Hezekiya a kombela ku pfuniwa hi Esaya
1Loko hosi Hezekiya a twa timhaka teto, a handzulela swiambalo swa yena, kutani a ambala leswo khwaxa, a ya nghena endlwini ya HOSI Xikwembu. 2Kutani a rhuma Eliyakimi, mulanguteri wa swa le ntsindza, na Xebina matsalani, swin'we ni vaprista lavakulu, eka muprofeta Esaya n'wana Amotsi; na vona a va ambarile leswo khwaxa. 3Kutani va ya, va ya tivisa muprofeta marito ya Hezekiya, lama nge: “Siku ra namuntlha i siku ra maxangu, ro tshinyiwa ni ra tingana. Hi fana ni vana lava nga kusuhi ni ku velekiwa, kambe matimba ya muveleki ma herile. 4Kumbexana HOSI Xikwembu xa wena xi ma twile marito hinkwawo ya Rhabi-Xake, loyi n'wini wa yena hosi ya le Asiriya yi n'wi rhumeke ku ta sandza Xikwembu lexi hanyaka. Kumbexana HOSI Xikwembu xa wena xi ta rihiseta marito lawa xi ma tweke. Hikokwalaho, khongelela vanhu va nga ri vangani lava saleke kwala.” 5Esaya a hlamula malandza ya hosi Hezekiya lama fikeke ka yena, 6a ku: “Byelani n'wini wa n'wina leswaku HOSI Xikwembu xi vurisa sweswo xi ri: ‘U nga tshuki u chavisiwa hi marito lawa u ma tweke, lawa malandza ya hosi ya le Asiriya ma ndzi rhuketeleke ha wona. 7Yingisa: Ndzi ta nghenisa moya wun'wana eka yena: Ú ta twa mahungu-ndlela, kutani ú ta tlhelela etikweni ra yena; naswona ndzi ta vona leswaku a dlawa hi fumu, ekaya ka yena.’ ”
8Rhabi-Xake a tlhela, kutani a ya kuma hosi ya Asiriya emutini wa Libina, hikuva a a twile leswaku yi sukile eLakixi, yi ya hlasela muti wa Libina. 9Enkarhini wolowo, hosi ya Asiriya yi kuma mahungu ya leswaku Tirihaka hosi ya le Etiyopiya ú humile nyimpi ku ta lwa na yona.
Varhumiwa va Senakeribi va tlhelela eYerusalema
Loko hosi ya le Asiriya yi twa leswi, yi rhuma vanhu eka Hezekiya, yi va lerisa yi ku: 10“Mi ta fika mi byela Hezekiya hosi ya Yuda, mi ku: ‘U nga tshuki pfumela ku kanganyisiwa hi Xikwembu xa wena lexi u xi tshembaka, loko xi ku tshembisa leswaku muti wa Yerusalema a wu nga nyiketiwi emavokweni ya hosi ya le Asiriya. 11U swi twile hi wexe leswi tihosi ta le Asiriya ti swi endleke eka matiko hinkwawo: Ti ma herisile ma ku bi! Xana wena u ta ponisa ku yini xana? 12Xana swikwembu swa vamatiko swi ponisile matiko lawa vakokwa wa mina va ma heriseke, ma nga matiko ya Gozana, ni ya Harani, ni ya Resefa, ni ya vanhu va le Edeni lava a va ri eTelasara, xana? 13Yi kwihi hosi ya le Hamata, ni hosi ya le Aripadi, ni hosi ya muti wa Sefari-Vhayimi, ni hosi ya le Hena, ni hosi ya le Ivha, xana?’ ”
14Hezekiya a nyikiwa papila ra timhaka leti hi varhumiwa, a ri hlaya, kutani a tlhandlukela endlwini ya HOSI Xikwembu, a fika a ri phurumula emahlweni ka xona, 15kutani a khongela a ku: 16“HOSI ya matimba hinkwawo, Xikwembu xa Israele, wena u tshamaka exiluvelweni ehenhla ka tikerubu, hi wena ntsena la nga Xikwembu ehenhla ka mimfumo hinkwayo ya misava; hi wena la endleke tilo ni misava. 17Rhiya ndleve, we HOSI Xikwembu, u yingisa; pfula mahlo HOSI, u vona; yingisa marito lawa Senakeribi a ma rhumeleke ku ku sandza ha wona, wena Xikwembu lexi hanyaka. 18Hakunene, wena HOSI, tihosi ta le Asiriya ti herisile vanhu lavo tala ni ku onhetela matiko ya vona; 19ti hoxile swikwembu swa matiko lawa endzilweni, hikuva a swi nga ri swikwembu swa xiviri, kambe a swi ri swifaniso ntsena swa mitsandza ni maribye, leswi vatliweke hi mavoko ya vanhu; hikokwalaho, swi herisiwile. 20Sweswi ke, wena HOSI Xikwembu xa hina, hi lamulele emavokweni ya Senakeribi, leswaku mimfumo hinkwayo ya misava yi ta tiva leswaku hi wena ntsena u nga Xikwembu, wena HOSI.”
Rito ra Esaya eka Hezekiya
21Kavaloko Esaya n'wana Amotsi a rhumela rito eka Hezekiya, leri nge: “HOSI Xikwembu xa Israele xi vurisa sweswo, xi ri: Leswi u ndzi khongeleke hikwalaho ka Senakeribi hosi ya le Asiriya, 22rito ra mina HOSI ehenhla ka Senakeribi, hi leri:
“ ‘Muti wa Siyoni, nhwana loyi wo saseka,
wa ku hleka ni ku ku monya, wena Senakeribi;
va Yerusalema va sala va tshwutela marha,
loko u hundzile.
23Xana loyi u n'wi sandzaka ni ku n'wi rhuketela, i mani xana?
Xana i mani loyi u n'wi huweleleke,
ni ku n'wi langutela hansi eku tikuriseni ka wena, xana?
Hi mina Muhlawuleki wa Israele!
24Hi nomo wa varhumiwa va wena, u sandzile mina N'wini wa hinkwaswo,
loko u ri karhi u tidzunisa, u ku:
Hi makalichi ya mina layo tala,
ndzi khandziyile etinhlohlorhini ta tintshava, emabakweni ya Lebanoni lomu ku nga nghenekiki;
ndzi yile ndzi ya tsema mirhi ya kona leyo leha ya kedari,
ni mirhi ya kona leyo saseka ya kipresi.
Ndzi fikile emakocokocweni ya kona ya le ndzeni,
ni le swihlahleni swa kona leswo tlhuma.
25Ndzi cerile swihlovo,
kutani ndzi nwa mati ya swona.
Ndzi phyisile milambu hinkwayo ya Egipta
hi minkondzo ya mina!
26“ ‘Xana a wu swi twanga xana, wena Senakeribi,
leswaku mina HOSI ndzi lulamisile timhaka leti ka ha ri khale,
ni ku ti boha ku sukela minkarhini leyi hundzeke, xana?
Kutani sweswi, makungu ya mina ma karhi ma humelela,
swi nga leswi u swi endleke loko u herisa miti ya makhokholo,
yi hundzuka marhumbi.
27Vaaki va yona va tsemeka nhlana,
va khomiwa hi ku chava ni tingana.
Va fana ni swimilana swa nhova
kumbe rihlaza ra le masin'wini.
Va fana ni byanyi lebyi milaka emalwangwini ya tindlu,
lebyi vunaka byi nga si rhumbuka.
28“ ‘Kambe mina ndzi tiva loko u yima ni loko u tshama,
ndzi tiva loko u famba ni loko u vuya,
ni loko u ndzi karihela.
29Kutani ke, leswi u ndzi kariheleke,
ni leswi ku titshemba ka wena ku fikeke etindleveni ta mina,
ndzi ta ku boxa nhompfu, ndzi ku hulela muhalo,
ndzi ku nghenisa ni matomu enon'weni,
kutani ndzi ta ku tlherisela ekaya,
hi ndlela leyi u teke ha yona.’
30“Leswi swi nga ta ku komba ku tiya ka marito lawa wena Hezekiya, hi leswi: Nan'waka, ku ta dyiwa leswi timilelaka hi swoxe; haxawu ku ta dyiwa leswi hlukaka kunene; kambe loko lembe ra vunharhu ri ta va ri fikile, haxani mbewu, mi tshovela; byalani masimu ya vhinya, mi dya mihandzu ya kona! 31Eka lava saleke va rixaka ra Yuda, lava nga ta pona va ta dzima timitsu ehansi, va ta phaka marhavi ma veka mihandzu; 32hikuva, emutini wa Yerusalema, lava saleke va ta hluka; swihluke swa lava poneke swi ta huma entshaveni ya Siyoni. HOSI Xikwembu lexi hisekelaka tiko ra xona, xi ta endla leswaku swi va tano.
33“Hikokwalaho, HOSI Xikwembu xi vurisa sweswo ehenhla ka hosi ya le Asiriya, xi ri: ‘Senakeribi a nga ka a nga ngheni emutini lowu, kumbe ku wu copa hi nseve; a nga ka a nga tshineli kusuhi na wona hambi a tisirhelerile hi switlhangu; a nga ka a nga wu hluli hi ku fumbetela misava yo khandziya ha yona erirhangwini ra muti. 34Ndlela leyi a teke ha yona, hi yona leyi a nga ta tlhela ha yona. A nga ka a nga ngheni emutini lowu, ku vula mina HOSI, 35hikuva ndzi ta lwela muti lowu ndzi wu lamulela, hi ku rhandza ka mina, ni hikwalaho ka nandza wa mina Davhida.’ ”
Ta ku ponisiwa ka Yerusalema
36Kutani ntsumi ya HOSI Xikwembu yi humelela emixaxeni ya Vaasiriya, yi lovisa vavanuna va 185 000. Loko ri ya eku xeni, lavan'wana va pfuka, kutani vo vona mintsumbu ntsena. 37Kavaloko Senakeribi hosi ya le Asiriya a longa, a tlhelela ekaya eNinivha, a ya tshama kona. 38Siku rin'wana, loko a ri karhi a gandzela endlwini ya Nisiroko xikwembu xa yena, vana va yena Adrameleke na Xaresere va n'wi dlaya hi fumu, kutani va balekela etikweni ra Ararata. Esari-Hadoni, un'wana wa vana va yena, a sala a fuma.
