Esaya 59

₁Mi nga ehleketi leswaku HOSI Xikwembu a xi na wona matimba yo mi ponisa,

ni leswaku a xi mi twi loko mi huwelela.

₂Leswi swi mi hambanyisaka ni Xikwembu xa n'wina i mintirho ya n'wina leyo homboloka;

xi mi fularherile hikwalaho ka swidyoho swa n'wina, kutani a xa ha lavi ku mi twa.

₃Mavoko ya n'wina ni tintiho ta n'wina

swi lo pyì, hi ngati ni leswo homboloka;

loko mi pfula nomo mi vulavula,

ku huma vuxisi ni ku kanganyisa ntsena.

₄Loko mi yisa mhaka ehubyeni leswaku yi ya kaneriwa,

a mi lavi leswi lulameke, a mi tshembeki;

mi vulavula mavunwa mi tshika ntiyiso,

mi tshama van'wana xikungu, mi vanga makhombo.

₅Mi fana ni matandza ya tinyoka ta vuxungu,

lama dlayaka loko munhu a ma dya;

loko ma tlhotlhorhiwa, ku huma timhiri!

Mi fana ni swisaka swa mapume

₆leswi vanhu va nga kotiki ku tirhungela

swiambalo ni minkumba ha swona.

Mintirho ya n'wina i ya tihanyi ntsena,

yi vanga makhombo.

₇A mi hlweli ku endla leswo biha,

mi hatla ku halata ngati ya lava nga riki na nandzu.

Lomu mi yaka kona, mo yela ntsena

ku herisa ni ku fayetela.

₈Ndlela leyi tisaka ku rhula, a mi yi tivi,

lomu mi hundzaka kona, ku lulama a ku kona;

mi tsakela maendlele layo homboloka,

eka wona, ku hava loyi a nga kumaka ku rhula.

₉Vaisraele va ku:

“Ku lweriwa hi Xikwembu swa ha ri kule na hina,

xi nge pfuki ni siku ni rin'we xi hi endlerile leswi lulameke.

Hi lava ku vonakala, kambe ho vona xinyami ntsena,

hi lava ku famba laha ku nga te nghéé, kambe hinkwako ku lo khwìxìì!

₁₀Loko hi lava khumbi, ho ambambela kunene,

hi gugurhuteka ku fana ni munhu wo fe mahlo;

hambi wu ri nhlekanhi, hi khuguka hi wa wonge hi loko ri perile;

exikarhi ka vanhu va matimba ho va masirha ya le handle.

₁₁Hinkwerhu hi tshama hi ri ku vovoleni wonge ho va swinkankanka,

hi rila ku fana ni xivambalana lexi tiputaka vusiwana;

a hi ku Xikwembu xi ta hi lwela, kambe ni sweswi a hi voni nchumu,

a ha ha tshembi ni leswaku hi ta pfuka hi ponisiwile.

₁₂Milandzu ya hina yi tele ngopfu emahlweni ka wena,

swidyoho swa hina, hi swona swi hi dlayisaka;

mintirho ya hina leyo homboloka, ha yi tiva,

hi tiva ni leswi hi dyoheke swona:

₁₃Hi tlurile milawu ya wena HOSI, hi tlhela hi ku fularhela,

hi tshike ku landza wena Xikwembu xa hina.

Hi vulavula ntsena hi ta ku xanisa van'wana ni ku hundzukela wena,

makungu ya hina ni leswi hi swi vulaka i mavunwa ntsena.

₁₄Mintirho leyo lulama yi hlongoriwile,

leswinene swi nge tshineli kusuhi,

hikuva ntiyiso wu khugukile wu wa erivaleni ra muti,

kutani leswo lulama swi nga ka swi nga ngheni emutini.

₁₅Ntiyiso wa kala swinene,

munhu loyi a tshikaka ku endla leswo biha ú wela emavokweni ya vaxanisi.”

Swilo leswi, HOSI Xikwembu xi swi vonile,

a xi tsakanga nikutsongo loko xi vona leswaku ku lulama a ku kona.

₁₆HOSI Xikwembu xi swi vonile ni leswaku a ku na munhu loyi a tiyimiseleke ku pfuna van'wana,

xi hlamarile ku vona leswaku a ku na loyi a lamulelaka vanhu va xona;

hikokwalaho, xi ta ya hi xoxe, xi ya lwa xi hlula,

xi komba leswaku hi xona mulamuleri.

₁₇Ku lulama ku ta va xisirhelelo xa xona xa le xifuveni,

xihuku xa xona xa le nhlokweni ku ta va ku ponisa ka xona;

swiambalo swa xona, ku ta va ku rihisela ka xona,

ku hiseka ka xona ku ta va nceka lowu xi funengelaka wona.

₁₈Un'wana ni un'wana, xi ta n'wi ba hi nkhavi lowu ringanaka leswi a endleke swona;

valala va xona, xi ta va karihela xi va ba,

lava nga matikweni ya le kule, na vona va ta biwa.

₁₉Ku suka evupeladyambu ku ya fika evuxeni,

vito ra HOSI Xikwembu ni ku dzuneka ka xona swi ta xiximiwa;

xi ta ta hi rivilo ku fana ni xinambyana lexi hobomulanaka,

lexi mati ya kona ma susumetiwaka hi moya wa HOSI Xikwembu.

₂₀HOSI Xikwembu xi ri:

“Mina mukutsuri ndzi ta ta emutini wa Siyoni,

eka n'wina va ka Yakobo lava tshikeke tindlela leto homboloka.