hava, lava a va vekiwile hi tihosi ta Yuda leswaku va hisa mirhi ya risuna eswitsungeni leswo hlawuleka swa le mitini ya Yuda ni le matlhelweni ya Yerusalema; a hlongola ni lava hisaka mirhi ya risuna va ri karhi va gandzela Baali, ni dyambu, ni n'weti, ni Xirimela, ni tinyeleti tin'wana hinkwato. 6A humesa mhandze ya Axera xikwembukazi endlwini ya HOSI Xikwembu, a yi yisa ehandle ka muti wa Yerusalema enkoveni wa Kidroni, a yi hisela kona; a kandziyela nkuma wa yona a ya wu halata eswilahlweni swa vanhu lava nga riki tihosi. 7Yosiyasi a hindzimuxa tindlu leti a ti ri kusuhi ni Tempele, laha a ku tshama tinghwavava ta vukhongeri bya hava, ni vavasati lava rhungaka swiambalo swa Axera xikwembukazi. 8A vuyisa vaprista hinkwavo lava a va ri emitini ya Yuda, ku sukela eGeba ku fikela Berexeba; a nyamisa switsunga leswo hlawuleka leswi vaprista volavo a va hisela mirhi ya risuna eka swona, a tlhela a hindzimuxa tialitari etinyangweni ta muti wa Yerusalema; yin'wana ya tona a yi ri enyangweni ya Yoxuwa ndhunankulu ya muti, hi tlhelo ra ximatsi loko munhu a nghena emutini. 9Kambe vaprista va switsunga leswo hlawuleka a va pfumeleriwanga ku humesa magandzelo alitarini ya HOSI Xikwembu eYerusalema; va pfumeleriwile ntsena ku dya swinkwa swo-ke-comela va ri ni vaprista-kulobye.
10Yosiyasi a nyamisa ndhawu leyi vuriwaka Tofete, ya le nkoveni wa va ka Hinomu, leswaku ku nga ha vi na munhu na un'we loyi a nga ta gandzela Moloko xikwembu xa Vaamoni, hi ku hisela endhawini ya kona n'wana wa yena wa xinuna kumbe wa xisati. 11Exivaveni xa yindlu ya HOSI Xikwembu, hi le tlhelo ra nyangwa, kusuhi ni kamari ra mulanguteri Natani-Meleke, a ku ri ni tihanci leti tihosi ta Yuda a ti gandzela dyambu ha tona. Yosiyasi a ti humesa, a hisa ni makalichi ya vugandzeri lebyi bya dyambu. 12Yosiyasi a hindzimuxa tialitari ta le lwangwini ra yindlu ya xithezi ya Akazi, leti a ti akiwile hi tihosi ta Yuda, a hindzimuxa ni tialitari leti akiweke hi Manase eswivaveni swimbirhi swa yindlu ya HOSI Xikwembu, a ti fayetela kwalaho, a cukumeta maribye ya kona enkoveni wa Kidroni. 13Yosiyasi a nyamisa switsunga leswo hlawuleka leswi a swi lulamisiwile hi Solomoni hosi ya Israele; a swi ri evuxeni bya muti wa Yerusalema, edzongeni ra Ntshava ya Mitlhwari, swi lulamiseriwile vugandzeri bya ndzhukano bya Astarte, xikwembukazi xa Vasidoni, ni bya Kemoxi xikwembu xa le Mowabu, ni vugandzeri bya manyala bya Milikomo xikwembu xa Vaamori. 14A fayetela maribye ya vugandzeri bya hava, a tsemelela ni timhandze ta Axera xikwembukazi, kutani a tata ndhawu ya kona hi marhambu ya vanhu.
15Naswona, Yosiyasi a hindzimuxa alitari ya le Betele, exivandleni lexo hlawuleka lexi Yerobuwamu n'wana Nebati a a xi lulamisile, lexi a dyohiseke Vaisraele ha xona. A hindzimuxa alitari leyi ni hinkwaswo swa xitsunga xa kona, a fayetela maribye ya yona, a ma kandziyela, a hisa ni mhandze ya Axera xikwembukazi. 16Loko Yosiyasi a rhalarhala, a vona masirha le ntshaveni. A rhuma vanhu va ya teka marhambu emasirheni walawo, kutani a ma hisa alitarini; a nyamisa alitari leyi, hilaha HOSI Xikwembu xi vuleke hakona, hi nomo wa munhu wa xona loyi a a tivisile leswaku timhaka leti ti ta humelela. 17Yosiyasi a vutisa a ku: “Ribye ra sirha leri ndzi ri vonaka lahaya i ra mani xana?” Vaaki va muti va hlamula va ku: “Leri i sirha ra munhu wa Xikwembu loyi a teke hi le Yuda, a ta tivisa leswi wena wa ha ku swi endlaka sweswi, alitarini ya laha Betele.” 18Kavaloko Yosiyasi a lerisa a ku: “Sirha leri ti tshikeni, ku nga vi na munhu loyi a khumbaka marhambu lama nga endzeni ka rona.” Kutani va tshika marhambu ya munhu wa kona, va tshika ni ya un'wana loyi a teke hi le Samariya. 19Emitini hinkwayo ya tiko ra Samariya, Yosiyasi a susa swin'wana ni swin'wana leswi akiweke hi tihosi ta Israele eswitsungeni leswo hlawuleka, leswi tihosi leti ti hlundzukiseke HOSI Xikwembu ha swona. A swi herisa hilaha a heriseke hakona swa le Betele hinkwaswo. 20Naswona Yosiyasi a khoma vaprista hinkwavo va switsunga leswo hlawuleka, a va dlayela ehenhla ka tialitari ta kona, a teka ni marhambu ya vanhu a ma hisela kwalaho. Kutani a tlhelela eYerusalema.
Ta Yosiyasi ni nkhuvo wa Paseka
21Kutani hosi yi lerisa vaaki hinkwavo va tiko, yi ku: “Mi ta dya nkhuvo wa Paseka wa HOSI Xikwembu xa n'wina, hilaha swi nga tsariwa hakona ebukwini leyi ya Ntwanano.” 22Nkhuvo lowo tano wa Paseka a wu tshikiwile, wu nga ha endliwi, hi mpfhuka xa loko vaavanyisi va ha fambisa tiko ra Israele, ni loko ka ha fuma tihosi ta Israele ni ta Yuda. 23Kambe, hi lembe ra vu-18 ra ku fuma ka Yosiyasi, nkhuvo lowu wa Paseka wu endliwile eYerusalema wu endleriwa HOSI Xikwembu.
Ta mintirho yin'wana ya Yosiyasi
24Naswona, Yosiyasi a herisa lava vhumbhaka, ni lava hlahluvaka, ni swifaniso swa swikwembu swa ndyangu kumbe swa swikwembu swimbe, a herisa ni swilo swa manyala hinkwaswo leswi a swi vonaka etikweni ra Yuda ni le mutini wa Yerusalema, ku ri ku tiyisa marito ya Nawu lama tsariweke ebukwini leyi muprista Hilkiya a yi kumeke endlwini ya HOSI Xikwembu. 25Exikarhi ka tihosi leti ti n'wi rhangeleke, a ku vanga na hosi yo fana na Yosiyasi: Ú namarhele HOSI Xikwembu hi mbilu ya yena hinkwayo, ni moya wa yena hinkwawo, ni matimba ya yena hinkwawo, a ri karhi a yingisa Nawu hinkwawo wa Muxe; naswona, a ka ha vanga na hosi yin'wana yo fana na yena.
26Hambiswiritano, HOSI Xikwembu a xi tlhelanga evukarini bya xona lebyo chavisa ehenhla ka Yuda, hikwalaho ka hinkwaswo leswi Manase a xi hlundzukiseke ha swona, 27hikuva HOSI Xikwembu a xi te: “Ndzi ta susa tiko ra Yuda emahlweni ka mina, ku fana ni leswi ndzi suseke tiko ra Israele; naswona ndzi ta fularhela muti wa Yerusalema lowu ndzi wu hlawuleke, ndzi fularhela ni Tempele leyi ndzi vuleke leswaku ndzi ta gandzeriwa eka yona.”
Ta ku fa ka Yosiyasi
(II Tikr. 35:20 – 36:1)
28Kutani ke, mintirho leyin'wana ya Yosiyasi, ni hinkwaswo leswi a swi endleke, swi tsariwile eka “Buku ya Matimu” ya tihosi ta Yuda. 29Enkarhini wa Yosiyasi, Faro Neko, hosi ya le Egipta, a huma nyimpi ku ya pfuna hosi ya le Asiriya le nambyeni wa Yufrata. Hosi Yosiyasi a ringeta ku ya n'wi sivela, kambe kan'we-kan'we loko Faro Neko a n'wi vona, a n'wi tlhava, kutani Yosiyasi a fela eMigido; 30malandza ya yena ma rhwala ntsumbu wa yena hi kalichi, ma suka eMegido ma wu yisa eYerusalema, kutani a lahliwa kona esirheni ra yena. Hiloko vanhu va tiko va teka Yowahazi n'wana Yosiyasi, va n'wi chela mafurha enhlokweni, va n'wi veka evuhosini bya tata wa yena.
Ta ku fuma ka Yowahazi eYuda
31Yowahazi a a ri ni malembe ya 23 loko a sungula ku fuma, kutani a fuma tin'hweti tinharhu a ri eYerusalema. Mana wa yena a a ri Hamutala N'wa-Yeremiya wa le Libina. 32A endla leswo biha emahlweni ka HOSI Xikwembu, ku fana ni hinkwaswo leswi vakokwa wa yena va swi endleke. 33Faro Neko a boha Yowahazi hi tinketani eRibila etikweni ra Hamata, leswaku a nga ha fumi eYerusalema. Neko a sindzisa tiko ku humesa ndzuvo wa silivhere yo tika ku tlula tithani ta 4, ni wa nsuku wo tika ku tlula 40 kg.
34Kutani Faro Neko a veka Eliyakimi n'wana Yosiyasi evuhosini bya tata wa yena; a hundzuluxa vito ra yena, a n'wi thya ra Yoyakimi. Kutani a teka Yowahazi, a n'wi yisa etikweni ra Egipta, laha a nga ya fela kona. 35Loko a ri Yoyakimi, a nkhensa ku nyika Faro silivhere ni nsuku, kambe a swi kuma hi ku sindzisa vanhu va tiko leswaku va humesa xuma lexi Faro a xi lavaka. A endla hi matimba leswaku vaaki va tiko va humesa silivhere ni nsuku, un'wana ni un'wana hilaha a swi kotaka hakona, leswaku xuma xa kona xi ta nyikiwa Faro Neko.
Ta ku fuma ka Yoyakimi eYuda
36Yoyakimi a a ri ni malembe ya 25 loko a sungula ku fuma, kutani a fuma malembe ya 11 a ri eYerusalema. Mana wa yena a a ri Zebuda, N'wa-Pedaya wa le Rhuma. 37A endla leswo biha emahlweni ka HOSI Xikwembu, ku fana ni hinkwaswo leswi vakokwa wa yena va swi endleke.
