Hosiya 12

₁Va ka Efrayimi va hlongorisa moya,

loko ri xile va landzelela moya wa le vuxeni;

vuxisi ni tihanyi swa andza exikarhi ka vona;

va endla xinakulobye ni tiko ra Asiriya,

va rhwala ni mafurha va ma yisa etikweni ra Egipta.

₂HOSI Xikwembu xi lava ku boxa milandzu ya vanhu va tiko ra Yuda,

xi ta ba va ka Yakobo hikwalaho ka mahanyelo ya vona,

xi va avanyisa hikwalaho ka mintirho ya vona.

₃Yakobo ú lwetanile ni makwavo va ha ri ekhwirini ra mana wa vona,

loko a kurile, ú sungule ku kamana na Xikwembu.

₄Ú pfinyanile ni ntsumi a yi hlula,

a rila a kombela ku katekisiwa.

Ú hlanganile ni Xikwembu eBetele,

kutani Xikwembu xi vulavula na yena kona.

₅Hi yona HOSI, Xikwembu xa matimba hinkwawo,

vito ra xona i HOSI.

₆Hi sweswo ke na n'wina, Xikwembu xa n'wina xi ta mi pfuna ku tlhelela eka xona;

tinyiketeleni ku rhandza van'wana ni ku avanyisa hi ku lulama,

mi nga karhali ku langutela Xikwembu xa n'wina.

₇Muxavisi loyi a tirhisaka mimpimo leyi nga riki yona,

ú tsakela ku xisa vanhu.

₈Va ka Efrayimi va ri: “Hina hi fumile,

rifuwo leri, hi tihlengeleterile rona hi hexe!”

Kambe rifuwo ra vona hinkwaro ri nge swi koti

ku siva nandzu lowu va wu endleke.

₉Ku sukela kwale tikweni ra Egipta,

mina HOSI ndzi vile Xikwembu xa n'wina;

ndzi ta tlhela ndzi mi tshamisa emixaxeni,

ku fana ni le nkarhini wa nkhuvo lowu vekiweke.

₁₀Ndzi vulavurile ni vaprofeta;

hi mina ndzi andziseke swivono,

ndzi kombisile swifaniso hi ku tirhisa vaprofeta.

₁₁Loko ku ri ni manyala eGiliyadi,

ndzi tiyisile, ma ta hela.

Loko va tlhavela tinkuzi ta magandzelo eGiligala,

tialitari ta vona ti ta mbundzumuxiwa,

ti sala ti fana ni nhulu ya maribye emasin'wini.

₁₂Yakobo ú balekerile etikweni ra Aramu,

kona kwale ú tirherile ku kuma nsati;

ku kuma nsati, a a fanele ku risa tinyimpfu.

₁₃HOSI Xikwembu xi tirhisile muprofeta ku humesa Vaisraele etikweni ra Egipta,

xi tlhele xi tirhisa yena ku va biyelela.

₁₄Kambe va ka Efrayimi va pfukile N'wini wa vona,

kutani ngati ya ku riha swidyoho, ú ta yi lava eka vona.

Manyala lawa va ma endleke, va fanele ku ma riha.