Genesa 18

₁Siku rin'wana ninhlekanhi, dyambu ri ri karhi ri hisa, HOSI Xikwembu xi humelela eka Abrahama le ka Minkuhlu ya Mamre, xi n'wi kuma a tshamile enyangweni ya ntsonga wa yena. ₂Loko Abrahama a tlakusa mahlo, o vona vavanuna vanharhu va yimile emahlweni ka yena; hiloko a suka enyangweni ya ntsonga wa yena hi ku tsutsuma, a ya va hlanganisa, a fika a korhama, ₃a ku: “N'we vini vanga, loko mi ndzi tsakela, ndzi kombela leswaku mi yimanyana laha ka mina nandza wa n'wina. ₄Mi nge ndzi ya mi lavela swimatana mi ta phumunha ritshuri emilengeni, mi wisanyana laha hansi ka murhi. ₅Leswi mi teke hi laha ka mina nandza wa n'wina, ndza ha ta sungula hi ku mi lavela vuswanyana mi ta miyeta nyoka, kutani hi kona mi nga ta ya emahlweni ni riendzo ra n'wina.” Vona va hlamula va ku: “Hiswona, endla hilaha u vulaka hakona.” ₆Kavaloko Abrahama a hatlisa a ya eka Sara entsongeni, a fika a ku: “Hatla u teka swirhundzu swinharhu swa mapa lamanene, u ma pfuva u sweka swimbhundzwa.” ₇Abrahama yena a tsutsuma a ya entlhambini, a fika a teka rhole ro saseka, ro nona, a ri yisa eka nandza wa yena, kutani nandza a ri tlhava. ₈Kutani Abrahama a teka phehlwa ni ntswamba ni nyama ya rhole leyi a yi lulamiseke, a ya swi veka emahlweni ka vona ehansi ka murhi, a yima kwalaho tlhelo loko va ri karhi va dya.

₉Kutani va n'wi vutisa va ku: “Ú kwihi Sara nsati wa wena xana?” A hlamula a ku: “Ú kwala ntsongeni.” ₁₀Kutani HOSI Xikwembu xi ku: “Ndza ku tshembisa leswaku ndzi ta tlhela ndzi vuya kambe haxawu hi nkarhi wolowu; Sara nsati wa wena ú ta va a ri na n'wana wa mufana.” Sara a a ri eku yingiseleni, a ri enyangweni ya ntsonga, a nga voniwi. ₁₁Enkarhini lowu, Abrahama na Sara a va dyuharile swinene; Sara a a hundzeriwile hi nkarhi wa ku kuma vana. ₁₂Hikokwalaho, Sara a hleka a tivutisa a ku: “Xana xikoxa xo fana na mina xi nga ha tiphina xana? Tlhandlakambirhi, na yena nuna wa mina ú dyuharile!” ₁₃HOSI Xikwembu xi ku ka Abrahama: “Xana Sara ú hleka yini, a vula leswaku ú hundzeriwile hi nkarhi wa ku kuma n'wana xana? ₁₄Xana xi kona lexi xi nga tsandzaka mina HOSI xana? Haxawu, hi nkarhi lowu ndzi wu vekeke, ndzi ta tlhela ndzi vuya eka wena; Sara ú ta va a ri na n'wana wa mufana.” ₁₅Sara a a chava, kutani a kaneta a ku: “Mina a ndzi hlekanga.” HOSI Xikwembu xi ku: “Wa hemba, u hlekile.”

₁₆Kutani vavanuna lava va suka eka Abrahama va kongoma etlhelo ra muti wa Sodoma, kutani Abrahama a va heleketanyana. ₁₇Kutani HOSI Xikwembu xi tivutisa xi ku: “Xana ndzi nga fihlela Abrahama leswi ndzi lavaka ku swi endla xana? ₁₈E-e, hikuva Abrahama loyi ú ta va tiko lerikulu, kutani vanhu va matiko hinkwawo ya misava va ta katekisiwa hikwalaho ka yena. ₁₉Ndzi n'wi hlawurile leswaku a letela vana va yena ni va ka vona hinkwavo lava nga ta velekiwa leswaku va famba etindleleni ta mina HOSI, va endla leswinene, swo lulama, kutani mina HOSI ndzi ta endlela Abrahama hinkwaswo leswi ndzi n'wi tshembiseke swona.” ₂₀Kutani HOSI Xikwembu xi ya emahlweni xi ku: “Swivilelo hi tlhelo ra muti wa Sodoma ni muti wa Gomora swi tele ngopfu, ni swidyoho swa vona swa chavisa; ₂₁hikokwalaho ndzi ta rhelela ndzi ya vona loko leswi ndzi swi twaka hi tlhelo ra vona va swi endlile hakunene. Loko swi ri swona, ndzi ta swi tiva.”

₂₂Kutani vavanuna volavo va hundzuluka va kongoma etlhelo ra muti wa Sodoma, kambe Abrahama yena a sala a yimile emahlweni ka HOSI Xikwembu. ₂₃Kutani Abrahama a tshinela kusuhi na xona, a ku: “Xana u tiyisile hakunene leswaku u ta herisa lavo lulama swin'we ni lavo homboloka xana? ₂₄A hi nge emutini ku ni vanhu vo lulama va 50, xana u nga wu herisa, u nga wu tsetseleli, hambiloko ku ri na vanhu lava vo lulama va 50 eka wona xana? ₂₅Mhaka ya ku herisiwa ka vanhu vo lulama swin'we ni lavo homboloka, u nga tshuki u yi endla. U nga tshuki u fanisa lavo lulama ni lavo homboloka. Xana Muavanyisi wa misava hinkwayo a nga tsandzeka ku endla leswo lulama xana?” ₂₆Kutani HOSI Xikwembu xi ku: “Loko ndzo kuma vanhu vo lulama va 50 emutini wa Sodoma, ndzi ta tsetselela muti lowu hinkwawo hikwalaho ka vona.” ₂₇Abrahama a hlamula a ku: “Vona, ndzi kanyile mbilu ndzi ta ndzi ta vulavula na wena HOSI, hambileswi ndzi ngo va ntshuri ni nkuma ntsena. ₂₈Loko eka vanhu vo lulama va 50, ku kayivela ntlhanu ntsena, xana u nga kala u herisa muti hinkwawo hikwalaho ka ku kayivela ka vanhu va ntlhanu vo lulama xana?” HOSI Xikwembu xi ku: “Loko ndzo kuma vanhu vo lulama va 45 emutini, ndzi nge wu herisi.” ₂₉Kutani Abrahama a ya emahlweni a ku ka HOSI Xikwembu: “A hi nge emutini ku kumeka vanhu vo lulama va 40 ntsena.” HOSI Xikwembu xi hlamula xi ku: “Hikwalaho ka vanhu va 40, ndzi nge wu herisi.” ₃₀Kutani Abrahama a ku: “Ndzi kombela leswaku u nga hlundzuki, we HOSI, hikuva ndza ha lava ku vulavula. A hi nge emutini ku kumeka vanhu vo lulama va 30 ntsena.” HOSI Xikwembu xi hlamula xi ku: “Loko ndzo kuma vanhu vo lulama va 30, a ndzi nga wu herisi.” ₃₁Abrahama a ku: “Vona, ndzi kanyile mbilu ndzi ta ndzi ta vulavula na wena HOSI. A hi nge emutini wa kona ku kumeka vanhu vo lulama va 20.” HOSI Xikwembu xi hlamula yi ku: “Hikwalaho ka vanhu va 20, a ndzi nga wu herisi.” ₃₂Kutani Abrahama a ku: “Ndzi kombela leswaku u nga hlundzuki we HOSI, hikuva ndza ha lava ku vulavula kan'we ntsena. A hi nge emutini ku kumeka vanhu vo lulama va khume ntsena.” HOSI Xikwembu xi hlamula yi ku: “Hikwalaho ka vanhu lava vo lulama va khume, ndzi nge wu herisi.” ₃₃Loko HOSI Xikwembu xi hetile ku vulavula na Abrahama, xi suka xi famba, kutani Abrahama a tlhelela entsongeni wa yena.