Luka 1

₁Lavo tala va ringetile ku tsala marungulo ya timhaka leti humeleleke exikarhi ka hina; ₂va ti rungurile hilaha na hina hi nga ti twa hakona eka lava a va ri timbhoni ta tona ni malandza ya rito ra Xikwembu ka ha ri eku sunguleni; ₃hikwalaho ke na mina ndzi kambisisile timhaka leti hinkwato ku sukela emasungulweni ya tona, kutani ndzi vonile leswaku swi nga saseka loko ndzi ku longoloxela tona hi ku tsala, wena Teyofilo la chavisekaka, ₄leswaku u ta tiva ku tiya ka timhaka leti u dyondzisiweke tona.

₅Hi masiku ya ku fuma ka Heroda hosi ya Yudiya, a ku ri ni muprista loyi vito ra yena a va ku i Zakariya, wa ntlawa wa Abiya; nsati wa yena a a ri wa rixaka ra va ka Aroni, vito ra yena a a ri Elizabeta. ₆Ha vambirhi a va lulamile emahlweni ka Xikwembu, a va famba emilawini hinkwayo ya Hosi ni le swilerisweni swa yona, va ri hava xisolo. ₇Ntsena a va nga ri na n'wana, hikuva Elizabeta a a ri mhika; naswona hi vumbirhi bya vona, a va dyuharile.

₈Loko Zakariya a ri karhi a tirha ntirho wa yena wa vuprista emahlweni ka Xikwembu hi masiku ya ku tirha ka ntlawa wa yena, ₉swi wela yena hi nawu wa vuprista ku nghena eTempeleni ya Hosi, a ya hisa magandzelo ya risuna. ₁₀Ntshungu hinkwawo a wu ri ehandle, wu khongela hi nkarhi wolowo wa magandzelo ya risuna. ₁₁Kutani ntsumi ya Hosi yi tikomba eka Zakariya, yi ri etlhelweni ra xinene ra alitari ya magandzelo. ₁₂Loko Zakariya a yi vona, a tshuka, a chava ngopfu. ₁₃Kambe ntsumi yi ku ka yena: “U nga chavi Zakariya, hikuva ku khongela ka wena ku yingisiwile; Elizabeta, nsati wa wena, ú ta ku velekela n'wana wa mufana, kutani u ta n'wi thya vito ra Yohane, ₁₄u tsaka u tsakisisa. Naswona lavo tala va ta tsakela ku velekiwa ka n'wana, ₁₅hikuva ú ta va nkulukumba emahlweni ka Hosi; a nga ka a nga nwi vhinyo ni byalwa, kambe ú ta tala Moya lowo Kwetsima a nga si velekiwa. ₁₆Ú ta endla leswaku lavo tala xikarhi ka Vaisraele va hundzukela eka Hosi Xikwembu xa vona; ₁₇kutani, hi makungu ya Xikwembu, ú ta va murhangeri, a ri ni moya wa Eliya ni matimba ya yena; ú ta vuyisela timbilu ta vatatana eka vana va vona, a vuyisela ni vakaneti evutlharini bya lavo lulama, leswaku a lunghisela Hosi tiko leri lulameke.”

₁₈Kutani Zakariya a ku ka ntsumi: “Xana mhaka leyi yi nga ndzi khorwisisa ku yini, leswi ndzi dyuhaleke, ni nsati wa mina a nga xikoxa ke?” ₁₉Ntsumi yi n'wi hlamula, yi ku: “Hi mina Gabriele, la yimaka emahlweni ka Xikwembu; ndzi rhumiwile ku ta vulavula na wena ni ku ku tivisa mahungu lamanene lawa. ₂₀Languta, u ta hundzuka mbheveve, u hluleka ku vulavula ku ko ku fika siku leri swilo leswi swi nga ta humelela ha rona, hikuva a wu pfumelanga marito ya mina, lama nga ta hetiseka hi nkarhi wa wona.”

₂₁Vanhu a va langutela Zakariya ku huma eTempeleni, kutani va hlamala hi mhaka ya ku hlwela ka yena. ₂₂Loko a huma, a hluleka ku vulavula na vona, kutani va tiva leswaku ú vonile mahlori eTempeleni; na yena a kombetela ntsena hi mavoko, hikuva a a hundzukile mbheveve. ₂₃Kuteloko masiku ya ku tirha ka yena ma herile, a tlhelela ekaya.

₂₄Endzhaku ka masiku wolawo, Elizabeta nsati wa yena a tika, kutani a tifihla ntlhanu wa tin'hweti, a ri karhi a ku: ₂₅“Hakunene Hosi yi ndzi pfunile, yi ndzi susa tingana exikarhi ka vanhu.”

₂₆Hi n'hweti ya vu-6 ntsumi Gabriele yi rhumiwa hi Xikwembu emutini wa Galeliya lowu va nge i Nazareta. ₂₇Yi ta eka wanhwana loyi a a vutiwile hi wanuna loyi a va ku i Yosefa, wa rixaka ra Davhida; vito ra wanhwana loyi a a ri Mariya. ₂₈Ntsumi yi fika yi ku ka yena: “Avuxeni, wena la nga kombiwa tintswalo, Hosi yi na wena.” ₂₉Mariya a tshukisiwa hi marito ya ntsumi, a hlamala leswaku xana ku xeweta ka yona hi loku ko yini? ₃₀Kambe ntsumi yi ku ka yena: “U nga chavi we Mariya, hikuva u kumile tintswalo emahlweni ka Xikwembu. ₃₁Vona, u ta tika, kutani u ta veleka n'wana wa mufana; u ta n'wi thya vito ra Yesu. ₃₂Yena ú ta va nkulukumba, a vuriwa N'wana wa Loyi-a-nge-henhla-henhla; Hosi Xikwembu xi ta n'wi nyika xiluvelo xa Davhida tata wa yena. ₃₃Ú ta fuma rixaka ra Yakobo hilaha ku nga heriki; vuhosi bya yena byi nga ka byi nga vi na makumu.”

₃₄Kambe Mariya a ku ka ntsumi: “Swi nga endlekisa ku yini, leswi ndzi nga si tivanaka ni wanuna ke?” ₃₅Ntsumi yi n'wi hlamula, yi ku: “Moya lowo Kwetsima wu ta xikela ka wena, ni matimba ya Loyi-a-nge-henhla-henhla ma ta ku funengeta; hikwalaho n'wana lowo hlawuleka la nga ta velekiwa, ú ta vuriwa N'wana wa Xikwembu. ₃₆Kutani tiva leswaku xaka ra wena Elizabeta na yena ú tikile eku dyuhaleni ka yena; n'hweti leyi i ya vu-6 eka yena loyi a a vuriwa mhika, ₃₇hikuva a ku na xilo na xin'we lexi hlulaka Xikwembu.” ₃₈Kutani Mariya a ku: “Hiswona, ndzi nandza wa Xikwembu; a ku endliwe ka mina hilaha u nga vula hakona.” Kutani ntsumi yi suka yi n'wi siya.

₃₉Eminkarhini yoleyo, Mariya a suka hi ku hatlisa a ya emagangeni, emutini wun'wana wa ka Yuda; ₄₀a nghena endlwini ya Zakariya, a xeweta Elizabeta. ₄₁Loko Elizabeta a twa ku xewetiwa hi Mariya, n'wana a tshuka-tshuka endzeni ka yena. Kutani Elizabeta a tala Moya lowo Kwetsima, ₄₂a tlakusa rito a ku: “U katekile exikarhi ka vavasati, ku katekile ni n'wana la nge ndzeni ka wena. ₄₃Swi endlise ku yini leswaku mana wa Hosi yanga a ta eka mina xana? ₄₄Loko ku xeweta ka wena ku fikile etindleveni ta mina, n'wana ú tshuka-tshukile hi ku tsaka endzeni ka mina. ₄₅Ku katekile la pfumelaka leswaku leswi Hosi yi n'wi byeleke swona, swi ta endleka.”

₄₆Kutani Mariya a ku:

₅₆Mariya ú tshamile na Elizabeta tin'hweti leti laveke ku ringana tinharhu, kutani a tlhelela ekaya.

₅₇Loko nkarhi wa Elizabeta wa ku kuma xihlangi wu fikile, a veleka n'wana wa mufana. ₅₈Lava akeke na yena ni maxaka ya yena va twa leswaku Hosi yi n'wi katekisile swinene, kutani va tsaka swin'we na yena. ₅₉Kutani hi siku ra vu-8 va ya yimbisa xihlangi; van'wana a va lava ku xi thya vito ra Zakariya tata wa xona. ₆₀Kambe mana wa xona a ku: “E-e, ú ta thyiwa vito ra Yohane.” ₆₁Va ku ka yena: “A ku na munhu exikarhi ka va ka n'wina la nga na vito rero.” ₆₂Kutani va vutisa tata wa yena hi ku kombetela-kombetela hi mavoko, leswaku a ta va tivisa vito leri a ri rhandzaka. ₆₃Kuteloko a kombele ribye, a tsala leswi: “Vito ra yena i Yohane.” Kutani va hlamala hinkwavo.

₆₄Kan'we-kan'we nomo wa yena ni ririmi ra yena swi ntshunxeka; kutani a vulavula, a tlangela Xikwembu. ₆₅Lava akelaneke na yena hinkwavo va khomiwa hi ku chava, kutani timhaka leti hinkwato ti hangalaka emagangeni hinkwawo ya tiko ra Yudiya. ₆₆Hinkwavo lava va ti tweke va ti hlayisa etimbilwini ta vona, va ku: “N'wana loyi ú ta va lowo yini xana?” Voko ra Hosi hakunene a ri ri na yena.

₆₇Kavaloko Zakariya tata wa yena a tala hi Moya lowo Kwetsima, a vulavula a ku:

₈₀Kutani n'wana a kula a ri karhi a kuma matimba emoyeni; kutani a ya tshama emananga ku ko ku fika siku leri a humeleleke ha rona eka Israele.