Yobo 6

₂“Loko ingi maxangu ya mina ni makhombo ya mina

ma nga vekiwa hinkwawo exikalwini ma pimiwa,

₃a ma ta tlula ni sava ra lwandle hi ku tika;

hikokwalaho ndzi hatle ndzi vulavula.

₄Xikwembu-xa-matimba-hinkwawo xi ndzi copile hi miseve,

vuxungu bya yona byi hangalaka ni miri wa mina.

Xikwembu xi le ku ndzi chaviseni.

₅“Loko mangwa yi ri ebyanyini bya rihlaza, a yi rili,

homu a yi bongi loko yi ri ku dyeni ka mahlanga.

₆Nyama yo pfumala munyu ya dyeka ke?

Ntsutsu lowo basa wa nandziha xana?

₇Swakudya swo tano, a ndzi swi tsakeli,

loko ndzo dya swona, swi ta ndzi hlantisa.

₈Loko ingi Xikwembu xi nga yingisa xikhongelo xa mina,

xi ndzi endlela leswi ndzi swi navelaka!

₉Xikwembu a xi ndzi kandziye xi ndzi pyanya,

a xi ndzi be xi ndzi hetisa:

₁₀Moya wa mina a wu ta chaveleleka;

emaxangwini ya mina lama nga heriki, a ndzi ta tsaka ngopfu,

hikuva a ndzi alanga makungu ya Muhlawuleki.

₁₁Xana ndza ha hanyela yini xana?

Swi nga antswa ndzi timeka ndzi hambana na swona.

₁₂Mina ndzi munhu wa nyama ni ngati,

a ndzi ribye kumbe nsimbhi!

₁₃A ndza ha ri na matimba,

ku pfumaleka ni loyi a nga ndzi pfunaka.”

“Munhu la alaka ku tsetselela nakulobye,

ú sandza Xikwembu-xa-matimba-hinkwawo.

₁₅Vanghana va mina va ndzi kanganyisile ku fana ni nambu lowu phyeke,

kukota swinambyana leswi khulukaka enkarhini wa timpfula ntsena.

₁₆Siku gwitsi ni gamboko swi n'okaka,

swinambyana leswi swi tala hi mati lama pfindlukeke.

₁₇Kambe loko dyambu ri sungula ku hisa,

swa phya swi nyamalala.

₁₈Mintlawa ya vaxavisi yi hambuka ku ya lava mati kona,

kambe yi lahleka enhoveni, yi lovisa sweswo.

₁₉Mintlawa yo huma eTema yi le ku laveni ka mati,

ya le Xeba yi ni ku tshemba leswaku yi ta ma kuma,

₂₀kambe loko vanhu lava va fika eminkoveni ya kona,

va yi kuma yi nga ri na nchumu.

₂₁N'wina mi fana ni swinambyana sweswo;

mi vonile ku xaniseka ka mina, kambe sweswi mi tlhelela ndzhaku.

₂₂Xana ndzi tshama ndzi ku: ‘Ndzi nyikeni swo karhi!’

kumbe: ‘Ndzi pambuleleni rifuwo ra n'wina!’ xana?

₂₃Xana ndzi tshama ndzi ku: ‘Ndzi ntshunxeni eka valala va mina!’

kumbe: ‘Ndzi lamuleleni eka vanhu va tihanyi!’ xana?

₂₄“Ndzi tsundzuxeni, kutani ndzi ta miyela,

ndzi kombeni laha ndzi hoxeke kona.

₂₅Marito ya ntiyiso ma tlhava kambe ma akisa,

kasi ku tshinya ka n'wina a ku pfuni nchumu.

₂₆Mi ringeta ku kaneta marito ya mina,

kambe leswi ndzi swi vulaka eku vavisekeni ka mina a hi matlangwana.

₂₇N'wina mi xavisa ni swisiwana hi ku hoxa vuhlolotwana,

mi endla bindzu hi ku tshika vanghana va n'wina!

₂₈“Kambe sweswi, ringetani ku kamba timhaka ta mina,

hikuva a ndzi nga mi hembeli.

₂₉Tivoneleni, mi nga ndzi dyoheli,

ndzi ri, tivoneleni, nandzu mina ndzi hava!

₃₀Xana ndzi dyohile loko ndzi vulavula,

xana mi ri, khombo a ndzi ri tivi xana?”