Luka 18

₁Yesu a byela vadyondzisiwa exifaniso, ku komba leswaku vanhu va fanele ku khongela minkarhi hinkwayo, va nga heli timbilu, ₂a ku: “Emutini wun'wana a ku ri ni muavanyisi loyi a a nga chavi Xikwembu, ni vanhu a a nga vuri nchumu ha vona. ₃Emutini wolowo, a ku ri ni wansati wa noni la nga ta eka yena, a ku: ‘Ndzi avanyisele eka loyi a ndzi tengisaka.’ ₄Swi tekile nkarhi lowo leha yena a ha ala. Kambe endzhaku a tianakanya, a ku: ‘Hambiloko ndzi nga chavi Xikwembu, ndzi nga vuri nchumu hi vanhu, ₅leswi noni leyi yi ndzi karhataka, ndzi ta yi avanyisela, leswaku yi nga ha tshameli ku ndzi pandzisa nhloko hi ku ta haleno.’ ”

₆Kutani Hosi yi ku: “Yingisani leswi vuriwaka hi muavanyisi loyi wo ka a nga tshembekanga. ₇Kutani, xana Xikwembu a xi nga avanyiseri vahlawuriwa va xona, ni ku va lehisela mbilu, vona lava huwelelaka eka xona vusiku ni nhlekanhi, xana? ₈Ndzi ri ka n'wina: Xi ta hatlisa ku va avanyisela. Kambe loko N'wana-wa-Munhu a ta, xana ú ta kuma ku pfumela ku ri kona emisaveni xana?”

₉Yesu a tlhela a vulavula na van'wana lava titshembaka leswaku va lulamile kasi va sandza van'wana, a va byela xifaniso lexi a ku: ₁₀“Vanhu vambirhi a va tlhandlukerile eTempeleni ku ya khongela; un'wana a a ri Mufarisi, un'wana a a ri muluvisi. ₁₁Mufarisi a yima, a khongerisa leswi embilwini ya yena, a ku: ‘Xikwembu, ndza ku nkhensa leswi ndzi nga faniki ni vanhu van'wana, lava nga ni makwanga, lava nga tshembekangiki, lava oswaka, ni leswi ndzi nga faniki ni muluvisi loyi. ₁₂Ndzi titsona swakudya kambirhi hi vhiki, ndzi humesa vukhume bya hinkwaswo leswi ndzi swi kumaka.’ ₁₃Muluvisi yena a a yimele kule, a chava ni ku tlakusa mahlo a languta etilweni, kambe a a komba ku vaviseka, a ku: ‘Xikwembu, ndzi twele vusiwana, mina ndzi nga mudyohi.’

₁₄“Ndzi ri eka n'wina: Muluvisi loyi ú tlhelele ekaya ka yena a hlayiwile la lulameke ku tlula Mufarisi; hikuva un'wana ni un'wana la tikurisaka, ú ta tsongahatiwa, ni la titsongahataka ú ta kurisiwa.”

₁₅Kutani vanhu van'wana va tisa vana lavatsongo eka Yesu leswaku a va khumba; loko vadyondzisiwa va swi vona, va tshinya vanhu lava. ₁₆Kambe Yesu a vitana vana, kutani a ku ka vadyondzisiwa: “Tshikani vana va ta ka mina, mi nga tshuki mi va sivela, hikuva Mfumo wa Xikwembu i wa lava fanaka na vona. ₁₇Ndzi tiyisile ndzi ri ka n'wina: La nga amukeriki Mfumo wa Xikwembu tanihi n'wana, a nga ka a nga ngheni ka wona.”

₁₈Kutani yin'wana ya tindhuna yi n'wi vutisa, yi ku: “Mudyondzisi lonene, xana ndzi nga endla yini ku kuma vutomi lebyi nga heriki xana?” ₁₉Yesu a ku ka yena: “U ndzi vulela yini lonene? A ku na lonene, loko xi nga ri Xikwembu ntsena. ₂₀U tiva Milawu leyi nge: ‘U nga tshuki u oswa; u nga tshuki u dlaya; u nga tshuki u yiva; u nga tshuki u humesa vumbhoni byo hemba; u va ni xichavo eka tata wa wena ni ka mana wa wena.’ ” ₂₁Yena a ku: “Ndzi hlayisile hinkwaswo leswi ku sukela evuntshweni bya mina.” ₂₂Loko Yesu a twa sweswo, a ku ka yena: “Wa ha pfumala xilo xin'we, xavisa hinkwaswo leswi u nga na swona, u avela swisiwana, hi kona u nga ta va ni xuma ematilweni; kutani u ta, u ndzi landza.” ₂₃Loko munhu loyi a twa sweswo, a tlhaveka ngopfu, hikuva a a ri munhu wa rifuwo lerikulu. ₂₄Kutani Yesu a n'wi languta, a ku: “Swa nonon'hwa ngopfu eka lava nga ni rifuwo ku nghena eMfun'weni wa Xikwembu. ₂₅Swi nga olovela kamela ku nghena hi ntuva wa neleta, ku ri ni leswaku mufuwi a nghena eMfun'weni wa Xikwembu.” ₂₆Lava twaka marito lawa, va ku: “Loko swi ri tano ku nga pona mani ke?” ₂₇Yesu a ku: “Leswi tsandzaka vanhu a swi tsandzi Xikwembu.”

₂₈Kavaloko Petro a ku: “Waswivo, hi tshikile swilo swa hina, hi ku landza.” ₂₉Yena a ku ka vona: “Ndzi tiyisile ndzi ri ka n'wina: Un'wana ni un'wana la tshikeke muti wa yena, kumbe nsati, kumbe vamakwavo, kumbe vatswari, kumbe vana, hikwalaho ka Mfumo wa Xikwembu, ₃₀ú ta kuma leswo tala ku tlula sweswo eminkarhini ya sweswi, kutani eminkarhini leyi taka, ú ta kuma vutomi lebyi nga heriki.”

₃₁Yesu a vitanela lava khume na vambirhi etlhelo, kutani a va byela a ku: “Vonani, hi tlhandlukela eYerusalema, kutani hinkwaswo leswi tsariweke hi vaprofeta ehenhla ka N'wana-wa-Munhu swi ta hetiseka. ₃₂Hikuva ú ta nyiketiwa eka vamatiko; va ta tlanga hi yena, a rhuketeriwa, a tshwuteriwa marha; ₃₃kutani loko va n'wi bile hi minkhavi, va ta n'wi dlaya; kambe ú ta pfuka eku feni hi siku ra vunharhu.” ₃₄Kambe vona a va twisisanga nchumu etimhakeni teto; rito leri a ri va tumbelele, kutani a va swi twanga leswi Yesu a a vula swona.

₃₅Yesu a a fikile kusuhi na Yeriko. Endhawini yoleyo, a ku ri ni munhu la feke mahlo, a tshamile kusuhi ni ndlela, a ri karhi a kombela. ₃₆Loko a twa vunyingi lebyi hundzaka, a vutisa, a ku: “Ku humelela yini?” ₃₇Va n'wi byela va ku: “I Yesu wa Nazareta loyi a hundzaka.” ₃₈Kutani a huwelela a ku: “Yesu, n'wana Davhida, ndzi twele vusiwana!” ₃₉Kutani lava rhangeke emahlweni va n'wi tshinya, va ku a a miyele; kambe a engeta a huwelela hi matimba, a ku: “N'wana Davhida, ndzi twele vusiwana!” ₄₀Kavaloko Yesu a yima, a lerisa leswaku lowo-fe-mahlo a tisiwa eka yena; loko a fikile kusuhi, Yesu a n'wi vutisa a ku: ₄₁“Xana u lava leswaku ndzi ku endlela yini ke?” Yena a ku: “Hosi, ndzi navela ku tlhela ndzi vona!” ₄₂Yesu a ku ka yena: “Tlhela u vona! Ku pfumela ka wena ku ku hanyisile.” ₄₃Hi nomu lo, a tlhela a vona, kutani a landza Yesu a ri karhi a dzunisa Xikwembu. Na rona tiko hinkwaro, loko ri swi vonile, ri tlangela Xikwembu.