Eksoda 35

₁Kutani Muxe a vitana ntshungu hinkwawo wa Vaisraele, a ku ka vona: “Leswi HOSI Xikwembu xi mi leriseke ku swi endla, hi leswi: ₂Ku ta tirhiwa hi masiku ya 6, kambe eka n'wina, siku ra vu-7 ri ta va leri hlawulekeke ra ku wisa, siku ra Savata leri hlawuleriweke HOSI Xikwembu; un'wana ni un'wana loyi a nga ta tirha hi siku leri, ú faneriwile hi ku fa. ₃Hambi wu ri ndzilo, mi nga tshuki mi wu tshivela emitini ya n'wina, hi siku leri ra Savata.”

₄Kutani Muxe a byela nhlengeletano hinkwayo ya Vaisraele, a ku: “Leswi HOSI Xikwembu xi nga lerisa swona hi leswi: ₅Vanhu hinkwavo exikarhi ka n'wina lava tinyiketaka ku humesela HOSI Xikwembu enhlengo hi mbilu yo basa, a va tise leswi: Nsuku, ni silivhere, ni koporo; ₆voya bya tinyimpfu bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani lowo saseka, ni voya bya timbuti; ₇madzovo ya tinyimpfu lama tlhuvutsiweke, ni madzovo ya timbuti, ni mapulangi ya murhi wa munga; ₈mafurha yo voninga, ni mirhi yo nun'hwerisa mafurha yo tola, ni swinun'hweriso swa mirhi leyi hisiwaka egandzelweni; ₉maribye ya nkoka ya ‘onikisi’, ni lama nga ta vekeriwa engubyeni ya vuprista ya ‘efodi’ ni le xincekaneni xa le xifuveni.”

₁₀“Kutani vavanuna lava nga ni vutivi bya ntirho exikarhi ka n'wina, a va te va ta endla hinkwaswo leswi HOSI Xikwembu xi leriseke swona, swi nga leswi: ₁₁Ntsonga lowo Hlawuleka, ni ntsonga wa vumbirhi, ni xifunengeto xa wona, ni swikhweketo swa wona, ni mapulangi ya wona, ni timhandze ta wona to hingakanya ha tona, ni tiphuphu ta wona, ni minkotloto ya wona; ₁₂Areka ni timhandze ta yona, ni xitshamu xa ndzivalelo, ni xisirhelelo xo siva Areka; ₁₃tafula ni timhandze ta rona, ni swibya swa rona, ni xinkwa lexo hlawuleka xa magandzelo; ₁₄xitlhoma-timboni xo voninga, ni swingolongondzwana swa xona, ni timboni ta xona, ni mafurha ya kona; ₁₅alitari ya mirhi ya risuna ni timhandze ta yona, ni mafurha yo tola, ni mirhi ya risuna leyi hisiwaka egandzelweni, ni xisirhelelo xo pfala nyangwa ya Ntsonga; ₁₆alitari ya magandzelo lama hisiwaka ni ritavala ra yona ra koporo, ni timhandze ta yona, ni swingolongondzwana swa yona hinkwaswo, ni sambelo ni xikhatelo xa rona; ₁₇swisirhelelo swa xivava, ni tiphuphu ta xona ni minkotloto ya kona, ni xisirhelelo xo pfala nyangwa ya xivava; ₁₈swikhomiso swa Ntsonga, ni swikhomiso swa xivava, ni tingoti ta kona; ₁₉swiambalo leswi sasekisiweke swa lava tirhaka exivandleni lexo hlawuleka, swi nga swiambalo leswo hlawuleka swa muprista Aroni, ni swiambalo swa vana va yena, leswi va nga ta swi ambala loko va tirha ntirho wa vuprista.”

₂₀Kutani ntshungu hinkwawo wa Vaisraele wu suka emahlweni ka Muxe, wu hangalaka. ₂₁Kutani hinkwavo lava tinyiketeke ku tirha, va ta; naswona hinkwavo lava tinyiketeke hi moya lowu ntshunxekeke, va ta va tisa mihlengo ya HOSI Xikwembu ya ku endla Ntsonga lowo Hlawuleka, ni ya leswi tirhisiwaka eku gandzeleni, ku katsa ni swiambalo leswo hlawuleka. ₂₂Ku ta vavanuna ni vavasati, hinkwavo va ri lava tinyiketeke hi mbilu yo basa, va tisa swipereta, ni swingwavila swa le tindleveni ni swa le tintihweni, ni masindza, ni swilo swa tinxaka-xaka swa nsuku; un'wana ni un'wana a nyiketa nhlengo wa yena wa nsuku, yi va nyiko leyo hlawuleka eka HOSI Xikwembu. ₂₃Un'wana ni un'wana loyi a a ri ni voya bya tinyimpfu bya muhlovo wa rihlaza ra tilo, kumbe wa xivunguvungu, kumbe lowo tshwuka, kumbe loyi a a ri ni ntsembyani lowo saseka, kumbe voya bya timbuti, kumbe madzovo ya tinyimpfu lama tlhuvutsiweke, kumbe madzovo ya timbuti, a a swi tisa. ₂₄Un'wana ni un'wana loyi a a kota ku humesa silivhere kumbe koporo, a a tisa swona wu va nhlengo wa yena eka HOSI Xikwembu; naswona un'wana ni un'wana loyi a a ri ni mapulangi ya murhi wa munga lama nga tirhaka ntirho wihi na wihi, a a ma humesa. ₂₅Vavasati lava a va ri ni vutivi bya ku swula, a va tisa leswi va swi swuleke hi voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani lowo saseka. ₂₆Naswona vavasati hinkwavo lava va tinyiketeleke ku tirha, a va swula ni voya bya timbuti. ₂₇Varhangeri vona a va tisa maribye ya “onikisi” ya nkoka, ni lama nga ta vekeriwa engubyeni ya vuprista ya “efodi” ni le xincekaneni xa kona xa le xifuveni; ₂₈a va tisa ni mirhi yo nun'hwerisa, ni mafurha yo voninga, ni swo nun'hwerisa mafurha yo tola, ni swinun'hweriso swa mirhi ya risuna leyi hisiwaka egandzelweni. ₂₉Vaisraele hinkwavo, vavanuna ni vavasati, lava tinyiketeke hi mbilu yo basa, va tisa xilo xin'wana ni xin'wana lexi nga ta pfuna entirhweni lowu HOSI Xikwembu xi leriseke Muxe leswaku wu endliwa, un'wana ni un'wana a humesela HOSI Xikwembu a ntshunxekile.

₃₀Kutani Muxe a ku ka Vaisraele: “Vonani, HOSI Xikwembu xi hlawurile Besalele n'wana Uri wa Huru, wa nyimba ya Yuda; ₃₁xi n'wi cherile Moya wa xona, xi n'wi nyika vutlhari, ni ku twisisa, ni vutivi, ni ku kota mintirho hinkwayo, ₃₂leswaku a endla swilo leswo saseka hi ku tirhisa nsuku, ni silivhere, ni koporo; ₃₃ú ta kota ni ku vatla maribye, a ma vekela eka swikhomiso, a kevetla ni mapulangi, a tirha ni mintirho yo sasekisa ya tinxaka-xaka. ₃₄Naswona, HOSI Xikwembu xi n'wi nyikile vutivi byo kota ku dyondzisa van'wana, xi nyika na Oholiyabu n'wana Ahisamaki, wa nyimba ya Dani. ₃₅HOSI Xikwembu xi va nyikile vutlhari bya ku kota ku tirha ntirho wun'wana ni wun'wana, ku fana ni ku vatla, kumbe ku sasekisa swilo, kumbe ku rhungelela mavalavala hi voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke, hambi wu ri ntirho wo luka kunene, kumbe mintirho yin'wana ya tinxaka-xaka, ku katsa ni vutivi byo sasekisa swilo.