Mintirho 12

₁Enkarhini wolowo, hosi Heroda a sungula ku xanisa van'wana va kereke. ₂A dlaya Yakobo makwavo wa Yohane hi fumu. ₃Kutani loko a vona leswaku swi tsakisile Vayuda, a engeta a khoma na Petro (a ma ri masiku ya Xinkwa xo-ke-comela). ₄Loko a n'wi khomile, a n'wi pfalela ekhotsweni, kutani a lerisa leswaku va n'wi rindza hi mune wa mintlawa, ntlawa wun'wana ni wun'wana wu ri ni mune wa masocha. A a tilulamisele ku humesa Petro emahlweni ka tiko endzhaku ka nkhuvo wa Paseka. ₅Hikowalaho, Petro a rindziwa a ri ekhotsweni; kambe kereke a yi nga tshiki ku n'wi khongelela eka Xikwembu.

₆Loko Heroda a ri kusuhi ni ku n'wi humesa emahlweni ka tiko, hi vusiku bya kona, Petro a a etlele exikarhi ka masocha mambirhi; a a bohiwile hi tinketani timbirhi, naswona valanguteri va nyangwa a va rindza khotso. ₇Kutani, hi nomu lo, ntsumi ya Hosi yi humelela; yindlu yi tala ku vonakala; ntsumi yi hlakahla Petro etsheveni, yi n'wi pfuxa, yi ku: “Hatlisa, u pfuka.” Kutani tinketani ti wa emavokweni ya yena. ₈Ntsumi yi ku ka yena: “Tikhame, u ambala ni tintanghu ta wena.” A endlisa sweswo. Ntsumi yi tlhela yi ku ka yena: “Ambala ni baji ra wena, u ndzi landza.” ₉Kuteloko Petro a humile, a yi landza, a nga tivi leswaku xana leswi endliwaka hi ntsumi hi swona hakunene xana? A a anakanya leswaku xi nga va xivono. ₁₀Loko va hundzile ntlawa wo sungula ni lowa vumbirhi, va fika erivantini ra nsimbhi leri pfulekelaka emutini; ri tipfula hi roxe emahlweni ka vona, kutani va huma, va famba mpfhukanyana hi ndlela ya kona; kutani hi nomu lo, ntsumi yi suka yi siya Petro. ₁₁Loko Petro a xalamuka, a ku: “Sweswi ndza swi tiva swinene leswaku Hosi yi rhumile ntsumi ya yona, kutani yi ndzi ponisile emavokweni ya Heroda, ni ka hinkwaswo leswi tiko ra Vayuda a ri tiyimisele ku ndzi endla swona.”

₁₂Loko Petro a vonile leswaku timhaka ti yimile hi ndlela leyi, a ya endlwini ya Mariya, mana wa Yohane loyi a va ku i Marka, laha vapfumeri lavo tala a va hlengeletene kona, va ri karhi va khongela. ₁₃Petro a gongondza enyangweni ya le handle, kutani ku ta nandza wa xisati loyi a va ku i Rhoda, a ta yingisela. ₁₄Loko a twile hi rito leswaku i Petro, eku tsakeni ka yena a nga pfulanga nyangwa, kambe a tlhelela ndlwini hi ku tsutsuma a ya va tivisa leswaku Petro ú yimile le handle enyangweni. ₁₅Va ku ka yena: “U ni rihuhe wena.” Kambe a tiyisa leswaku a nga hembi; vona va ku: “I ndzhuti wa yena.” ₁₆Kambe Petro a ya emahlweni a gongondza; kuteloko va pfurile, va n'wi vona, kutani va hlamala ngopfu. ₁₇Yena a va kwehleta hi voko leswaku va miyela; a va byela hilaha Hosi yi n'wi humeseke ekhotsweni hakona, kutani a ku: “Tivisani Yakobo ni vamakwerhu eHosini timhaka teto.” Kutani a huma, a famba a ya kun'wana.

₁₈Loko ri xile, masocha ma pfilungana tinhloko swinene, ma ku: “Ku humelele yini ka Petro xana?” ₁₉Loko Heroda a n'wi lavile a nga n'wi kumi, a tengisa masocha ehubyeni, kutani a lerisa leswaku ma dlayiwa. Endzhaku ka swona, Heroda a suka eYudiya, a ngirimelela eKhezariya, a ya tshama kona.

₂₀Heroda a a lava ku lwa ni va le Tiri ni va le Sidoni; kambe vona va ta ka yena va ri mbilu yin'we; va rhanga hi ku twanana na Blasto, mulanguteri wa yindlu ya hosi; hiloko va ya kombela ku etlela ka tiko, hikuva tiko ra vona a ri singila etikweni ra hosi Heroda. ₂₁Kutani hi siku leri vekiweke, Heroda a ambala tinguvu ta vuhosi, a tshama exiluvelweni xa yena, a vulavula na vona. ₂₂Kutani vanhu va huwelela, va ku: “Rito leri a hi ra munhu, i ra Tilo!” ₂₃Hi nomu lo, ntsumi ya Hosi yi ba Heroda, hikuva a a nga dzunisanga Xikwembu; kutani a dyiwa hi swivungu, a fa.

₂₄Rito ra Hosi a ri ya emahlweni, ri andza ngopfu. ₂₅Kutani loko Barnaba na Sawulo va hetile ntirho wa vona, va suka eYerusalema, va vuya va ri na Yohane, loyi a va ku i Marka.