Yobo 14

₁“Vutomi bya munhu byi komile ngopfu,

ku sukela evuhlangini, ú le ku xanisekeni.

₂Ú fana ni xiluva lexi balekaka xi hatla xi vuna;

ú hundza kukota papa, a nyamalala.

₃We Xikwembu, u tikarhatela yini ku kambela xivumbiwa xexo ke?

U ndzi tisela yini ehubyeni ku ta ndzi tengisa xana?

₄I mani la nga humesaka swilo leswo tenga eka leswi nga tengangiki xana?

Ku hava na un'we!

₅Masiku ya munhu ma pimiwile,

hi wena u tivaka ntsengo wa malembe ya yena ya ku hanya;

u n'wi bele mindzilekana leyi a tsandzekaka ku yi tlula.

₆Hikokwalaho, tshika ku n'wi honokela;

hambana na yena a ta kota ku hefemula ku fana ni mutirhi loko a khumukile.

₇“Murhi lowu tsemiweke wa ha ri ni ku tshemba:

Wa ha ta tlhela wu hluka,

wu ya emahlweni wu phaka marhavi.

₈Hambiloko timitsu ta wona ti bolela emisaveni,

ni nsinya wa kona wu oma wu wela hansi,

₉murhi lowu wu ta pfuka loko wu kuma swimatana,

wu tlhela wu hluka onge hi loko wa ha ku byariwa.

₁₀Kasi munhu yena wa fa, a latiwa esirheni;

loko a khalutile, a nga ha kumeki.

₁₁Vanhu va fana ni mati loko ma hela etiveni,

i nambu lowu phyaka wu oma.

₁₂Lava feke va nge he pfuki,

loko matilo ma nga si nyamalala, va nge pfuxiwi,

va nge sisimuki evurhongweni bya vona.

₁₃Loko a wo kota ku ndzi fihla exivandleni xa vafi,

u ndzi tumbeta kona vukari bya wena byi ko byi hela,

a wu ta veka nkarhi lowu u nga ta ndzi anakanya ha wona.

₁₄Loko munhu a a kota ku fa a tlhela a hanya,

a ndzi ta tiyisela emaxangwini ya mina hinkwawo,

ndzi yimela ku ntshunxiwa eka wona.

₁₅A ndzi ta ku hlamula loko u ndzi vitana,

na wena a wu ta tsakela ntirho wa mavoko ya wena.

₁₆A wu ta hlaya magoza ya mina,

kambe swidyoho swa mina a wu ta tshika ku swi languta.

₁₇A wu ta rhungelela ku homboloka ka mina enkwameni,

u tumbeta kona swidyoho swa mina.

₁₈“Kambe tintshava ta wa ti hirimuka,

maribye ma yimburiwa ma suka etindhawini ta wona;

₁₉mati ya milambu ma guba maribye,

ndhambi yi khukhula misava,

kutani na wena u herisisa sweswo ku tshemba ka munhu!

₂₀Minkarhi hinkwayo wa n'wi hlula, a fa a nyamalala,

u onha xiyimo xa yena, u n'wi hlongolela makumu.

₂₁Vana va yena va nga dzunisiwa, kambe yena a nge swi tivi;

ni loko va tsongahatiwa, a nge swi voni.

₂₂Ú twa ntsena switlhavi leswi nga mirini wa yena,

kutani a sala a tiputa vusiwana.”