Yobo 9

₂“Ina swi tano, ndza swi tiva,

kambe emahlweni ka Xikwembu, ku hava munhu loyi a lulameke.

₃Hambiloko munhu a navela ku phikisana na xona, a xi vutisa swivutiso swa 1 000,

xona a xi nga hlamuli ni xin'we xa swona!

₄Xikwembu xi ni vutlhari ni matimba lamakulu;

hambi munhu a nga kanya mbilu a lwa na xona, a nge xi hluli.

₅“Xikwembu xi rhurhisa tintshava xi nga ti vutisanga,

xi ti hirimuxa xi hlundzukile.

₆Xi tsekatsekisa misava, laha yi nga kona,

xi tlula-tlurisa ni tiphuphu ta yona.

₇Xi lerisa dyambu leswaku ri nga xi, kutani ri yingisa;

xi pfala ni tinyeleti, ti nga ha voningi.

₈Xi vambile matilo xi ri xoxe,

xi famba ehenhla ka magandlati ya lwandle.

₉Hi xona xi vumbeke tinyeleti to kota Gongomela,

na Mahlanhle, na xirimela, ni tinyeleti hinkwato ta le dzongeni,

₁₀xi endla swilo leswikulu, leswi vanhu va tsandzekaka ku swi twisisa;

xi endla ni mahlori ya ntsandza-vahlayi.

₁₁“Xikwembu xi hundza kusuhi na mina, kambe a ndzi xi voni;

mahundzele ya xona a ndzi ma twisisi.

₁₂Loko xi lava ku khoma xanchumu, xi nga siveriwa hi mani;

i mani la nga xi vutisaka a ku: ‘U endlele yini sweswo ke?’

₁₃Xikwembu xi nge tshiki ku hlundzukela valala va xona,

vona lava pfuneke Rahaba nyoka ya lwandle, va wa emahlweni ka xona.

₁₄“Xana mina ndzi nga ma kuma kwihi,

marito ya hlamulana na xikwembu.

₁₅Hambileswi ndzi nga riki na nandzu, ndzi nge xi hlamuli;

ndzo kombela ntsena ku rivaleriwa hi xona, xona xi nga muavanyisi wa mina.

₁₆Loko ndzo vitana Xikwembu, kutani xi ndzi hlamula,

ndzi nge tshembi leswaku xi ndzi yingisile.

₁₇Xikwembu xi ndzi vutla hi xihuhuri,

xi ndzi boxetela ni timbanga, ndzi nga onhanga nchumu!

₁₈Xi ndzi tsona nkarhi wa ku hefemula,

xo tshamela ku ndzi dyisa mbitsi.

₁₉Xikwembu hi xona xi nga ni matimba;

xi nga vekiwa nandzu hi mani ehubyeni ke?

₂₀Hambileswi ndzi nga dyohangiki, marito ya mina ma ta ndzi kaneta;

hambiloko ndzi nga onhanga nchumu, nomo wa mina wu ta ndzi avanyisa!

₂₁Hakunene, nandzu ndzi hava,

mina no wu tiva a ndzi wu tivi, ndzi karhele hi vutomi!

₂₂“Hinkwaswo swa fana! Hikokwalaho ndzi ri,

vanhu vo lulama ni vanhu lavo homboloka, Xikwembu xi va herisa ku fana!

₂₃Loko ku tshuka ku humelela ntungu, wu dlaya lava nga riki na nandzu,

Xikwembu xi va hleka emaxangwini ya vona.

₂₄Xikwembu xi nyiketile misava emavokweni ya lavo homboloka,

vaavanyisi va timhaka ehubyeni, xi va sive mahlo.

Loko ku nga ri xona xi endlaka sweswo,

ku ta va ku ri mani xana?

₂₅“Vutomi bya mina byi hatla byi hundza, byi nga vonanga minkateko,

byi tsutsuma ku tlula masocha lama rhangelaka kalichi ya hosi;

₂₆byi ni rivilo kukota byatso byo endliwa hi tinhlanga,

ku fana ni gama leri bvutamelaka swakudya swa rona.

₂₇Loko ndzi ringeta ku rivala xirilo xa mina,

ndzi tshika ku khanyanisa xikandza, kutani ndzi tiendla la tsakeke,

₂₈mahlomulo ya mina lama taka ma ndzi heta matimba,

hikuva ndza swi tiva, Xikwembu a xi nga tshiki ku ndzi veka nandzu.

₂₉Leswi xi nga ta ndzi avanyisa,

ndza ha tikarhatela yini xana?

₃₀Hambiloko ndzi nga hlamba hi mati layo tenga,

ndzi basisa mavoko ya mina hi xisibi,

₃₁Xikwembu xi ta ndzi cukumeta endzhopeni,

kutani swiambalo swa mina swi ta ku pyì, hi thyaka.

₃₂“Loko Xikwembu a xo va munhu,

a ndzi ta hlamulana na xona, hi ya mangalelana ehubyeni.

₃₃Loko a ko va ni munhu loyi a nga tsemaka mhaka exikarhi ka mina ni Xikwembu,

loyi a nga hi hlanganisaka,

₃₄xona a xi ta tshika ku ndzi ba hi nkhavi wa xona,

na mina ndzi nga ha rhurhumeli emahlweni ka xona.

₃₅A ndzi ta vulavula na xona ndzi nga ha chavi.

Kambe a swi tano: Ndzo va ndzexe!”