Ezra 6

₁Kutani hosi Dariyosi a humesa nawu wa leswaku ku ya kambisisiwa tibuku ta matimu endlwini leyi ti hlayisiwaka eka yona le Babilona. ₂Kutani le Ekibatana wu nga wona ntsindza wa xifundzha xa Vameda, va kuma buku leyi tsariweke marito lawa: “Xitsundzuxo: ₃Hosi Korexe ú vekile nawu hi lembe ro sungula ra ku fuma ka yena, a lerisa leswaku yindlu ya Xikwembu leyi nga Yerusalema yi akiwa hi vuntshwa, yi nga ndhawu leyi magandzelo lama dyiwaka ni lama hisiwaka ma humeseriwaka eka yona; yindlu ya kona yi ta va 30 m ku ya ehenhla, ni 30 m ku anama, ₄yi akiwa hi maribye lamakulu ni timhandze; endzhaku ka rixaxa rin'wana ni rin'wana ra vunharhu ra maribye, ku ta tlandlekiwa rixaxa ra timhandze. Mali yo hakela leswi, a yi hume enkwameni wa tiko. ₅Tlheriselani endlwini ya Xikwembu swibya swa nsuku ni swa silivhere leswi Nebukadnetsara a swi tekeke eTempeleni le Yerusalema, xin'wana ni xin'wana xi vekiwa endhawini ya xona.”

₆Kutani Dariyosi a rhumela nhlamulo leyi nge: “Wena Tatenayi ndhuna ya xifundzha xa le vupeladyambu bya Yufrata, na wena Xetara-Bozenayi ni vanghana va wena, ti nga tindhuna leti tshamaka kwale xifundzheni xexo, mi nga ngheneleli timhaka ta vanhu volavo, ₇tshikani ntirho wa ku aka yindlu ya Xikwembu wu ya emahlweni; hambanani ni ndhuna ya Vayuda ni vakulukumba va vona, mi va tshika va aka hi vuntshwa yindlu ya Xikwembu endhawini ya yona ya khale. ₈Mina ndzi veka nawu hi tlhelo ra leswi mi fanelaka ku swi endlela vakulukumba va Vayuda eku pfuxeni ka yindlu ya Xikwembu: Hatlisani mi va nyika hinkwaswo leswi va nga ta swi lava, mi swi xava hi mali ya ndzuvo leyi nga nkwameni wa tiko, kwale xifundzheni xa vupeladyambu bya Yufrata. ₉Leswi vaprista va le Yerusalema va nga ta swi lava loko va humesela Xikwembu xa matilo magandzelo lama hisiwaka, swo fana ni swinkuzana, ni makhuna kumbe tinyimpfu, va nyikeni swona leswaku va nga tshuki va kayivela. Hambi yi ri koroni, ni munyu, ni vhinyo, kumbe mafurha, va nyikeni swona siku rin'wana ni rin'wana ₁₀leswaku va ta humesa magandzelo lama tsakisaka Xikwembu xa matilo, va khongelela ni hosi ni vana va yona leswaku va hanya swinene. ₁₁Tlhandlakambirhi, ndzi veka nawu wa leswaku loyi a nga ta tlula xileriso xa mina, ku ta hlomuriwa mhandze endlwini ya yena, yi dzimiwa ehansi leswaku a hayekiwa eka yona; ni yindlu ya yena yi ta mbundzumuxiwa yi hundzuka rhumbi. ₁₂Xikwembu lexi endleke leswaku vito ra xona ri twarisiwa eYerusalema, a xi wise hosi yin'wana ni yin'wana kumbe vanhu lava lavaka ku hundzuluxa nawu lowu, kumbe ku faya yindlu ya Xikwembu leyi nga Yerusalema. Mina Dariyosi ndzi vekile nawu, tikarhateleni ku wu yingisa.”

₁₃Tatenayi ndhuna ya le xifundzheni xa vupeladyambu bya Yufrata, na Xetara-Bozenayi, ni vanghana va vona, va tikarhata va endla hinkwaswo leswi hosi Dariyosi a va leriseke swona. ₁₄Kutani vakulukumba va Vayuda va ya emahlweni va aka, va nga siveli hi nchumu, hilaha muprofeta Hagayi na Zakariya n'wana Ido va vuleke hakona, va heta ntirho lowu Xikwembu xa Israele xi nga va lerisa ku wu endla. Va wu tirhile hi ku pfumeleriwa hi Korexe, na Dariyosi. ₁₅Yindlu leyi yi herile hi siku ra vunharhu ra n'hweti ya Adara, elembeni ra vu-6 ra ku fuma ka hosi Dariyosi.

₁₆Kutani Vaisraele ni vaprista ni Valevhi ni hinkwavo lava vuyeke hi le vukhumbini va endla nkhuvo, va khangula yindlu ya Xikwembu va tsakile. ₁₇Siku va khanguleke yindlu ya Xikwembu, va humesile tinkuzi ta 100, ni makhuna ya 200, ni swinyimpfana swa 400, ni swiphongho swa 12 hi ku ya hi tinyimba ta vona, yi va mhamba yo susa swidyoho swa Vaisraele hinkwavo. ₁₈Kutani va veka vaprista hi mintlawa ya vona, va xaxameta ni Valevhi, leswaku va ta tirha ntirho wa Xikwembu eYerusalema, hilaha swi tsariweke hakona ebukwini ya Muxe.

₁₉Hi siku ra vu-14 ra n'hweti yo sungula, lava vuyeke hi le vukhumbini va endla nkhuvo wa Paseka. ₂₀Vaprista ni Valevhi a va tibasisile swin'we; hinkwavo a va basile, kutani va tlhava xinyimpfana xa Paseka, va tlhavela hinkwavo lava vuyeke hi le vukhumbini, ni vaprista-kulobye, na vona vini. ₂₁Nyama ya kona yi dyiwile hi Vaisraele lava vuyeke hi le vukhumbini ni vanhu hinkwavo lava a va amukeriwile hi Vaisraele, va hambana ni manyala ya vaaki va tiko, va khongela HOSI Xikwembu xa Israele. ₂₂Va endlile ni nkhuvo wa xinkwa lexo-ke-comela lowu heteke masiku ya 7, va wu dya va tsakile, hikuva HOSI Xikwembu a xi va katekisile, xi endla ni leswaku hosi ya Asiriya yi va tsakela, yi va pfuna entirhweni wa ku aka yindlu ya Xikwembu xa Israele.