Ezekiele 7

“ ‘Tiko ra hela, ni sweswi ri herile

ematlhelweni hinkwawo ya rona.

₃Na n'wina Vaisraele ma hela!

Eku hlundzukeni ka mina, ndzi ta mi tela,

ndzi mi avanyisa hikwalaho ka mikhuva ya n'wina leyo biha,

ndzi mi bela manyala ya n'wina hinkwawo.

₄Ndzi nga ka ndzi nga mi rivaleli,

a ndzi nga mi tweli vusiwana;

ndzi ta mi ba hikwalaho ka mikhuva ya n'wina leyo biha,

ndzi mi bela manyala lama nga kona ka n'wina,

kutani mi ta tiva leswaku HOSI Xikwembu, hi mina!’ ”

₅HOSI N'wini wa hinkwaswo ú vurisa sweswo ú ri:

“Khombo lerikulu ra ta, ri le ndleleni.

₆Tiko ra hela, ni sweswi ri herile,

na n'wina ma sungula ku hela.

Makumu ya fikile!

₇N'wina vaaki va tiko, ku hela ka n'wina ku fikile,

nkarhi wa kona hi wona lowu;

ri tile siku ra mpfilumpfilu,

ni ra ku hela ka minkulungwana emagangeni.

₈Eku hlundzukeni ka mina lokukulu,

ndzi ta mi ba ku nga ri khale;

ndzi ta mi avanyisa hikwalaho ka mikhuva ya n'wina leyo biha,

ndzi mi bela manyala ya n'wina hinkwawo.

₉Ndzi nga ka ndzi nga mi rivaleli,

a ndzi nga mi tweli vusiwana;

ndzi ta mi bela mikhuva ya n'wina leyo biha

ni manyala lama nga kona eka n'wina,

kutani mi ta tiva leswaku loyi a mi baka, hi mina HOSI!

₁₀“Vonani nkarhi wa ta, ni sweswi wu fikile,

nkarhi wa ku herisiwa ka Vaisraele,

hikuva va tsakela ngopfu ku xanisa van'wana,

ni ku tikurisa ka vona ku ya ku engeteleka.

₁₁Kambe tihanyi ta vona ti ta va vangela maxangu layo chavisa,

a ku nga poni na un'we wa vona;

mintshungu ya vona yi ta hangalaka,

ni mpfumawulo wa kona wu ta miyetiwa;

vukosi bya vona byi ta hela byi ku bi!

₁₂Nkarhi wa ta, ni siku ri fikile,

laha muxavi a nga ta ka a nga ha tsaki,

ni laha muxavisi a nga ta ka a nga vileli,

hikuva vukari bya mina byi ta wela mintshungu ya Vaisraele.

₁₃Leswi muxavisi a swi xaviseke,

a nge he tlheli a swi kuma,

hambiloko yena ni muxavi va nga hanya kun'we malembe yo tala,

hikuva vukari bya Xikwembu byi ta ba mintshungu ya Vaisraele,

a byi nga hundzuki:

Hinkwavo va dyohile, va ta lahlekeriwa hi vutomi.

₁₄Mhalamhala yi biwile,

mavuthu hinkwawo ma hlomile matlhari,

kambe a ku humi munhu a ya enyimpini,

hikuva vukari bya mina HOSI

byi le henhla ka mintshungu ya Vaisraele.”

₁₅HOSI Xikwembu xi engeta xi ku:

“Enhoveni, ku ta lwiwa,

mintungu ni tindlala swi ta wela Yerusalema;

lava lwaka nyimpi ehandle va ta dlawa hi valala,

ni lava nga sala emutini, va ta herisiwa hi tindlala ni mintungu.

₁₆Lava poneke ku fa,

va ta tsutsuma va ya etintshaveni,

va ri karhi va rila hinkwavo kukota matuva ya le minkoveni,

hinkwavo va tisola hi leswi va dyoheke.

₁₇Hinkwavo va ta tsemeka nhlana,

va nga ha tikoti hi ku chava.

₁₈Va ta ambala swa nkosi,

va khomiwa hi ku rhurhumela;

hinkwavo va ta vonaka va ri ni tingana,

va byewula tinhloko hi ku rila.

₁₉Va ta cukumeta silivhere ya vona etaleni,

nsuku wa vona wu hundzuka thyaka;

rifuwo leri ra vona ri nge va kutsuli

esikwini leri ndzi nga ta va hlundzukela mina HOSI;

a va nga koti ku dya rona va xurha,

va nge tati makhwiri ya vona ha rona.

Hakunene, silivhere ni nsuku

hi swona leswi swi va dyohiseke:

₂₀Ha swona, va tiendlele vuhlalu lebyo saseka, va tinyungubyisa ha swona;

va tivumbele ha swona swikwembu swa manyala leswi swi ndzi hlundzukisaka;

hikokwalaho ndzi ta hundzula rifuwo ra vona

ri va thyaka ntsena.

₂₁Ndzi ta ri nyiketa emavokweni ya vamatiko va ri teka,

swigevenga swo huma kule swi ta ri phangha, swi tlanga ha rona.

₂₂Ndzi ta languta etlhelo ndzi nga endli nchumu,

loko valala va hlasela xivandla xa mina xo saseka,

ni loko vanhu va tihanyi va nghena ka xona va xi onhetela.

₂₃“Fulani tinsimbhi mi endla tinketani,

hikuva tiko ri tele vadlayi,

ni mintirho ya tihayi yi tate Yerusalema.

₂₄Hikokwalaho ndzi ta tisa vamatiko lavo karhata ngopfu,

va ta teka tindlu hinkwato ta muti.

Ndzi ta pfala nomo wa lava tivulaka tinhenha,

ndzi onhetela ni tindhawu leto hlawuleka ta muti.

₂₅Esikwini ra maxangu, loko va lava ku rhula,

va nga ka va nga ku kumi.

₂₆Makhombo ma ta khandzakanya,

mahungu ya wona ma landzelelana.

Lava kombelaka swivono eka vaprofeta, a va nga swi kumi,

vaprista a va nga ha dyondzisi milawu,

ni vakulukumba va ta tshika ku tsundzuxa van'wana.

₂₇Mufumi wa tiko ú ta rila nkosi,

tindhuna ta yena ti hela matimba,

ni vaaki va tiko va oma swirho hi ku chava.

Ndzi ta va endla leswi va endleke van'wana,

ndzi va avanyisa hi maavanyisele ya vona,

kutani va ta tiva leswaku HOSI Xikwembu, hi mina!”