II Samiele 20

₁A ku ri ni munhu wa ka Benjamini loyi a a nga pfuni nchumu, loyi a va ku i Xeba n'wana Bikri; o tshuka a humelela le Giligala, a chaya nanga, a ku:

₂Kutani vavanuna hinkwavo va Israele va tshika ku landza Davhida, va landza Xeba n'wana Bikri. Kambe vavanuna va Yuda vona va namarhela hosi ya vona, va suka na yona eYordani, va ya eYerusalema.

₃Loko Davhida a fika ekaya ka yena eYerusalema, a teka vasati va yena lavatsongo va khume, lava a a va siyele ku hlayisa tindlu ta ntsindza, a va pfalela endlwini, a veka varindzi. Davhida a a va hlayisa, kambe a nga ha etlelanga na vona; hikokwalaho va hanyile tanihi tinoni, va kondza va fa.

₄Kutani hosi Davhida a lerisa Amasa, a ku: “Famba u ya vitana vavanuna va Yuda, va ta haleno ku nga si hela masiku manharhu, kutani na wena u va kwala.” ₅Hiloko Amasa a suka, a ya vitana vanhu va Yuda; kambe a hlwela, ku ko ku hundza nkarhi lowu a a vekeriwile wona. ₆Kutani Davhida a ku ka Abixayi: “Swi vonaka onge Xeba ú ta hi karhata ku tlula Abixalomu. Teka malandza ya mina n'wini wa wena, u famba u n'wi lava, hikuva a nga kala a kuma miti ya makhokholo, kutani a hi vangela swo karhata.” ₇Lava humeke nyimpi na Abixayi a va ri masocha ya Yowabu, ni ntlawa wa Vakereti na Vapeleti, ni tinhenha hinkwato. Va huma eYerusalema, va ya lava Xeba n'wana Bikri.

₈Loko va ri eribyeni lerikulu leri nga eGibiyoni, Amasa a humelela emahlweni ka vona. Yowabu a a ambarile swa nyimpi, a tiyimisele ku lwa, a tikhame hi vamba, a ri ni banga enkotlotweni lowu khweketiweke exisutini. Loko Yowabu a ri karhi a ta kusuhi, banga ri khwexuka. ₉Yowabu a ku ka Amasa: “Avuxeni makwerhu, u pfukile xana?” Kutani Yowabu a yisa voko ra xinene, a khoma Amasa hi malebvu wonge hi loko a lava ku n'wi ntswontswa. ₁₀Amasa a nga ri vonanga banga leri Yowabu a a ri tamerile. Kutani Yowabu a n'wi handzula khwiri, marhumbu ya Amasa ma huma ma wela hansi, kutani Amasa a fa. Yowabu a nga ha n'wi tlhavanga ra vumbirhi.

Kutani Yowabu ni makwavo Abixayi va ya emahlweni ni ku famba va lava Xeba. ₁₁Un'wana wa malandza ya Yowabu a yima kusuhi ni ntsumbu wa Amasa, a huwelela a ku: “Hinkwavo lava yimaka na Yowabu ni lava tsakelaka Davhida, a va landze Yowabu.” ₁₂Ntsumbu wa Amasa a wu sele exikarhi ka gondzo, wu tele hi ngati; munhu un'wana ni un'wana, loko a fika a wu vona, a yima; kutani loko loyi wa nandza wa Yowabu a vona leswaku vanhu hinkwavo va fika va yima, a koka ntsumbu wa Amasa a wu susa egondzweni, a wu yisa enhoveni, a wu funengeta hi nceka. ₁₃Loko ntsumbu wa Amasa wu susiwile egondzweni, vanhu hinkwavo va hundza va famba na Yowabu, va ya lava Xeba n'wana Bikri.

₁₄Xeba a rhendzeleka hi tinyimba hinkwato ta Israele, a kondza a ya fika emutini wa Avele-Beta-Maaka; kutani hinkwavo va rixaka ra ka Bikri va hlengeletana, va ya nghena emutini na yena. ₁₅Kutani vavanuna hinkwavo lava a va ri na Yowabu va ya va ya rhendzela Xeba kwale mutini wa Avele-Beta-Maaka. Va fumbetela misava yo khandziya ha yona erirhangwini ra muti, va sungula ni ku cela rirhangu hi le hansi ka rona leswaku ri wa. ₁₆Kutani wansati un'wana wo tlhariha a huwelela a ri emutini, a ku: “Yingisani! Yingisani! Byelani Yowabu leswaku a ta haleno, ndzi lava ku vulavula na yena.” ₁₇Yowabu a ta kusuhi na yena, kutani wansati a n'wi vutisa a ku: “Hi wena Yowabu xana?” Yena a hlamula a ku: “Ina, hi mina.” Wansati a ku ka Yowabu: “Yingisa! Mina nandza wa wena, ndzi ni rito eka wena.” Yowabu a hlamula a ku: “Hiswona, vulavula, ndza swi twa.” ₁₈Kutani wansati a ku ka yena: “Khale a va hamba va ku: ‘Loko u lava leswaku timhaka ta wena ti tsemiwa, yana emutini wa Avele!’ Kutani hakunene a ti helela kwala. ₁₉Muti wa hina hi wun'wana wa leyo rhula ni ku tshembeka etikweni ra Israele. Xana u lava ku herisa muti lowu wu nga manana eka Vaisraele xana? Hikwalaho ka yini u lava ku lovisa ndzhaka ya HOSI Xikwembu xana?” ₂₀Yowabu a hlamula a ku: “E-e, swi nga ka swi nga endleki sweswo. A ndzi lavi ku lovisa kumbe ku herisa nchumu. ₂₁A hi yona mhaka, kambe ku ni wanuna un'wana wa le magangeni ya Efrayimi, loyi va nge i Xeba n'wana Bikri. Xeba loyi ú pfukerile hosi Davhida; loko mi ndzi nyiketa yena, yena ntsena, ndzi ta tshika ku hlasela muti lowu.” Kutani wansati a byela Yowabu, a ku: “Hi ta hoxa nhloko ya yena laha u nga kona hi le henhla ka rirhangu.” ₂₂Leswi wansati loyi a a tlharihile, a ya vulavula ni vanhu va muti hinkwavo; kutani va tsema nhloko ya Xeba n'wana Bikri, va yi hoxa eka Yowabu ehandle. Hiloko Yowabu a ba mhalamhala, kutani vanhu va Yuda va suka emutini, va hangalaka, un'wana ni un'wana a tlhelela ekaya ka yena. Yowabu yena a tlhelela eka hosi Davhida eYerusalema.