Eksoda 22

₁“Loko munhu a yiva homu kumbe nyimpfu, kutani a yi dlaya kumbe a yi xavisa, homu ya kona ú ta yi riha hi ntlhanu wa tihomu, kasi nyimpfu yona ú ta yi riha hi mune wa tinyimpfu.

₂“Loko khamba ri kumiwa ri ri karhi ri tshova yindlu nivusiku, kutani ri biwa ri fela kwalaho, rifu ra rona a ri rihiwi. ₃Kambe loko a dlayiwa ninhlekanhi, rifu ra yena ri fanele ku rihiwa.

“Muyivi ú fanele ku humesa swo riha hinkwaswo. Loko a pfumala, ú fanele ku xavisiwa ku riha leswi a swi yiveke. ₄Kambe loko xifuwo lexi yiviweke xi kumiwa eka khamba leri xa ha hanya, hambi yi ri homu kumbe mbhongolo kumbe nyimpfu, khamba ri ta humesa swifuwo swimbirhi ku riha xin'we.

₅“Loko munhu a dyisa swifuwo swa yena ensin'wini ya yena ya mavele kumbe ya vhinya, kutani a swi tshika swi ya dya ni le nsin'wini ya un'wana, munhu loyi ú ta teka ntshovelo lowunene ensin'wini ya yena ya mavele kumbe ya vhinya, a ya riha hi wona.

₆“Loko munhu a lumeka nhova, kutani ndzilo wu hangalaka wu ya hisa mavele lama fumbiweke kumbe lawa a ma nga si tshoveriwa ensin'wini, loyi a nga sungula ritshwa leri, ú fanele ku riha hinkwaswo leswi nga tshwa.

₇“Loko munhu a yisa mali kumbe nhundzu eka nakulobye leswaku a n'wi hlayisela swona, kutani swilo leswi swi yiviwa emutini wa kona, loyi a yiveke ú fanele ku riha kambirhi, loko a kumiwa. ₈Kambe loko khamba ri nga kumiwi, loyi a a hlayisa nhundzu ú fanele ku hlambanyisiwa emahlweni ka mina Xikwembu, a tiyisa leswaku a hi yena la nga yiva nhundzu ya nakulobye.

₉“Loko vanhu vambirhi va lwetana hi xilo xihi ni xihi, ku fana ni homu, kumbe mbhongolo, kumbe nyimpfu, kumbe swiambalo, kumbe nchumu wihi ni wihi lowu lahlekeke, kutani un'wana a ku i swa yena, mhaka ya vanhu lavambirhi lava yi fanele ku tisiwa eka mina Xikwembu; loyi ndzi nga ta n'wi kuma a ri ni nandzu, ú ta rihela loyi un'wana kambirhi.

₁₀“Loko munhu a ya fuyisa homu kumbe mbhongolo kumbe nyimpfu kumbe xifuwo xihi ni xihi eka nakulobye, kutani xi fa, kumbe xi vaviseka, kumbe xi phanghiwa hi valala, ku ri hava loyi a swi voneke hi mahlo, ₁₁mhaka ya vona yi ta tsemiwa hi ku hlambanya emahlweni ka mina HOSI Xikwembu, ku tiyisa leswaku loyi a a fuyisiwile xifuwo a nga xi khumbanga, kutani n'wini wa xifuwo ú ta pfumela, a nga ka a nga rihisi mufuyisiwa. ₁₂Kambe loko xifuwo xi lo yiviwa kunene, loyi a a fuyisiwile, ú fanele ku rihela n'wini wa xona. ₁₃Loko xifuwo xi handzuleriwile hi swiharhi swa nhova, loyi a a fuyisiwile a a xi tise xi ta voniwa leswaku xi handzuleriwile, kutani a nga ka a nga rihisiwi.

₁₄“Loko munhu a lomba xifuwo eka nakulobye, kutani xifuwo lexi xi vavisiwa kumbe xi fa, n'wini wa xona a nga ri kona, loyi a lombeke xona ú fanele ku riha. ₁₅Kambe loko n'wini wa xona a ri kona loko swi humelela, loyi a lombeke a nga fanelanga ku riha. Loko xifuwo a xi lombiwile hi mali, mali ya kona hi yona yi rihaka.

₁₆“Loko wanuna a kanganyisa nhwanyana loyi a nga si tivanaka ni wanuna, a etlela na yena, ú fanele ku humesa xuma a n'wi lovola a va nsati wa yena. ₁₇Kambe loko tata wa nhwanyana a ala leswaku n'wana wa yena a tekiwa hi munhu loyi, wanuna wa kona ú fanele ku riha hi mali leyi ringanaka ntsengo lowu lovolaka nhwana loyi a nga si tivanaka ni wanuna.

₁₈“Mi nga tsetseleli vanyamusoro, va dlayeni.

₁₉“Un'wana ni un'wana loyi a etlelaka ni xifuwo ú fanele ku herisiwa.

₂₀“Un'wana ni un'wana loyi a humeselaka swikwembu swin'wana emagandzelo, ematshan'wini ya ku gandzela mina HOSI ntsena, ú fanele ku herisiwa.

₂₁“Mi nga tshuki mi khoma valuveri hi tihanyi kumbe ku va xanisa, hikuva na n'wina mi vile valuveri etikweni ra Egipta. ₂₂Mi nga tshuki mi xanisa noni kumbe n'wana loyi a nga feriwa hi vatswari. ₂₃Loko mo va xanisa, kutani va ta va ta rila eka mina, ku rila ka vona ndzi ta ku twa hakunene; ₂₄kutani ndzi ta pfurha hi ku hlundzuka, ndzi mi vangela tinyimpi leswaku mi dlayiwa, vasati va n'wina va ta hundzuka tinoni, vana va n'wina va sala va nga ha ri na vatatana.

₂₅“Loko mi lomba un'wana wa vanhu va mina loyi mi nga na yena wa xisiwana emali, mi nga tshuki mi n'wi sala ndzhaku kukota lava bindzulaka hi ku lombisa mali, naswona mi nga lavi ntswalo wa mali leyi mi yi lombeke xisiwana lexi.

₂₆“Loko u tshuka u tekile xiambalo xa nakuloni loyi a nga ni nandzu eka wena, u fanele ku n'wi tlherisela xona dyambu ri nga si pela, ₂₇hikuva hi wona nkumba wa yena, ú sirhelela miri wa yena ha yona; xana ku nga va ni xin'wana lexi a etlelaka a funengerile xona xana? Loko a ta a ta rila eka mina, ku rila ka yena ndzi ta ku twa, hikuva mina ndzi twela vanhu vusiwana.

₂₈“Mi nga tshuki mi ndzi sandza mina Xikwembu, kumbe ku rhuketela murhangeri wa vanhu va ka n'wina.

₂₉“Mi nga tshuki mi hlwela ku humesa nhlengo wa ntshovelo wa n'wina wa mavele ni wa vhinyo ni mafurha.

“Vana va n'wina va xinuna va mativula, mi fanele ku ndzi nyiketa vona. ₃₀Mi ta endlisa sweswo ni le ka tihomu ta n'wina ni tinyimpfu ta n'wina: Xifuwo xa mativula xi fanele ku tshama ni mana wa xona masiku ya 7; kambe hi siku ra vu-8 mi ta ndzi tisela xona.

₃₁“Mi ta va vanhu lava hlawuleriweke mina, hikokwalaho mi nga tshuki mi dya nyama ya xifuwo lexi handzuleriweke hi swiharhi enhoveni; xifuwo xo tano, xi nyikeni timbyana.